Salmo 48
48
Din Mapteng Ay Siyodad Diyos
1 Si Yahweh ay Diyos tako et peteg di kinangato na,
lebbeng na ay madayaw sisya sin siyodad na
ay kad-an di nasantoan ay dontog na.
2 Din dontog ay Zion, maptemapteng ya nakayang,
siyodad ay pantean Diyos ay say Ari ay Kangatoan.
Maragsakan amin ay ipogaw isnan daga
begew sin siyodad ay sana.
3 Si Diyos ay mismo et say kad-ana,
yan pinaneknekana ay sigurado ay salaknibana.
4 Din aari yan mantitinolong da
ay mangobat ed Zion ay sana.
5 Ngem idi inila da yan nasdaaw da,
inmegyat ya nanagtag da.
6 Manpayegpeg da si egyat da
ay kaman din ligat di babai ay dandani di pan-anakana.
7 Inabak mos daida
ay kaman din panadaelan di dagem ay napigsa
si bapor ay emey ed Tarsis ay kanan da.
8 Din nadamdamag mi, maila mi ed wani
sin siyodad Diyos ay daydayawen mi,
Diyos ay Manakabalin Amin ay si Yahweh.
Sinay di siyodad ay salakniban Diyos si eng-enggana.
9 Nemnemnemen mi sin Timplo na
din adi manbalbaliw ay layad na.
10 Mandinamag din ngadan Diyos ya madaydayaw sisya
sin intiro ay daga.
Mangab-abak sisya gapo sin panakabalina.
11 Din ipogaw ed Zion, manragsak da koma,
siya abe sin omili ed Juda,
tan nalinteg din pangeddeng na.
12 Din siyodad ay Zion, en yo likeden
ta din nankakakayang ay beey isdi, en yo bilangen.
13 Esten yo ay ilaen din dingding ya alad na
ta sin an-ak yo yan dad-aten yon daida
14 ay siya di di panakabalin Diyos tako,
sisya di kanayon ay mangilapo en datako.