Salmo 60
60
Kararag Di Nasyon Ay Dinokogan Diyos
1 Binmaybay-an ka, Apo, et naabak kami.
Binmonget ka kayman en dakami,
ngem ed wani, sagongem kod dakami.
2 Inkiweg mo din daga et nan-ekang da,
ngem ed wani, iamag mo koma din dadael na
ta adi masepsep di kasasaad na.
3 Inpalak-am mo sin ipogaw mo di palalo ay ligat.
Indawtam dakami si bometeng ay arak.
4 Tinood moy sinyal para sin mangipateg en sik-a
ay say pantopogan da
ta mailisian da din panan di kalaban da.
5 Babaen sin panakabalin mo,
isalakan mo din laylaydem ay ipogaw mo.
Patgam kod din kararag mi
ta isalakan mos dakami.
6 Sin Timplom yan kanam, Apo,
“Mo makdeng ay mangabakak, bingayek to
ed Sekem ya tanap ed Succot sin ipogaw ko.
7 Ed Manasses ya Gilead yan okak daida,
ed Efraim yan helmet ko di kaiarigana
yan sinyal di turay ko ed Juda.
8 Panbalinek ed Moab ay pan-owasak,
ed Edom abe yan bag-en ay iturayak.
Abakek ed Filistia et manbogawak.”
9 Sino pay di omiey sin siyodad ay naaladan, Apo?
Ed Edom, sino di omipango?
10 Apo, ay enggay dinokogam tet-ewas dakami?
Ay adi ka ipango ay makigobat din sosoldado mi?
11 Sin kalaban mi, bomadang ka koma,
tan din badang di ipogaw et magay silbi na.
12 Mangabak kami mo wada ka ay kadwa mi,
tan sik-ay mangabak sin kalaban mi.