5
Nanitabokobi Midipino Elawote Me Opono Elawo Anakapumi Tanalo
1 Numa꞉la꞉, Ya꞉sute Godokono Alibodawa Kelisoma꞉ deda꞉na, piyate ebe tanalo nanitabokobi da꞉midina ibi Godokono gudila, ebema꞉ piyate Nabiwi Godoko nilakapolo demalagidilona, iba꞉te atumu ebeno gudi bilibilinomo atu nilakapo tanalago kemalagidilolena.
2 Ebema꞉ Godokono nilakapo kimalagidilo tanalote agodolo ebeno gudi epetapiatamo ditana, ale ebe tanalo ma kunu iyatawaonama꞉, kebe tetelo ale ebe nilakapolo eba malagidilolo ebeno totomu tabamo da꞉tudila꞉onakoma꞉, ebe tetelo ebeno nilakapo tanalote a magumulo nanitabolo itananako.
3 Nanitabola, Godoko nilakapolo malagidilo tanalo ega꞉walo ebeno totomu tabamo tuduwata tanalo, ebe tanalo netewate iyaiya ka꞉pola꞉na꞉, ibino woko osiyodilo tanalo ebe kapiyala. Ega꞉walo ale ma kunu a꞉kemalagidiloma꞉, Godokono totomu tabamo tudila꞉o tanalote atamo kodakodanomoma꞉ eda꞉na.
4-5 Ao, eba kunua꞉, mabu Godokono gudi bilibilinomagodolo ebeno elawo bitana iba꞉te me opono kuba osiyodilo elawo kanakapuima꞉. Ebema꞉ me opono kuba osiyodilole tanalo anakapuima꞉ lumagite elawonomoma꞉ keba kunu na꞉keda꞉namene, ega꞉walo potele na꞉ka꞉modobomene me opono elawo anakapuima꞉? Nanitabola, a magumulo potele ebeno nanitabokobi midi magumulo Ya꞉suko Godokono Guduma꞉ degena, ebe dawate modobo elawo belawenakomene.
Ya꞉su Kelisokono Nanitabo Tanalo Dawokalimina Ebe Netewa-kapiya Tanalo
6 Me tanalo nanitabola, Ya꞉su Kelisote me opamo da꞉piya, ebete ebeno nanitabo tanalo awokalima꞉ ebete obo ega꞉walo kalima ka꞉ka꞉liya tanalago atamo a꞉pemaigiya, iyo, ebete me netewa gabodo ebeno tanalo atamo apawokalimiya. Ega꞉walo me tanalo idila, Godokono Uliyanate atumu Ya꞉sukono nanitabo tanalo kawokalimina mabu ebe Godokono nanitabo tanalo awokalimidawala.
7 Ebema꞉ Kelisokono tanalo kawokaliminama꞉ me netewa-kapiya tanalate ba꞉pola꞉nama꞉na꞉,
8 Godokono Uliyanano tabono tanalo, ega꞉walo Kelisokono kalimate deka꞉ka꞉liya ebe tanalo, ega꞉walo opo lumagite ebe obamo daduba꞉midiya ebe tanalo, iyo, me netewa-kapiya tanalate me atu tanalo awokalimina, Ya꞉su Kelisoko ebe Godokono Gudula.
9 Numa꞉la꞉, me opo epate nanitabolo degelanaka, tete bilibilinomo epetapilo ale ebe tabo nanitabokobi da꞉midilinakoma꞉ ebe tanalo kuba꞉. Wiyasiya Godote ebeno Guduno tanaloma꞉ kebe tabo kegenale, modobola ale ebe tabo wadenomamo olowite nanitabokobi ka꞉midimalema꞉, iyo, Godokono tabono iyaiya tanalo ebe nanitabonomola, ebete a꞉da꞉ tabo ka꞉kiyawaona꞉, ebema꞉ ebeno tabono elawote opo epono elawo nodolina.
10 Ebema꞉ kebe lumagite Godokono Gudu nanitabokobi da꞉midina, ebe lumagino tepo magumulo Godokono nani tabote bitana. Wiyasiya numa꞉la꞉, kebe lumagite Godokono tabo nanitabokobi midia꞉no ebe lumagite me gabodo Godoko a꞉da꞉ elemasigidawama꞉ midina, mabu Godote ebeno Guduno tanaloma꞉ nanitabolo degiya, ebe nanitabokobi midia꞉dawate ebe tabo ubia꞉noma꞉ eda꞉na.
11 Nanitabola, Godote ebeno Guduno nanitabo tanalo awokalima꞉ me tanalo osiyodiliya, ebete ebeno Gudugodolo ditana ebe uwomua꞉ igilo atamo ikaeamiya.
12 Ebe mabuma꞉ kebe lumagite Godokono Gudu nanitabolo danikumina ebegodolo uwomua꞉ igilo bitana, wiyasiya kebe lumagite Godokono Gudu lawea꞉no, ebe niyala, nanitabo igilote ebegodolo kitana꞉.
Godokono Guduno Uwomua꞉ Igilono Tanalo
13 Ebema꞉ la꞉ piyate Godokono Guduno mailo nanitabokobi da꞉mida꞉wenama, na me leta la꞉tamo osiyodilomo, la꞉le uwomua꞉ igilo delawa꞉wiyama ebe igilote la꞉godolo eba itanalo la꞉le nanitabolo kiyatawaema꞉.
14 Nanitabola, ale towetowe tabago Godokono ololo apuamo da꞉nemaimioma꞉, ebe tetelo ale tolea꞉no aimano iyaiya modoboa꞉ tanaloma꞉ ebe kanamalema꞉, ebema꞉ a me tanalo iyatawala, ale kebe tanalo ebeno ubilo ebe da꞉toweoema꞉, ebete ebe towetowe tabo nanitabolo kolowimene.
15 Ega꞉walo a iyatawala, Godote aimano towetowe tabo dolowiomene ebete a nanitabolo kowalubimene, iyo, a kebe tanalo ebegodone laema꞉ ebe da꞉toweoema꞉ ebete atamo kikaeaemene, mabu tete bilibilinomolo ebete aimano iyaiya towetowe tabo olowionako.
16 Ebema꞉ la꞉le nanitabokobi midipi magumulo ekawi idino kuba osiyodilo tanalo duma꞉ema, modobola la꞉ ebeno tanalo Godotamo towetowe tabamo nadipatemiyala꞉, ebene Godote ebeno tepo magumuno tanalo wadekobi midite ebetamo igilo walo ka꞉kikaemene. Wiyasiya kebe tetelo lumagite kuba kawonomo dosiyodilomene, ma kunu ebete Godokono Uliyanano nanitabo woko kubama꞉ degemene, ebe tetelo ebeno igilo mabuma꞉ Godotamo akotowetoweala꞉, modobola ebako kubadawate a꞉eamo na꞉toamene.
17 Numa꞉la꞉, me kuba osiyodilo tanalo kapiyanomote lumagi a꞉eamo kemagatamene, ebema꞉ la꞉ naimano tabono tanaloma꞉ woki bilibilima꞉ akoeda꞉oala꞉. Nanitabola, a epono osiyodilole tanalo bilibilinomo magumulo aimano tuputupua꞉ tanalo ebe Godokono pukala wakalami tanalola, wiyasiya kalakala kawonomola, ebegodolo elawo bitana ebako iyaiya kuba osiyodilole tanalo egeboleamete igilo atamo walo ka꞉kikaeaema꞉.
18-19 Nanitabola, a iyatawala Godokono guda꞉te kuba osiyodilole magumulo kilukuliona꞉, mabu Godogodone dawokaliya ebe Elawodawate ibi na꞉ga꞉lulatelena Kubadawa Saitanate ibi kubailamekapoma꞉. Ebema꞉ numa꞉la꞉, me opo kawonomote ebe Kubadawano elawo magumulo itana, wiyasiya a iyatawala a nanitabokobi midipiate me opolo eba ilukulionalo a Godokono gudima꞉ eda꞉onama꞉, ebema꞉ kuba tanalo idite a a꞉kologimene.
20 Ega꞉walo a tanalo idi iyatawala, Godokono Gudute me opamo da꞉piya, ebete atamo wade mulo tanalo a꞉pikaeamiya ale Nanidawano tanalo wadenomamo kiyatawaonama꞉. Numa꞉la꞉, ebe Nanidawa ebe Godotela, ebe Uwomua꞉ Igilola, ebema꞉ kalakala kawonomola, ale ebeno Gudu Ya꞉su Kelisoko magumulo bilukulionama꞉!
21 Ebema꞉ naimano wadewade guda꞉la꞉, modobola la꞉ nani Godo kapiya eba amamatenalo, ida꞉da꞉li epetapi amamalatele tanalamo ega꞉walo ibino a꞉da꞉ elemasigi uliyanano wokino tanalamo akotudila꞉onakala꞉.
Me ebe naimano tabo uwomula. Taula.