YONEKONO NABA 2 LETA
EBETE NANITABOKOBI MIDIPIATAMO OSIYODILIYA
1
Na me leta dosiyodilomo, na nanitabokobi midipino watodawa idila. Godote iyalo tetelo kebe epo keka꞉la꞉mioliyale iba꞉te ebeno gudima꞉ keda꞉onama꞉, ebe epono taneba ebe ebeno oli kamiyale keba kunula꞉ka꞉ eba kunula. Nanitabola, la꞉ ebe nanitabokobi midipi gudilata, ebema꞉ nale la꞉ nilakapolo nemalagidilolenamata, ega꞉walo Godokono nanitabo tanalo iyatawaopiate atumu la꞉ na꞉kemalagidilolenata. Numa꞉la꞉, nale me leta la꞉tamo ebema꞉ palibomo, mabu Godokono nanitabo tanalote a bilibilinomatamo da꞉pemaigiya, ebe nanitabo tanalote a magumulo eba itanalo a꞉kolopoligonamene, uwomua꞉ tetelo agodolo bitanamene.
Ebema꞉ numa꞉la꞉, Nabiwi Godoko ega꞉walo ebeno Gudu Ya꞉su Kelisoko iba꞉godone atamo da꞉pemaimiona ebe nilakapo tanalo ega꞉walo lumagitamo kuba wiya ikamea꞉ tanalo ega꞉walo milo tanalo, modobola ale Godokono nanitabo tanalo ega꞉walo ebeno nilakapo kimalagidilo magumulo eba ilukulionalo me netewa-kapiya tanalate agodolo na꞉pola꞉nama꞉na꞉.
Kelisokono Iyatulame Tabago Ilukuli Tanalo
Ebema꞉ nanitabokobi midipi guda꞉la꞉, la꞉ epetapi Nabiwi Godokono nanitabo tanalo magumulo dowapata꞉lama꞉wenama, na ebe tanalo olowite kawo kalakala ebo laimo, mabu ale eba kunu kowapata꞉lamenama꞉ Nabiwite a iyalo a꞉totomuateiya. Nanitabola, la꞉ nanitabokobi midipi gudino taneba ebe Godokono oli kamiyale keba kunula꞉ka꞉, la꞉ eba kunula. Ebema꞉ nale me leta nosiyodilomo ebeno totomu tabo idi la꞉tamo ma kunu kawokalima꞉, modobola a magumulo idite idi nilakapolo kemalagidilo, idite idi nilakapolo kemalagidilo, a bilibilinomate eba kunu bowagelenama꞉. Na iyatawala me totomu la꞉tamo oli totomua꞉, tagala totomula, iyo, Godote dopamo wagilimi mabune atamo dikaeamiya ebe totomula. Ebema꞉ ebeno nilakapo kimalagidilo tanalo keba kunula꞉ka꞉? Ebe tanalono magumu ma kunula, ale aimano ilukuli magumulo Godokono totomu tabo bilibilinomamo ba꞉tudila꞉onakoma꞉. Nanitabola, ebe totomu tabo bilibilinomo magumulo ale ebeno kawo totomu tabo wagilimi mabune ma kunu olowiyama꞉, a ebeno nilakapo tanalago bowapata꞉lamenama꞉.
Numa꞉la꞉, a꞉da꞉ masigiolepi epetapi bilibilinomate iyalo emaimiya, me tetelo me opo kawonomolo bilukuliona. Iyo, iba꞉te tabo ma kunu gelana, “Ya꞉su Kelisoko lumagino apa꞉mo me opamo kapawokaliya꞉,” ebema꞉ ebe tabo gela tanalamo iba꞉te ibino tanalo ma kunu awokalimina, ibi A꞉da꞉ Masigioledawa Kawonomo ega꞉walo Kelisotamo Gowela Tanalo Osiyodilodawano uliyanagopila. Wiyasiya la꞉imano tanalo iyanomola, mabu la꞉le kebe wade woko kowagilima꞉wiyama ebe wokote la꞉godolo olopoligoa꞉no, walone la꞉le la꞉imano wiya kawokawonomo nanitabolo ka꞉nuwatemamota. Ebe mabuma꞉ la꞉ a꞉ka꞉tuwa꞉ la꞉ wadenomamo nulamenala꞉, la꞉le ebe woko wiya anaetoamidakapoma꞉.
Ega꞉walo me tanalo idila. Kebe lumagite Kelisokono iyatulame tabago okolina꞉no ebe a꞉ka꞉tuwa꞉ ebeno ubilo da꞉tona, ebe lumagino osiyodilole tanalate ebeno tepo magumuno tanalo ma kunu awokalimina, Godote ebe magumulo kokolina꞉. Wiyasiya kebe lumagite Kelisokono iyatulame tabago dokolina, ebe lumagi magumulo Nabiwi Godoko ega꞉walo ebeno Gudu Ya꞉suko nanitabolo bokoliona. 10 Ebema꞉ kapela lumagi idite la꞉ nanitabokobi midipiatamo eba pemaigalo, ebe a꞉ka꞉tuwa꞉ ebe Godokono wokodawama꞉ da꞉pegemene, la꞉ nanisiwale! Ebete Kelisokono nanitabo iyatulame tabago pea꞉no la꞉ ebe kalakalago lawa꞉wete la꞉imano motamo ebe ako-owodolala꞉, 11 mabu kebe lumagite ebako a꞉da꞉ elemasigidawa kalakalago delaemene, ebete ebetamo elawo ebo kikaemene Saitanakono woko kosiyodiloma꞉.
12 Nanitabola, nagodolo tanalo epetapi bilibilinomo ba꞉pola꞉na la꞉ kanaletama꞉, wiyasiya na ubia꞉nola ebe iyaiya tanalo pepamo akulolema꞉, ebema꞉ naimano woki bitana naimano apenomamo la꞉tamo ka꞉pema꞉, iyo, gabote ditanamene na ka꞉pemamo. Ebe tetelo aimano kalakalate nanitabonomoma꞉ keda꞉mene, mabu na la꞉imano iyaiya ololo eba pulamelo aimano tabono iyaiya tanalo ebo kegelamalema꞉.
Yonete Leta Uwomu Apulo Nanitabokobi Midipino Nilakapo Tabo Dapalibiya
13 Ebema꞉ nanitabola, kebe nanitabokobi midipiate nago daladabutinaka, Godote ibi atumu iyalo eka꞉la꞉mioliya iba꞉te ebeno gudima꞉ keda꞉onama꞉. Numa꞉la꞉, ibino sosi taneba ega꞉walo la꞉imano sosi taneba, me la꞉imano taneba netewate kapiya alailame buwelemele netewa keba kunula꞉ka꞉ eba kunula, ebema꞉ iba꞉te ibino nilakapo tabo ebe paliba la꞉tamo.
Me ebe naimano tabo uwomula. Taula.