54
Lungse Lun LEUM GOD Ke Israel
Jerusalem, meet kom tuh oana sie mutan wangin tulik natu.
A inge kom ku in on ac sasa ke engan,
Mweyen ac fah pus tulik nutum
Liki sie mutan su mukul tuma tiana som lukel.+
Akyokyelik lohm nuknuk sum an;
Akloesyalik sucl kac, ac akkeyala kwi ma sruok sucl an!
Kom fah kulelik masrol lom ke siska nukewa;
Mwet lom ac fah sifil eis facl ma
Mutunfacl saya muta fac in pacl inge.
Siti ma wangin mwet we in pacl inge ac fah tingtingi ke mwet.
 
Nimet sangeng — kom ac fah tia sifilpa akmwekinyeyuk;
Kom ac fah tia sifilpa akpusiselyeyuk.
Ac fah mulkinyukla tafongla lom ke pacl lom payuk fusr,
Ac oayapa supwar lom ke kom katinmas.
El su orekomla El ac oana sie mukul tuma nu sum —
LEUM GOD Kulana pa Inel.
God mutal lun Israel fah molikomla —
El pa leumi faclu nufon.
 
Israel, kom oana sie mutan payuk fusr
Su mukul tumal el sisella, ac arulana toasr insia.
Tusruktu LEUM GOD El pangonkomme nu yorol ac fahk:
“Nga tuh siskomla ke kitin pacl,
A ke pakoten lulap luk, nga fah sifil eiskom.
Nga tuh kasrkusrak ac ngetla liki kom ke kitin pacl,
Tusruktu inge nga fah fahkak lungse kawil luk nu sum.”
Pa inge ma LEUM GOD su molikomla El fahk.
 
“In pacl lal Noah nga tuh wulela mu
Fahlu ac tiana sifilpa musalla ke sronot.
Inge nga wulela in tiana sifil kasrkusrak sum.
Nga fah tia sifilpa mulat nu sum ku kai kom.+
10 Eol uh ac inging uh ku in mokukla,
A lungse luk nu sum fah tiana safla;
Nga fah liyaung wuleang in misla luk nwe tok.”
LEUM GOD su lungse kom El fahk ouinge.
Jerusalem In Pacl Fahsru
11  LEUM GOD El fahk,
“O Jerusalem, sie siti keok su musalla tukun paka se
Ac wangin mwet in akwoye kom,
Nga fah sifil musaeak pwelung lom ke eot saok.+
12 Nga fah musai tower lom ke eot ruby,
Ac mutunpot sum ke eot saromrom oana e,
Ac pot ma raunikomyak ke wek saok.
 
13 “Nga ac fah sifacna luti mwet lom,
Ac oru tuh elos in kapkapak ac moul in misla.+
14 Suwoswos ac pwaye ac fah oru kom in ku.
Kom ac fah tia pulakin mwe keok ac mwe aksangang.
15 Fin oasr kutena mwet mweuni kom,
El oru ke tia ma nga sapkin.
Ac fah kutangyukla kutena mwet su mweun lain kom.
 
16 “Nga pa orala mwet orekma ke osra,
Su tanak sie e ac orala kufwen mwe mweun.
Nga pac pa orala mwet mweun,
Su orekmakin kufwen mwe mweun in uniya mwet.
17 Tusruktu wangin kufwen mwe mweun ac fah kunauskomla.
Ac fah oasr top lom nu selos nukewa su akkolukye kom.
Nga fah loango mwet kulansap luk
Ac oru tuh elos in kutangla.”
 
LEUM GOD pa fahk ma inge.
+ 54:1 Gal 4:27 + 54:9 Gen 9:8–17 + 54:11 54:11–12; Fwack 21:18–21 + 54:13 Jn 6:45