55
Pakoten Lun God
LEUM GOD El fahk,
“Fahsru, kowos nukewa su malu —
Kof pa inge!
Fahsru kowos su wangin mani la —
Mongo ac nim!
Fahsru! Moul wain ac milk —
Ac fah wangin molo!+
Efu ku kowos sisi mani ke ma ac tia akinsewowoye kowos?
Efu ku kowos sisla molin orekma lowos ac srakna masrinsral?
Porongeyu ac oru ma nga fahk uh,
Na kowos fah engankin mwe mongo ma wo emeet uh.
 
“Mwet luk, porongeyu ac fahsru nu yuruk;
Fahsru nu yuruk, na ac fah oasr moul lowos!
Nga ac oru sie wuleang inmasrlok ac kowos su wangin saflaiya,
Ac nga fah sot nu suwos mwe insewowo ma nga tuh wuleang nu sel David.+
Nga oru tuh elan sie mwet kol ac leum lun mutunfacl uh,
Ac nga akkalemye ku luk kacl.
Inge kowos fah suli mutunfacl saya uh.
Sie pacl ah, elos tuh tia etekowos,
A inge elos ac kasrusr tuku in wi kowos!
Nga, LEUM GOD lowos, God mutal lun Israel,
Fah oru ma inge nukewa in sikyak;
Nga fah sot nu suwos sunak ac wolana.”
 
Suk LEUM GOD ke kowos srakna ku in konalak,
Pre nu sel inge ke El apkuran.
Lela mwet koluk in sisla ouiyen moul lalos,
Ac in ekulla ouiyen nunak lalos.
Lela elos in forla nu sin LEUM GOD lasr;
El pakoten ac sa in nunak munas.
LEUM GOD El fahk, “Nunak luk, tia oana nunak lowos,
Ac inkanek luk siena liki inkanek lowos.
Oana ke kusrao arulana fulat liki faclu,
Ouinge inkanek luk fulat liki inkanek lowos,
Ac nunak luk liki nunak lowos.
 
10 “Kas luk oana snow ac af
Ma kahk inkusrao me in aksroksrokye faclu.
Af uh oru sacn uh in kap
Tuh in oasr fita mwe yok, ac in isus fahko mwe mongo.+
11 Ac fah oapana inge ke kas ma nga fahk uh —
Ac fah tia tafongla liki ma nga sapkin uh,
A ac fah orekla ma nukewa fal nu ke lungse luk.
 
12 “Kowos ac fah som liki acn Babylon ke engan lulap;
Ac fah kokola kowos liki siti uh in misla.
Eol uh ac inging uh fah wowoyak ke on,
Ac sak uh fah sasa ke engan.
13 Sak cypress fah kap ke acn ma mah fakfuk uh kapak we.
Acn ma oasr kokul we inge, sak myrtle fah kapak we.
Pa inge sie mwe akul ma ac oanna nwe tok,
Sie mwe akesmak ke ma nga, LEUM GOD, orala.”
+ 55:1 Fwack 21:6; 22:17 + 55:3 Orek 13:34 + 55:10 2 Cor 9:10