A Wakak na Wasiso un o Iesu Karisito
o Jon
i tumusi
A wasiso talapor mugu
O Jon i ara tagun a noino ma aru nat na ususer anun o Iesu (tama Mt 4:21). I tama a kum utna ra o Iesu i pami ma i longoro anun a kum etowo. I tumus a buk ri numur tan a tulu buk ra o Matiu, o Mak ma o Luk detul tumusi. I tumus a buk ri uni i nemi sur dat in tasman o Iesu ma dat in nurnur uni, ma un o Iesu kut dat in laun tukum, tama Jon 20:31.
Ara labino utna ra o Jon i nem na inanos dat uni, i lenri: O Iesu i o God ma i a Nutun o God. Una turturkibin ina buk ri, i wasiso talapor un o Iesu lena, i o God ma numugu utmakai i kis tomo nam o God. I inanos dat kai una kum utna na ukisin ra o Iesu i pami. O Jon i watung det a kum ukinalong, uni det ulingmulusi lena o Iesu i o God. O Jon i inanos dat kai lena a susut na taro ka det nurnur un o Iesu, a kum mugumugu anun a taro Juda kai ka det nurnur.
A inawan ina buk Jon:
A Wasiso i wanpat a musano mulus (1:1-18)
O Jon a Tene Baptaiso (1:19-34)
A kum mugano nat na ususer anun o Iesu (1:35-51)
A pinapam anun o Iesu torom a taro (2:1-12:50)
A ururop na wik ma a minatin o Iesu (13:1-19:42)
A katkatutur melet anun o Iesu gusun a minat (20:1-31)
O Iesu i wanpat torom a kum nat na ususer tong o Galili (21:1-25)
1
O Iesu i a Wasiso anun o God
+Numugu utmakai ra ka di ukisi utmakai a rakrakon bual, a Wasiso i sa kis mugu taru. A Wasiso i kis tomo nam o God, ma a Wasiso i ut o God. Numugu utmakai i kis tomo nam o God. +Una Wasiso kut, o God i ukis a kum utna rop. Katu utna o God i ukis tari, ra ke ukisi nama Wasiso. +A nilaun i kis uni, ma a nilaun ra, i a talapor anun a taro rop. +A talapor i sisio una dumirum, ma a dumirum ke pulus lar pasi.
+O God i tulu ru ara musano, a risano o Jon. I wanpat sur in wasiso puaso una talapor, sur a taro rop det in nurnur uni. I ut awu sur a talapor, i wanpat kut sur in wasiso puaso una talapor. +A talapor mulus, ra i ser utalapor a taro rop, in nanpat mo urin una rakrakon bual.
10 A Wasiso i kis una rakrakon bual. Ma una Wasiso, o God i ukis a rakrakon bual, ikut a taro una rakrakon bual ka det tama lele pasi. 11 I wanpat sur anun a taro, ikut anun a taro ut ka det gas pasi. 12 Ikut, torom det ra det gas pasi, ma det nurnur una risano, i mulaot pas det sur det a kum nutnutun o God. 13  +Awu sur di watung det a kum nutnutun o God kibino una usus na kabotaro, o una nuknukin tu musano taginin upiso, o una nemnem tagun a nolin, awu. Di usus det una nion, una nemnem ut anun o God.
14 A Wasiso i wanpat a musano mulus, ma i kis epotor tamet. Met sa tama tar anun a minamar, a minamar anun o Nutunu, ara sot kut, ra i wan tagisapat tan o Tamano, i bukus nama marmaris ma a lingmulus. 15 O Jon i wasiso talapor uni, ma i watungi namin labino walngano lena, “I ut ri, ra a wasiso mugu taru uni lena, ‘I ra in mur tang, i labo tang, uni i laun raut numugu tang.’ ” 16 I bukus nama marmaris, ma gusun anun a labino marmaris i udan dat nama susut na wakak na utna ra i wanan pat torom dat. 17  +Un o Moses, o God i pitar tar a Warkurai torom dat, ikut un o Iesu Karisito i pitar tar a marmaris ma a lingmulus torom dat. 18  +Kataio utmakai i tama tar o God. Ikut ara Nutunu kut, ra i kis tomo nam o Tamano, i ut i ese o God torom dat. Ma i ut o God.
O Jon a Tene Baptaiso i inanos talapor a taro uni ut
(Mt 3:1-12; Mk 1:1-8; Lk 3:1-18)
19 A kum mugumugu anun a taro Juda tagisapat o Jerusalem, det tulu ru a ramano kum tene etabor torom o God, ma a ramano taro tagun a kabotaro Liwai,* torom o Jon sur det in tingi lena, “Ui osi?” 20 O Jon ke wasiso batbati, i wasiso talapor ut uni lena, “Awu sur iau a Karisito.” 21  +Det ting meleti lena, “Osi ui? Ui o Elaija?” Ra i balu det lena, “Awu, awu sur iau o Elaija.” Det ting meleti lena, “Ui a poropet ra di watung tari sur in nanpat?” I balu det lena, “Awu.” 22 Numur det tingi lena, “Osi ui? Un inanos met sur met in inanos det ra det tulu ru met urin. Asau un watungi un ui ut?” 23 O Jon i balu det lena, “Iau a musano ra a poropet Aisaia i wasiso mugu taru uni lena, ‘Una nubual kalako taro uni, in nalngan ara i kakabo lena: Mot in pam kodos a kisapi anun a Labino.’ ” Ais 40:3
24 A kum Parisi ra di tulu tar det torom o Jon, 25 det tingi lena, “U watungi lena, awu sur ui a Karisito, ma awu sur ui kai o Elaija, o a poropet, ra di watung tari sur in nanpat. Ra i lenra, ilai sur u baptaiso a taro?” 26 O Jon i balu det lena, “Iau, a baptaiso mot nama danim, ikut ara kura i tur epotor tamot, ra ka mot tasman pasi. 27  +I ra, in mur tang. Ka elar sur an palos aru su gusun aru kikino, uni a natino doko tano.”
28 A kum utna ri, i wanpat tong o Betani una ara papor danim Jodan, ra o Jon i baptaiso a taro iai.
O Iesu a Barman na Sipsip anun o God, ra in mat una sakino petutna anun a taro
29  +Ara bung numur, o Jon i tama o Iesu i wan nanan toromi, ra i watungi uni lena, “Mot tama i, a Barman na Sipsip anun o God, ra in lakro ru a sakino petutna anun a rakrakon bual. 30  +A musano kut ri, ra a wasiso mugu taru uni lena, ‘A musano ra in mur tang, i labo tang, uni i laun raut numugu tang.’ 31 Iau kai numugu ka tasmani. Ikut a baptaiso nama danim sur an upuaso a musano ri torom a taro Israel.”
32-33  +Ma o Jon i watungi lena, “Ka tasmani lena osi a Karisito. Ikut o God, ra i tulu ru iau sur an baptaiso nama danim, i inanos iau lena, ‘Un tama a Tokodos na Nion in nan pirso ma in kis un ara musano. I ra a musano ra in baptaiso nama Tokodos na Nion.’ Ma a tama a Tokodos na Nion i wan pirso tagisapat una langit, i elar namin natabun ma i kis taru netes un o Iesu. 34  +A sa tama tar a utna ri i wanpat, ra a inanos uni lena, i a Nutun o God.”
A kum mugano nat na ususer anun o Iesu
35 Ara bung palu melet, o Jon ma aru nat tagun anun a kum nat na ususer detul tur taru melet tiro. 36  +I tama pas o Iesu i wan sakit detul, ra i watungi uni lena, “Tama i, a Barman na Sipsip anun o God.”
37 Aru nat na ususer der longoro a wasiso ra, ma der muri mut o Iesu. 38 O Iesu i tur tupukus, i tama der ra der muri, ra i ting der lena, “Asau ra mur nemi?” Der balu i lena, “Rabai,” (a kukuraino a Tene Ususer), “kura u kis awai?” 39 O Iesu i balu der lena, “Mur iap sur mur in tama i.” I mo ra der muri, ma der tama a dino ra o Iesu i kis iai. Ra detul wanpat, i sa wat na pakano bung pas, ma detul kis mukut tiro iai a kudulano lirop ra.
40  +Ara tagun aru musano ra der longoro a wasiso anun o Jon ma der mur o Iesu, a risano o Endru, a tisin o Saimon Pita. 41 A mugano utna ra o Endru i pami, i sio pas o Saimon a tisinolik, ra i inanosi lena, “Met sa sio pas a Mesaia!” (a kukuraino a Karisito).
42  +O Endru i ben pas o Saimon torom o Iesu. O Iesu i tama i, ra i watungi tano lena, “Ui o Saimon, a nutun o Jon, din watung ui nam o Kepas.” (Una wasiso Grik di watungi nam o Pita, a kukuraino a wat.)
O Iesu i kabo pas o Pilip ma o Natanael
43 Ara bung palu melet, o Iesu i nem na wan utong o Galili. I sio pas o Pilip, ra i watungi tano lena, “Un mur iau.” 44 O Pilip, tagitong o Betsaida, a tamon anun o Endru ma o Pita. 45  +O Pilip i sio pas o Natanael, ra i inanosi lena, “Met sa sio pas a musano ra o Moses i tumtumus mugu taru uni una Buk na Warkurai, ma a kum poropet kai det sa tumtumus mugu taru uni. I ra, o Iesu a te Nasaret, a nutun o Josep.” 46 Ikut o Natanael i balu i lena, “O Nasaret! Pepetlai, tu wakak na utna ut in nanpat tagitiro iai?” O Pilip i balu i lena, “Un nan urin ma dar in nan sur un tama i.”
47 O Iesu i tama pas o Natanael i wan nanan toromi, ra i watungi lena, “A te Israel mulus ut ri, ke tasman a torotoro.” 48 O Natanael i ting o Iesu lena, “U tasman lan iau?” I balu i lena, “Ra o Pilip ke kabo pas ui utmakai, a sa tama mugu tar ui ra u kis taru nago utuntudu in nanai na fig.” 49  +O Natanael i watungi tano lena, “Tene Ususer, ui a Nutun o God, ui a King anun a taro Israel.” 50 O Iesu i watungi tano lena, “Pepetlai u nurnur un iau, uni a inanos ui lena u kis taru nago utuntudu in nanai na fig? Numur un tama a kum lamlabino utna sakit in nanpat, in labo taun a utna ri u tama i.” 51  +O Iesu i watung meleti lena, “A inanos mot nama lingmulus, mot in tama a langit in papos, ma a kum ensel anun o God det in nanan toto ma det in nanan pirso torom a Nutun a Musano.”
+ 1:1 Jn 17:5; 1 Jon 1:1-2; Tam 19:13 + 1:3 1 Kor 8:6; Kol 1:16-17; Ibr 1:2 + 1:4 Jn 5:26 + 1:5 Jn 3:19 + 1:6 Mt 3:1; Lk 1:13-17, 76 + 1:9 Jn 8:12 + 1:13 Jn 3:3-6; Pil 2:7; Jn 2:11; 1 Pit 1:23 + 1:17 Kis 34:28; Rom 6:14 + 1:18 Kis 33:20; Jn 6:46; 1 Tim 6:16 * 1:19 A taro tagun a kabotaro Liwai det ser papam una rumu na etabor. + 1:21 Lo 18:15, 18; Mt 11:14 + 1:27 Jn 1:15 + 1:29 Ais 53:6-7; 1 Pit 1:18-19 + 1:30 Jn 1:15 + 1:32-33 Mt 3:16 + 1:34 Mt 3:17 + 1:36 Jn 1:29 + 1:40 Mt 4:18-20 1:41 Mesaia, a du wasiso Ibru, ma una wasiso Grik, di watungi nama Karisito. O Iesu i a Mesaia, a musano ra o God i pilok pasi sur in ulaun a taro. A kum poropet tagun numugu det wasiso na poropet uni, lena in nanpat, ra a taro Juda det kis langlang suri. + 1:42 Mt 16:18 1:42 O Jon ra a taman o Pita, awu sur o Jon a Tene Baptaiso. + 1:45 Lo 18:18; Ais 7:14; 9:6; Jer 23:5; Ese 34:23 + 1:49 Mt 14:33; 16:16; Mk 3:11 + 1:51 Stat 28:12