16
O Iesu i katutur melet gusun a minat
(Mt 28:1-8; Lk 24:1-12; Jn 20:1-10)
Ra a Bung na Sabat i sa rop, o Maria Magdalen, ma o Salomi ma o Maria o nan o Jems, detul kul pas a kum utna ra i sangsangnain sur detul in mar a minatin o Iesu nami. Ra in nusuan i wanpat una kobot raut una mugano bung una wik, detul wan sur a kulam na minat. Ra detul wan nanan, detul ting etalai detul, “Osi mo in warut datul sur in bulus gisen ru a wat gusun a matansako na kulam na minat?” Ikut ra detul tamtama tokodos usa, detul tama i ra di sa bulus gisen ru a labino wat ra. Ra detul ruk una kulam, detul tama ara barman, i kis taru una papor sot na lamandetul, i emar pas namin kabang na malu. Ra detul tama pasi, detul kisin ma detul ngara.
A musano ra i watungi lena, “Gong motul ngara. A tasmani lena, motul sisio sur o Iesu a te Nasaret, i ra di sak wat tari unin nanai kutus. I sa katutur melet, ma ke kis mo nin. Motul in tama a nubual ra di inep tari uni. +Motul nan, ma motul in inanos anun a kum nat na ususer ma o Pita kai lena, ‘O Iesu in mugu utong o Galili. Mot in tama i tong, elar nami ra i sa inanos mugu tar mot.’ ”
Detul kisin ma detul neneder, ra detul kalabor gusun a kulam na minat. Ma ka detul inanos taio nam tu wasiso, uni detul ngara doko.*
O Iesu i wanpat torom o Maria Magdalen ma aru nat na ususer kai
(Mt 28:9-10; Lk 24:13-35; Jn 20:11-18)
[ O Iesu i katutur melet gusun a minat una kobot raut una mugano bung una wik. Ra i wanpat mugu torom o Maria Magdalen, i ra numugu o Iesu i lakro ru tar a wonom mawit na laulau na nion gusuni. 10 O Maria Magdalen i wan ra i inanos det ra det ser mur o Iesu, ra kura det tupunuk ma det tangtangis suri. 11 Ra det longoro i lena, o Iesu i sa laun melet gusun a minat ma o Maria i sa tama tari, ka det nurnur uni.
12 Numur o Iesu i wanpat torom aru nat na ususer ra der wan nanan una kisapi, ma a pinino i tamtama senene. 13 Der milet melet, ra der inanos a kum nat na ususer rop. Ikut, ka det nurnur kai un der.
O Iesu i wanpat torom a noino ma ra nat na ususer
(Mt 28:16-20; Lk 24:36-49; Jn 20:19-23; Ap 1:6-8)
14  +Numur i wanpat torom a noino ma ra nat na ususer ra det kis na inangon. Ra i bor det, uni a balandet i dekdek ma ka det nurnur un det ra det sa tama tari ra i sa laun melet. 15  +Ma i watungi tandet lena, “Mot in nan una rakrakon bual rop, ma mot in warawai nama Wakak na Wasiso torom a taro rop. 16  +Osi ra i nurnur ma di baptaiso i, din ulauni. Ikut i ra ke nurnur, din pitar a dekdek na warkurai na minabalu toromi. 17  +A kum tene nurnur det in pam a kum utna na ukisin ri: Det in lakro ru a kum laulau na nion nama risang, ma det in wasiso nama kum matok na ngas na wasiso, 18  +det in pam a kum sui ra i ser karot doko a taro, ikut ken ban laulau det, ma ra det in inum a sangsagor, ken ban laulau det, ma det in ubek a kum lamandet una kum misait, ra det in langolango.”
O Iesu i wan usapat una langit
(Lk 24:50-53; Ap 1:9-11)
19  +Ra a Labino o Iesu i sa wasiso taru tandet, o God i ben toto pasi usapat una langit, ma o Iesu i kis una papor sot na laman o God. 20  +Anun a kum nat na ususer det wan, ma det warawai tuptupukus. Ma a Labino i papam tomo nam det, ma i ulingmulus anun a wasiso nama kum utna na ukisin.]
+ 16:7 Mt 26:32; Mk 14:28 * 16:8 Una ramano kum du buk una wasiso Grik, katu vers 9-20. + 16:14 1 Kor 15:5 + 16:15 Ap 1:8 + 16:16 Ap 2:38 + 16:17 Ap 2:4; 8:7 + 16:18 Lk 10:19; Ap 28:3-6 + 16:19 Ap 1:9-11; 2:33-34 + 16:20 Ap 14:3; Ibr 2:3-4