15
O Iesu i tur umatan o Pailat
(Mt 27:1-2, 11-14; Lk 23:1-5; Jn 18:28-32)
+Una kobot raut, a kum lamlabino tene etabor torom o God, a kum mugumugu, ma a kum tene ususer tagun a Warkurai ma a taro na kiwung rop, det wasiso tomo pas. Det ker pas aru laman o Iesu, det beni, ra det pitari ulaman o Pailat. O Pailat i tingi lena, “Ui a king anun a taro Juda?” Ra o Iesu i balu i lena, “I ut ra u sa watung tari.” A kum lamlabino tene etabor torom o God det takun o Iesu una susut na utna. O Pailat i ting melet o Iesu lena, “I lai, katu minabalu anumi? Tama i, a susut na utna ri det takun ui nami.” +Ikut, o Iesu ke balu i nam tu wasiso, ra o Pailat i kisin doko uni.
Det mulaot ru o Iesu sur in mat
(Mt 27:15-26; Lk 23:13-25; Jn 18:39–19:16)
Una kum kilalo rop una kum lamlabino bung na lotu na Wanlakai, o Pailat i ser palos ru ara karabus ra a taro det sasaring suri. Una kilalo ra, ara musano a risano o Barabas i kis una karabus. I ara tagun det ra det waim nama gapman. Det ukatutur a inaim, ra det ser um doko a taro. Ra a kunur na taro det wanpat torom o Pailat, ma det saringi sur in palos melet ru tu karabus. Ra o Pailat i ting det lena, “Mot nemi sur an palos ru a ‘king anun a taro Juda’ torom mot?” 10 I watungi lenri uni i sa tasmani lena, a kum lamlabino tene etabor torom o God det pitar tar o Iesu toromi una sakino nuknukin det. 11  +Ikut a kum lamlabino tene etabor torom o God det ukatutur a balan a kunur na taro sur det in saring o Pailat, sur in palos ru o Barabas torom det. 12 O Pailat i ting det lena, “Asau ra an pami un o naro ra mot watungi nama king anun a taro Juda?” 13 Ra det kukukuk kut lena, “Sak wati unin nanai kutus!” 14 O Pailat i ting det lena, “Sur asau? Asi na sakino utna ra i sa pam tari?” Ikut det kukukuk dekdek lena, “Sak wati unin nanai kutus!” 15 O Pailat i nemi sur in ugasgas a taro, ra i palos ru o Barabas torom det. Ra di sa takalo tatar o Iesu, o Pailat i pitar tari tan a kum tene inaim sur det in sak wati unin nanai kutus.
A kum tene inaim det urongon un o Iesu
(Mt 27:27-31; Jn 19:2-3)
16 A kum tene inaim det dat pas o Iesu utiro urumu una labino rumu anun anundet a mugumugu, ra det kabo tomo pas a kum tene inaim rop. 17 Det mar tari namin pepol na malu, det liko pas in narus a loklokono, ma det ubek tari unin lorino elar nama kukup anun a king.* 18 Det kakabo toromi lena, “Ui a king anun a taro Juda!” 19 Det raprapus in lorino namin nubuku, det ibisi, det kis butkeke nisano, ma det urur toromi. 20 Ra det sa urongon laulau papas uni, det palos ru in pepol na malu gusuni. Det mar tari melet nama nun a kum malu, ma det ben pirso i sur din sak wati unin nanai kutus.
Di sak wat o Iesu unin nanai kutus
(Mt 27:32-44; Lk 23:26-43; Jn 19:17-27)
21  +Tiro una kisapi a kum tene inaim det ling sur det in nan sakit ara te Sairini, a risano o Saimon, a taman o Aleksanda mo Rupus, i wan tagitong un ara tamon sur in nan usapat o Jerusalem. Det ungongos tari sur in los in nanai kutus anun o Iesu. 22 Det ben o Iesu sur a nubual ra di watungi nam o Golgota, a kukuraino a “Nubual na Lor na Minat.” 23 Det pitar tar a wain tano ra di sa pam tomo tari nama mira, ikut ke nemi sur in inumi. 24  +Det sak wat tari unin nanai kutus, ra det pilai laki sur det in isuaro anun a kum malu sur osi tagun det in los tin namalu. 25 Ra i lisu na pakano bung una kobot, det sak wati unin nanai kutus. 26 Det tumus tar a wasiso na etakun uni, sapat netes unin nanai kutus lena,
“A KING ANUN A TARO JUDA.”
27-28 Det sak wat tari kai, aru tene wolong tomo nami una arin nanai kutus, ara una papor sot, ma ara kai una kair. 29  +Det ra det wanan sakit o Iesu, det watung laulau i ma det lele lorindet toromi. Ma det watungi lena, “Ui mo ra u watungi lena, un rege ru a rumu na etabor, ma un pam melet pasi una tulu bung kut, 30 uniri un ulaun pas ui mo, ma un pirso gusun in nanai kutus.” 31 A kum lamlabino tene etabor torom o God ma a kum tene ususer tagun a Warkurai det kai det urongon laulau un o Iesu, det wasiso etalai torom det lena, “I ulaun pas a taro gisen, ikut ken ulaun lar pasi ut. 32 Ra i a Karisito, a King anun a taro Israel, uniutri in pirso gusun in nanai kutus, sur dat in tama i, ma dat in nurnur uni.” Ma der ra der kete tomo nami, der kai, der watung laulau i.
O Iesu i mat
(Mt 27:45-56; Lk 23:44-49; Jn 19:28-30)
33 Ra i noino ma aru pakano bung una suan, a bual rop i dumirum tuk una tulu pakano bung una lirop. 34 Ra i tulu pakano bung, o Iesu i kukukuk dekdek lena, “Eloi, Eloi, lema sabakatani?” A kukurai ina wasiso ra i lenri, “Anung a God, anung a God, ilai ra u wan gusun iau?” Sng 22:1
35 Ara taro tagun det ra det tur milau, det longoro i, ra det watungi lena, “Tama i, i kakabo sur o Elaija.” 36  +Ara tagun det i kalabor ra i los pas ara utna ra i ser dop a polo. I puk pasi una wain ra i mititir, i ubek pasi unin nanai ra i tulsu toto i usapat sur o Iesu in inumi. Ma i inanos det lena, “Te, dat in madek tari munung. Dat in tama i ra o Elaija in nan pirso sur in los pirso pasi, o awu.” 37 O Iesu i kukuk dekdek pas, ra i mat.
38 Ra in namalu ra di mabat kutus nami sa urumu una rumu na etabor i tararos potor, turpasi tagisapat netes tuk unago piso. 39 A mugumugu anun a kum tene inaim ra i tur taru nisan in nanai kutus, i longoro o Iesu ra i kukuk ma i tama a ngas na minat ra i wanpat uni, i watungi lena, “I lingmulus ut, a musano ri a Nutun o God.”
40  +A ramano wardain kai det tur bakbak taru ut, ma det tama a kum utna ri. Kura epotor tandet, a tulu ino kai ri, o Maria Magdalen, ma o Salomi ma o Maria kai a nan o Joses ma o Jems ra a barman. 41 Detul ri, detul ser mur o Iesu ra i kis sa o Galili, ma detul ser waruti. Ma a susut na wardain, ra det wan tomo nami usapat o Jerusalem, kura det kai iai.
Di inep a minatin o Iesu una kulam na minat
(Mt 27:57-61; Lk 23:50-56; Jn 19:38-42)
42-43 Ara musano a te Arimatia, a risano o Josep. I ara tagun a taro na kiwung, a labino musano ra a taro det ser ru i, ma i ser kis langlang sur a matanitu anun o God. Ra i sa lirop una bung na waninar, a bung numugu tan a Bung na Sabat, i wan torom o Pailat, ke ngara, ra i saring pas a minatin o Iesu tano. 44 Ra o Pailat i kisin ra i longoro i lena o Iesu i sa mat. I kabo pas a mugumugu anun a kum tene inaim, ra i tingi lena, “Pepetlai, o Iesu i sa mat?” 45 Ra i sa mananos pas tan a mugumugu ri, i mulaot ru a minatin o Iesu torom o Josep. 46 Ra o Josep i kul pas in wakak na malu, i los pirso pas a minatin o Iesu, ra i pulus pasi namin namalu ra. Numur i inep tari una kulam na minat ra di sa kil tari una papor wat, ra i bulus bat tar a matansako na kulam ra nama labino wat. 47 O Maria Magdalen ma o Maria, o nan o Joses, der tama tar a nubual ra di inep o Iesu uni.
+ 15:1 Lk 22:66 + 15:5 Ais 53:7; Mk 14:61 + 15:11 Ap 3:13-14 * 15:17 In pepol na malu ma a kukup der tamtama elar nama ememar anun a king. + 15:21 Rom 16:13 + 15:24 Sng 22:18 15:27-28 Una ramano kum du buk una wasiso Grik, a ramano kum wasiso kai i kis una vers ri. I lenri: Di pami lenri sur din pam sot pas a wasiso uni una Buk Tabu ra i lenri, “Di luk tomo pasi nama kum tene sakino.”. + 15:29 Sng 22:7; 109:25; Mk 14:58 + 15:36 Sng 69:21 + 15:40 Lk 8:2-3