16
“A watung a kum utna ri tamot, sur gong anumot a nurnur i puku. +Det in turbat mot gusun a kum rumu na lotu. Numur a du bung in nanpat, ra a taro ra det um doko mot, det in nuki lena det pami ut a pinapam anun o God. +A taro det in pam a kum utna ri torom mot, uni ka det tasman mir nam o Tita. A sa watung tar a kum wasiso ri tamot, sur ra a du bung ra in nanpat, mot in tasmani lena a sa utumarong mugu tar mot uni.
A pinapam anun a Tokodos na Nion
“Ka watung a kum wasiso ri tamot una turturkibin ina nung a pinapam, uni a kis utmakai tomo nam mot. Ikut uniri, an nan torom o naro ra i tulu ru iau urin. Ikut kataio tagun mot i ting iau lena, ‘Un nan urai?’ Mot tupunuk doko uni a watung a kum wasiso ri torom mot. +A inanos mot nama lingmulus lena, in wakak torom mot ra an nan. Gunuk ra kan nan, a Tene Warut ken nanpat torom mot. Ikut ra an nan, an tulu ru i urin torom mot.
“Ra in nanpat, in ese a taro una rakrakon bual una nundet a sakino petutna, ma in ese det kai una tokodos na petutna ma una warkurai anun o God. In ese det lena, ra ka det in nurnur un iau, i ra anundet a sakino petutna. 10 Ma in ese det kai una tokodos na petutna, uni an nan torom o Tita ma ka mot in tama melet iau mo. 11  +Ma in ese det kai lena o God i sa pitar tar a warkurai na minabalu tan a labino tagun a rakrakon bual, ma i sa upuku ru tari.
12  +“A susut na wasiso ra an watungi tamot, ikut ke topas mot utmakai. 13 A Tokodos na Nion, ra i ser upuaso a lingmulusino, in nanpat, ma in utalapor mot una kum lingmulusino rop un o God. A kum wasiso ra in watungi awu sur anunu, in watungi kut a kum wasiso ra i longoro i, ma in inanos mot una kum utna ra in nanpat numur. 14 In pitar a minamar torom iau, ra in los pas anung a wasiso, ma in inanos mot nami. 15 A kum utna rop ra anun o Tita, anungi. I ra a kibino ra a watungi lena, a Tokodos na Nion in los pas anung a wasiso ma in inanos mot nami.
A tupunuk ma a gasgas
16  +“Ken suano i kut, ra ka mot in tama melet iau mo. Ma ken suano i kut, mot in tama melet iau.” 17 Anun a ramano kum nat na ususer det ting etetalai det lena, “Asau a kukurai ina nun a wasiso ri ra i watungi lena, ken suano i kut ra ka dat in tama meleti mo, ma ken suano i kut ra dat in tama meleti? Ma i watungi kai lena, ‘Uni an nan torom o Tita’. 18 Asau a kukuraino ra i watungi lena, ‘ken suano i’? Ka dat tasman a utna ri i wasiso uni!”
19 O Iesu i tasmani lena det nem na tingi, ra i watungi torom det lena, “A watungi lena, ‘Ken suano i kut ra ka mot in tama iau mo, ma ken suano meleti kut mot in tama melet iau.’ Iri a wasiso ra mot ting etetalai mot uni, niko? 20 A inanos mot nama lingmulus, mot in tupunuk ma mot in tangis, ikut a rakrakon bual in gas. Mot in tupunuk, ikut numur anumot a tupunuk in tupukus sur a gasgas, 21 elar nama ino ra i milau sur in usus, in taramo a ngunungut, ikut, ra i sa usus pas, in dumano a ngunungut ma in gas. In gas uni i sa usus tar a nat urin una rakrakon bual. 22 Lenkutkai ra torom mot, uniri mot tupunuk, ikut an tama melet mot, ra mot in gas. A ngas na gas ri, kataio in pet lar pasi sur in rakon ru i gusun mot.
23  +“Una bung ra, ka mot in ting melet iau mo un tu utna. A inanos mot nama lingmulus, o Tita in tabor mot nama sau ra mot sasaring suri nama risang. 24 Tuk uniri, ka mot sasaring utmakai sur tu utna nama risang. Mot in sasaring ra din tabor mot, sur a gasgas in bukus una numot a nilaun.
O Iesu i winim pas a rakrakon bual
25 “A watung a kum utna ri tamot una kum wasiso elelar, ikut a du bung in nanpat ra kan wasiso melet mo torom mot nama wasiso elelar, an inanos talapor mulus mot mo un o Tita. 26 Una kum bung ra, mot in sasaring nama risang. Ka watungi lena iau an saring o Tita sur in warut mot, 27  +uni o Tita ut i nem mot. I nem mot uni mot nem iau, ma mot nurnur lena a wan tagisapat tan o God. 28 A wan tagisapat tan o Tita, ra a wan urin una rakrakon bual. Uniri, an nan mo gusun a rakrakon bual, ma an milet melet torom o Tita.”
29 Anun a kum nat na ususer det watungi tano lena, “Uniri ko wasiso mo nama wasiso elelar, u wasiso talapor mulus maragom. 30 Uniri met tasmani lena u tasman a kum utna rop. Ko sibo sur taio in ting ui nam tu iting, uni u sa tasman a nuknuki met rop. I mo ra met nurnur maragom lena u wan ut tagisapat tan o God.” 31 O Iesu i watungi tandet lena, “I lai, mot nurnur maragom? 32  +A du bung in nanpat, ma iri i sa wanpat, ra din lu susuaro ru mot gusun iau, ra mot in nan susuaro sur anumot a kum tamon taktakai, ra iau mukut an kis. Ikut awu sur iau kut ra an kis, mir ut nam o Tita.
33  +“A watung a kum wasiso ri tamot sur mot in laun un iau, ma a balamot in bukus nama malmal. Nin una rakrakon bual, mot in taramo a mamaut. Ikut gong mot ngara, uni a sa winim pas a rakrakon bual.”
+ 16:2 Mt 24:9; Lk 6:22; Jn 9:22 + 16:3 Jn 15:21 + 16:7 Jn 14:16 + 16:11 Jn 12:31 + 16:12 1 Kor 3:1-2 + 16:16 Jn 14:19 + 16:23 Mt 7:7 + 16:27 Jn 14:21, 23 + 16:32 Mt 26:31, 56 + 16:33 Jn 14:27; Rom 5:1; 1 Jon 5:4