20
Pauloꞌa Makedonia zu Giriki habaꞌa onamiro
1 Efeso neḡano harae ḡunuḡuniroteꞌeꞌa hauḡirotene, Paulo ani Zuhiꞌa Boro tahiꞌa tahiꞌa huze nuꞌozadu, inara ḡoeꞌa ziro, ebu “Eꞌe radihi!” radu, Makedonia habaꞌa onamiro.
2 Ani eꞌe habaꞌano onameꞌenaꞌa, Zuhiꞌa Boro mone azaḡa inara ḡoeꞌa ḡehaḡa ziniro. Eꞌebuꞌu Giriki habaꞌano feuriro.
3 Eꞌea feurirotene, bato uḡidu radiro. Eꞌe enogano Suria habaꞌa ḡasi hina onamihi reirotene, Iuda azaḡaniꞌa Paulo matihi radu neneḡaniꞌeteꞌe igiro ꞌahine, ani zamaradu, “Makedonia mone onamadu bariꞌuma.” rae reiro.
4 U ane teite onameꞌetaꞌaꞌe, Berea neḡa vazeḡa, niḡa Sapatero, aniꞌe Puro ubuga, ebu Tesalonika neḡa azaḡaꞌe nize Aristako zu Sekundo, ebu Derebe neḡa vazeḡaꞌe niḡa Gaio, ebuni Timoteo, ebu Asia habaꞌa azaḡaꞌe nize Tukiko zu Torofimo.
5 Zeꞌe ibite iḡunadu, Toroa neḡano guhifiro.
6 U emeꞌe Beredi Mene Menoga Auꞌeteꞌe Muiḡa haḡairoteꞌe enogano, Filipi neḡanonoꞌo ḡasio ruhau onamiro, ebu mada fuꞌo (5) ruhau onamadu, Toroa neḡano guhifeꞌeteꞌe azaḡa teite ꞌauḡiro, ebu eꞌea mada fuꞌo zu aheu fare (7) radiro.
7 Satadei ḡorava uḡano, eme Zuhiꞌa Boro zamareꞌeteꞌe ogomuḡa au tiburanoga veize nuꞌoraro. Eꞌe zamaḡano Pauloꞌa harame onamoo, ohere nemanema reiro. Mazaḡa irarine, muhize iḡuniꞌuma ꞌahine.
8 Eme hitaga neḡano nuꞌoru radiro. Eꞌe zamaḡanoꞌe ihure ḡehaḡa agane tiro.
9 U ohoze tahiꞌaḡa ꞌahoga, niḡa Iutikoꞌa marama rana ehore radiunu. Pauloꞌa harame ꞌauꞌaune onamirotene, ani baze rudaro. Baze rudaroteꞌe zamaḡano, ane huga ne hitaga uḡiduḡanonoꞌo uitadu, rahao buaꞌ ovoiro, ebu zeḡeꞌa mae ḡihinirotene, rudanoga horoniro.
10 Rehano Pauloꞌa ovoradu ane rana ḡuḡuriro, ebu afunadu ꞌahige reiro. “Ago zamaroꞌi! Ani ḡaboga!”
11 Ebu Paulo ani hitaga neḡa bare itadu, Zuhiꞌa Boro zamareꞌeteꞌe berediḡa zeḡe teite au tiburaro, ebu ḡoere onamo, irarirotene, iḡuniro.
12 Nuꞌonuꞌo azaḡaꞌe ohoze tahiꞌaḡa ḡabodateꞌe zamahu onamiro, ebu matuꞌu boro haḡairo.
Pauloꞌa Toroa neḡanonoꞌo Mileto neḡa onamiro
13 Paulo ani Aso neḡa uꞌa gabao onamiro. U emeꞌe aniꞌa efadu, ḡasi hina ibite eꞌe neḡa onamiro, ebu eme ani eꞌeabuꞌu ḡasio mae ufiꞌuma reiro.
14 Ebu Pauloꞌa Aso neḡano emeḡe teite ꞌauḡirotene, ḡasio ofadu, Mitulene neḡa ruhau onamiro.
15 Eꞌeanoꞌo bare ruhau onamo, irarirotene, Kiosi ꞌumuḡa uhiḡano vitaro. Ebu ruhau onamo, moḡa madaḡano Samosi ꞌumuḡano feuriro. Ebu eꞌe moḡanobuꞌu Mileto neḡano feuriro.
16 ꞌOuge ruhau onamirotaꞌaꞌe, Pauloꞌe Asia habaꞌano madaꞌa hauḡoga mene uratadu, Efeso neḡaꞌe ruhau vitiniꞌuma reiro. Ani uraꞌe, Pentekosi madaḡa ꞌizema mougano, Ierusalema neḡano feuroga radu ḡarihe ḡarihiro.
17 Rehano Mileto neḡano feurirotene, Pauloꞌa Efeso ekalesia vaze boroboro veize ḡoere tuḡuriro, ane vaḡe onaoga raduni.
18 Ze onairotene, Pauloꞌa ḡoreziro, raenaꞌa, “Zae huga edeḡa, eḡeꞌa Asia habaꞌa diuḡiroteꞌe madaḡa ḡadaheḡanonoꞌo onao izidi, mada niduꞌa, zae teite nouge nouge radiunutaꞌaꞌe.
19 E Zuhiꞌa Boro tuḡure haḡaidoteꞌe zamaḡano, vaḡuteꞌenaꞌa zu nihe vuḡa soneꞌenaꞌa gauido. Zu Iuda azaḡa nuꞌa uḡuhihi radu, eḡe mazao haḡai sauꞌa sauꞌa haḡaido rehano, rinede gauido.
20 Ebu danaziꞌuma ḡoeꞌa niduꞌa rae furenido, zu hunio ga ane ane neo ihoze ragavido.
21 Ebu Iuda azaḡa zu Iuda mene azaḡa mazao hari tiba hina daꞌo harame hunido, raenaꞌa, 'Haḡai sauꞌa modadu Badiꞌa vaḡe onamoꞌi, ebu Zuhiꞌa Boro Iesu mazao fioꞌi!'
22 Ebu ḡianoꞌi! Vine Zaḡoḡaniꞌa tuḡutuḡuhadu, Ierusalema neḡa onameꞌohe. Rehano e aḡuꞌa, deꞌea naginiꞌa eḡe mazao fureraꞌuma.
23 Eḡeꞌa ragaveꞌeteꞌe neḡaneḡano Vine Zaḡoḡaniꞌa dehene ihiꞌetaꞌaꞌe, 'Eꞌe ḡuꞌano ohohiꞌuma, ebu aduga hidiꞌuma.'
24 Eꞌe ꞌouge ḡabonehe modine zuni idaḡa rehano, Zuhiꞌa Boro Iesuꞌa iniroteꞌe ibiḡa oname hauḡine, zu gauḡa haḡae hauḡine manoḡa. Aꞌe Badiꞌaꞌa manoḡa vaze ḡahuno ziniꞌuma hariḡa manoḡa rae fureneꞌeteꞌe.
25 E zae boꞌaḡano Badiꞌaꞌa vaze zuhiꞌaziꞌuma hariḡa harame ragavido. Ḡianoꞌi! Izidi e edeḡa, zae niduꞌa irahe mene bare horoniꞌuma.
26 Eꞌanoꞌo eḡeꞌa izidi ꞌada rae fureneꞌohe. Zaeꞌa ḡabone ibiḡa daunine zuni, e mene debahiꞌuma,
27 mazaḡa Badiꞌaꞌa zaeꞌa haḡaoga urateꞌeteꞌe ḡoeꞌa niduꞌa rae fureno ziniro.
28 Eꞌanoꞌo ḡae ḡaeꞌa ḡae bare duguꞌeꞌenoꞌi, zu ekalesia azaḡa niduꞌa duguzeꞌenoꞌi! Zeꞌe Vine Zaḡoḡaniꞌa ꞌevorezeo tiro, zaeꞌa ḡiazeꞌenoga radu. Ebu mamoe narineꞌeteꞌe teige, Badiꞌa ekalesia azaḡa narizoꞌi! Zeꞌe Badiꞌaꞌa ubuga ru hina meiroteꞌe azaḡa.
29 E edeḡa eḡeꞌa muhiziteꞌe enogano, ḡuriro haramo vazeḡa ꞌahoga ꞌahoganiꞌa agire ḡuniḡa teige zae boꞌaḡano diuḡiꞌuma, ebu ḡaboneze manoḡa sausaune huniꞌuma.
30 Zuni zae boꞌaḡanonoꞌo vaze nuꞌa iḡunadu, huga ḡoeꞌa veꞌone ihoziꞌuma, ebu Zuhiꞌa Boro tahiꞌa tahiꞌa zamaze aꞌuma, zeḡe hegotoga veize.
31 Eꞌanoꞌo duguꞌeꞌenoꞌi! Eḡeꞌa muri uḡidu zamaḡano madai zu ohere niduꞌa nihe vuḡa soneꞌenaꞌa, zae zae ihozidoteꞌe zamareꞌenoꞌi!
32 E izidi zaꞌe Badiꞌa ꞌevorao tiꞌohe, zu Badiꞌa ḡahunone manoḡa ḡoeꞌa zae mazao modeꞌohe, danazoga veize. Ebu eꞌe ḡoeꞌaniꞌa ibito ziniꞌuma, ebu zaꞌe Badiꞌaꞌa inahe meiroteꞌe azaḡa niduꞌa teite ḡahugoneḡa manoḡa meꞌuma.
33 E, zae teite radiunuteꞌe madaḡano, monize zu dabuaze veize mene kanaudo.
34 Zae huga edeḡa, e ꞌevorehe aheu ꞌadi hina gauadu, eḡe zu eḡe teite rauꞌeteꞌe azaḡa veize naginiꞌa ferefeꞌeteꞌe hoitido.
35 Ebu ḡabonehe niduꞌa zamaḡano, inare gauadu ḡauꞌa ferezeꞌeteꞌe azaḡa danazido, zaeꞌa ḡiane imanoga. Zu Zuhiꞌa Boro Iesu Ane Huganiꞌa ꞌahige reiro, 'Ḡau vaze mazao ḡahugeꞌeteꞌe haḡaiḡaꞌe vaze mazaonoꞌo maꞌeteꞌe haḡaiḡa vitinoga. Ḡahugeꞌeteꞌe vazeḡaꞌe Badiꞌaꞌa manoḡa boro haꞌuma.' Za eꞌe ḡoeꞌa zamareꞌenoꞌi!”
36 Paulo ani ḡoere hauḡirotene, obenaḡa hina tuḡadu zeḡe niduꞌa teite Badiꞌa mazao kuraro.
37-38 Ebu ze niduꞌa nianadu, ꞌunuḡano ahainiꞌenaꞌa furaꞌiniro. Ze zamaze are rudaro, mazaḡa Pauloꞌa zinaꞌa, “Zaꞌe irahe mene bare horoniꞌuma.” reiro ꞌahine. Ebu Paulo ḡatine ḡasio ohoniꞌ onamiro.