21
Pauloꞌa Ierusalema neḡa onamiro
1 Eme, Efeso ekalesia boroboro teite uhiu hauḡirotene, ḡasio tiradu Koso ꞌumuḡa roḡoroḡe onamiro. Ebu baze irarirotene, Rodo ꞌumuḡa ruhau onamiro, ebu hena Asia habaꞌano Patara neḡa ruhau onamiro.
2 Ebu eꞌea, Foinike habaꞌa onamiꞌuma ḡasiḡa horonirotene, eꞌe ḡasiḡano tiradu iḡuniro.
3 Ebu onamo Kupro ꞌumuḡa haninirotene, edaꞌe moneonoꞌo ruhau vitanadu, Suria habaꞌa uꞌa ruhau onamiro. Ebu Turo neḡano hebetiro, mazaḡa ḡasiꞌe eꞌea tohe ruruniꞌuma ꞌahine.
4 U eme Zuhiꞌa Boro tahiꞌa tahiꞌa vaḡadu, fura tiba zeḡe teite radiro. Ebu eꞌe azaḡa, Vine Zaḡoḡaniꞌa ihozadu, Paulo bare bare garariro, raenaꞌa, “Ierusalema neḡa ago itoꞌi!”
5 Rehano iḡuniꞌuma madaḡa meirotene, bare ꞌaune onamiro. Eꞌanoꞌo Zuhiꞌa Boro tahiꞌa tahiꞌaꞌe inudeze zu enezeta, ḡatife ne ḡutuꞌaḡano tuḡufiꞌ ovoiro. Ebu eꞌea emeḡe niduꞌa hesao obenafe hina tuḡadu kuraro.
6 Eme zeḡe teite uhiu hauḡirotene, ḡasio tiriro. U zeꞌe bare ne onamiro.
7 Eme Turo neḡanonoꞌo ꞌaune ruhau onamo, Tolemaia neḡano hebetiro. Aꞌe emeḡe ruhu ḡonaga. Ebu eꞌea Zuhiꞌa Boro mone azaḡa teite matuꞌotite ḡoeradu mada tiba zeḡe teite radiro.
8 Irarirotene, eme odao onamo, Kaisarea neḡano feuriro. Ebu hari manoḡa harameꞌeteꞌe vazeḡa ꞌahoga, niḡa Firifo neo radiꞌ onamiro. Aniꞌe Ierusalema ekalesia azaḡaniꞌa vaze fuꞌo zu aheu fare (7) inahe meiroteꞌe vazeḡa ꞌahoga.
9 Ani aboḡa nogobaḡa ḡazaḡa (4). Ze Badiꞌaꞌa ḡoere zenadu rae furenido.
10 Eme Kaisarea neḡano mada ḡehaḡa ꞌai radirotene, Iuda habaꞌanonoꞌo peroveta vazeḡa ꞌahoga niḡa Agaboꞌa feuriꞌ ovairo.
11 Ani emeḡe vaḡe onaadu, Paulo kibaꞌi ga bereta meiro, ebu eꞌe hina aneꞌa bare ꞌevoꞌa zu odaḡa ogoranadu, ꞌahige reiro. “Vine Zaḡoḡaniꞌa ꞌahige raꞌohe. 'Kibaꞌi ꞌadi vazeḡaꞌe, Iuda azaḡa Ierusalema neḡano radiuꞌeteꞌeꞌa ꞌahige ogoru tiꞌuma, ebu Iuda mene azaḡa ꞌevorao riꞌiniꞌuma.' ”
12 Eꞌe igirotene, eme, Paulo teite raudoteꞌe azaḡa zu eꞌea radiroteꞌe azaḡaniꞌa “Ierusalema neḡa ago itoꞌi!” rae Paulo uminiro.
13 Rehano Pauloꞌa raenaꞌa, “Za nougadu niauꞌenaꞌa, e zama zoreneꞌohe? Zuhiꞌa Boro Iesu niḡa uꞌano Ierusalema neḡano ḡuꞌano ohohoga idaḡa, zu rudanoga zuni idaḡa. E zamahe haneha.”
14 Eme ani gararo ḡizirotene, eꞌea modiro, rehano 'Zuhiꞌa Boro mazao modeꞌohe!' rae reiro.
15 ꞌOuge mada nu radiroteꞌe enogano eme, Paulo zu ane teite rauꞌeteꞌe azaḡa, tohefe ruhinadu, Ierusalema neḡa itiro.
16 Kaisarea neḡanonoꞌo Zuhiꞌa Boro tahiꞌa nu zu eme teite itiro, ebu Ierusalema neḡano Nasona neo radifine tutufe onamiro. Ani Kupro vazeḡa, zu amahi Zuhiꞌa Boro tahiꞌa rae onairo.
Pauloꞌa Iakobo ḡianiꞌ onamiro
17 Eme Ierusalema neḡano feuriꞌ itirotene, Zuhiꞌa Boro mone azaḡaniꞌa matuꞌeꞌenaꞌa mae ḡihifiro.
18 Irarirotene, Paulo zu emeḡe niduꞌaꞌe Iakobo ḡianiꞌ onamiro. Ierusalema ekalesia azaḡa boroboro niduꞌa zuni eꞌea.
19 Paulo ani zeḡe teite hide ḡoretite hauḡiroteꞌe enogano, ane gau zamaḡano Badiꞌaꞌa Iuda mene azaḡa mazao haḡairoteꞌe haḡaiḡa niduꞌa fairu doḡoꞌani rae fureno ziniro.
20 Ze eꞌe igirotene, Badiꞌa niguniro. Ebu Paulo ninaꞌa, “Nego! Ḡae edeḡa, Iuda azaḡaꞌe ḡehaḡa bagaḡaniꞌa ꞌai Iesu ni mae ḡihineha, ebu zeḡe niduꞌa Mose goro ḡoeꞌa zu mae ḡihine huneꞌohe.
21 Ze hariḡo ꞌahige igiro. Iuda azaḡa nuꞌe Iuda mene azaḡa boꞌaḡano radiuꞌohe. Ḡaꞌe zeḡe mazao ꞌahige haramiro. 'Mose goro ḡoeꞌaꞌe modoꞌi! Ebu eneze guraḡa guraḡa ahiri rana iḡuri ago haḡaoꞌi! Zu Iuda azaḡa ibiꞌa haḡaiḡa niduꞌa modoꞌi!'
22 Eme nougine manoḡa? Ze ḡaꞌa onaataꞌaꞌe ederiꞌuma.
23 Eꞌanoꞌo ḡaꞌe emeḡeꞌa ḡeiteꞌe haḡaiḡa haḡaoꞌi! Emeḡe boꞌaḡano Badiꞌa ubumao ḡoere riḡa rae teadu gore modiroteꞌe ohozeḡa ḡazaḡa ꞌada.
24 ꞌAhi duḡuru Dibuꞌo Neḡa zamaze onamadu, Badiꞌa ubumao deheraꞌuma haḡaiḡa zeḡe teite haḡaoꞌi! Zu vadinize ꞌohaniteꞌe naeḡa ḡaeꞌa feino zenoꞌi! ꞌOugine, vaze niduꞌa ederiꞌuma, hariḡo igirotaꞌaꞌe mene huga, rehano ḡa Mose goro ḡoeꞌa ibiḡano onameꞌeteꞌe horoniꞌuma.
25 U Iuda mene azaḡa Iesu mazao fieꞌetaꞌaꞌe, eme, zeḡeꞌa haḡaiꞌuma haḡaiḡa soꞌao mirihadu tuḡuro ziniro, raenaꞌa, 'Ḡuriro badiꞌaḡa mazao ḡahuno hanateꞌe ogomuḡa ago anoꞌi! Zuni ꞌunuḡano harine runedateꞌe maniḡa zu ruꞌe ago anoꞌi! Ebu vaze ꞌahoga ane teite mene hahurateꞌe vazeḡa teite ibi ago veꞌonoꞌi!' ”
26 Irarirotene, Paulo ani vaze ḡazaḡa zamazadu deheraꞌuma haḡaiḡa zeḡe teite haḡairo. Ebu dibuꞌo neḡa diuḡadu, zeḡeꞌa Badiꞌa ubumao deheraꞌuma haḡaiḡa hauḡiꞌuma madaḡa, zu zeḡe tiba tiba veize naniꞌa Badiꞌa dibuꞌo hatiteꞌe rae fureniro.
Paulo obone tiro
27 Badiꞌa ubumao deheraꞌuma haḡaiḡa haḡaeꞌeteꞌe furaḡa ꞌai nariga hauḡiroteꞌe madaḡano, Iuda azaḡa Asia habaꞌanonoꞌo onairoteꞌeꞌa, Dibuꞌo Neḡano Paulo horoniro. Ze vaze ḡuḡuvaḡa niduꞌa tutuze harae iḡunadu, Paulo obone tiro.
28 Ebu ḡihau ḡoereꞌenaꞌa, “Isaraela azaḡa, danafoꞌi! Vaze ꞌadiꞌe habaꞌa habaꞌano vazevaze ihozeꞌenaꞌa ꞌahige raꞌohe. 'Isaraela azaḡa haḡaio ago onamoꞌi, zu Mose goro ḡoeꞌa modoꞌi!' Ebu Dibuꞌo Neḡa rae sausauneꞌohe. Zu emeḡe Dibuꞌo Neḡano Giriki azaḡa tutuze zouzadu, haba zaḡoḡa ꞌadi sausauneꞌohe.”
29 Ze ꞌouge reirotaꞌaꞌe, ibite Efeso vazeḡa Torofimoꞌe Paulo teite Ierusalema neḡano raunuteꞌe horoniro. Ebu ze ꞌane Dibuꞌo Neḡa zamaḡano tutune zouniro rae zamariro.
30 Ebu Ierusalema ne azaḡa niduꞌa harae ḡunuḡuniro, ebu vaze niduꞌa duduꞌohadu, Paulo obone teadu, Dibuꞌo Neḡanonoꞌo ahase buniro. Ebu ibihetaḡa niduꞌa ꞌai zogone hararo.
31 Nariga mau runeꞌeteꞌe zamaḡano, hariḡaniꞌa Roma uti vazeḡa boro mazao buaꞌ onamiro, raenaꞌa, “Ierusalema ne niduꞌa haraꞌa iriꞌaveha.”
32 Ebu ani zogone uti azaḡa ibito ziniꞌeteꞌe zu uti azaḡa zamazadu vaze ḡuḡuvaḡa uꞌa dure ovoiro. Harairoteꞌe azaḡaniꞌa uti vazeḡa boro tahiꞌaḡeta onaoga horozirotene, Paulo ꞌai mene bouniro.
33 Uti vazeḡa boroꞌa aradu Paulo obone tiro, ebu tahiꞌaḡa tuḡuzadu auri adiriḡa aheu hina batuniro. Ebu ḡadimuꞌenaꞌa, “ꞌAdi iniu? Ani nagini haḡaeha?” reiro.
34 Ebu vazevazeꞌa ḡuḡuva ḡunuḡano ane ane edeḡano ḡoere iḡuniro. Uti vazeḡa boro ani, hara boro ꞌahine, nagini uꞌano ꞌougeꞌetaꞌaꞌe ederoga mene idararo. Eꞌanoꞌo tahiꞌaḡa zinaꞌa, “Vaze ꞌadi uti azaḡa radone neḡa tutune onamoꞌi!” reiro.
35 Ze tutune onamoo, ne ḡoraꞌaḡano reirotene, vaze ḡuḡuvaḡaniꞌa naenaeonoꞌo bounihi reiro ꞌahine, ani ꞌai herate ḡihiniro.
36 Mazaḡa vaze ḡuḡuvaḡaniꞌa ani hegote haraeꞌenaꞌa, “Mau runoꞌi! Mau runoꞌi!” reiro.
Pauloꞌa vaze ḡuḡuvaḡa mazao ḡoeriro
37 Paulo ani, uti azaḡa radone neḡano nariga tutune zounihi raꞌenogano, aniꞌa uti vazeḡa boro uminiro, raenaꞌa, “E ḡoere nu ḡeine idaḡa hehe?” Ebu uti vazeḡa boroꞌa zaḡuzaḡauꞌenaꞌa, “ꞌAhi ḡa Giriki ḡoeꞌa edeḡa hehe?” rae ḡadimaro.
38 “Ḡaꞌe, Izipi vazeḡa ibite Roma gavamani teite utitihi radu, gorugoru azaḡa maḡa boro ḡazaḡa (4000) haba bohaꞌa tutuze onamiroteꞌe vazeḡa hehe?”
39 Ebu Pauloꞌa naenaeninaꞌa, “Mene, eꞌe Iuda vazeḡa. Nehe niḡa Taso, Kilikia habaꞌa zamaḡano ne boro. E vaze ḡuḡuvaḡa ꞌadi ḡorezoga rae umiꞌeꞌohe.”
40 Ebu uti vazeḡa boroꞌa ḡoeꞌa mae ḡihinirotene, Paulo ani ḡoraꞌao edanadu, vazeꞌa mene haraoga rae ꞌevoꞌa mae ḡihiniro. Ebu haraꞌa dauḡe hunirotene, Pauloꞌa Heberu ḡoeꞌano ḡoreziro.