2
Holi Spirit ende atne ungwa
Pentikos enge yongo* ana Yesus wedi pirngi dingwa yomba prapra wu makaisi dumo suwarata meglkwa. Tambre kaima kamun mitna imbo mu ta dungwa, i ir kande mangumere yeglmere mange ende atne undre, ana ye yungugl ta amedi meglmara i sikausi kondungwa. Ana ye kanigwa, endi donga drambiye mereyegl undre yumbusi ende wu perepere pi ye suwarandi meglmara bitno mina tembe bauglo ere pangwa. Ana Holi Spirit ye prapra sikausi tongo, ye mambuno bogl ka kanekane dingwa i Holi Spirit dinaglmedi ormere yomba ka di menda endingwa.
Enge igle Juda yomba tau Jerusalem meglkwa, i ye God dembiye siteingwa yomba, ye dumo bange bange meglkwa wu makai singwa. Mundungwa ikra yomba merkinde pirtre ye wu makai sindre ana kinano yei pirngi dingwa yomba ka dingwa i pirtre ye waikiglkwa. Sraglpre, yomba i suwarandi ye yene kanno mina nunguno embriye dingo ye pirkwa. Ana yomba nangino kogl keglango ere yegl dingwa, “Yomba ka dimeglkwa i prapra Galili yomba moglkrim kana? Ana i sraglmere orko nono suwarandi kanno perepere pamere ikra dimeglko nono prumune? Ana nono kantri Patia ya, Midian ya te Elam; te nono distrik Mesopotemia ya Judia; te provins Kapadosia ya, Pontas ya te Esia yomba nono igle mounga. 10 Te distrik Prigia ya, Pamfilia ya te kantri Isip; te distrik Libia yomba tau ye Sairini kamun mangigl meglkwa, ana nono Rom yomba tau ama wu suna igle mounga. 11 Nono Juda yomba ya te yomba tau Juda yomba mambunono pamere duglo beglkwa yeingo, ana tau ailan Krit ya te distrik Arabia yomba, nono prapra punga; i God kongunmo giglendi orkwa i kamo ye nono kanno pamere-pamere kuno ere dingwa.” 12 Ana ye prapra sipuglodi nomano suwo suwo yei yene mina krapeglkwa, “Taragl erikwa i sragl mambuno pamda?”
13 Ba yomba tau bakagl gaugl eretendre yegl dingwa, “Ye wain kor nuglo merkinde nendre ana du erikwa.”
Pita eremogl ka mambuno dungwa
14 Ana Aposel 11 wagle bogl Pita akiye andigl meglko ana ye mambuno ere ka kande di yomba merkinde meglkwa i yegl ditongwa, “Ene Juda yomba ya te yomba wu Jerusalem suna meglkwa, na taragl i mambuno ditenaglka, i ene wakai ere pirpogl siyo. 15 Yomba magl meglkwa i ye wain gigle dungwa nendre, ana du erimedi ene pirkwa, ba tamanga. Erme tangina kinde ande kuiya 9 klok orkwa. 16 Taragl orkwa i okuna propet Joel dumere erme wu plau dungwa,
17 “ ‘God yegl dungwa,
Enge dundinagledi mangigl
eran na taragl yegl eraglka,
na Spiritna toindi yagl ambu prapra mina endinaglka.
Ene wano ya amburo propet
mereyegl ere na kanna
dinaglkwa, ene nangro yagl
gakmugl wagle ama sragl
ongumutno-mugl eran
kanaglkwa, ana ene neno
kindagl wagle ye uglkumbu kanaglkwa.
18 Ana enge igle na Spiritna
toindi konguna yagl ambu
mina akiye endimbo, ana ye
propet mereyegl mogltre na kanna dinaglkwa.
19 Kamun kua mitna imbo
na kimagl kanekane erimbo,
te makandle igle diu gaglebogl
plau dinambuka, ana bormai
ya endi donga te endi inge kande plau dinan,
20 ana ande akemim eran
te ba akegogl ere wu
bormai koglo enambuka,
taragl yegl eran, okuwo
Yaglkande unambuka engemo
kande ya te ambuglangemo i plau dinambuka.
21 Ana taragl yegl erambuka
enge, yomba ta Yaglkande
wedi kangiye dagl
morambuka, i God ere-inambuka.’
22 “Israel yomba, na ka dina erika i ene kinano yei piryo! Yesus Nasaret nem, ye mina God yombuglomo tongo ana ye kongun giglendi ya kimagl kanekane ya diu ene meglmara suna orkwa i enene prapra kanigura. I God diendungo ye ume dinaglmedi pre yegl orkwa. 23 God yene kamkand eragledi di panduglmara pre ana yagl i tekoglo ene mina endungo ana yomba kinde akeple dingo ene ye ipi endi-prak mina buglo-nil si pandiglkwa. 24 Ye goglkwa, ba God ikor endungwa, te ye giu kanekane indre goglkwa i God ikorugl endungwa. Sraglpre, geglkwa mambunomo i yombuglomo ta panan Yesus ake morambuka ta kuno erekrukwa. 25 Devit okuna ye pre yegl dungwa:
“ ‘Na kaninga, Yaglkande
engenge na moglmara
gumanamugl moglkwa.
Sraglpre, ye na onguna wokra
moglkwa, ipre na kundugl ta goglkraglka.
26 Ipre na munduna argan
orko gunyei ka wakai dinga,
ombugl na okuwo wakai
moglpai eraglka ipre poglodi pir sugl moraglka.
27 Sraglpre, ene na kanwinge
etn giglpene ta pai moglkraglka, te ene Yomban Holi
Moglkwa Suwara i ta
kanwinge etn nangiye giglpene ta buglkrambuka.
28 Ene kor-meglkwa konbo
i na ombunodi natnga, ene
mambutn mina na gun yenaglka i sikausi naratnga.’
29 “Angrima wagle, nono kowano King Devit ikra pre na kundugl goglkre dipene ende ene tenaglka. Ye goglko maugl singwa, ana ye giglmo pene erme nono mounara yei pangwa. 30 Ye propet ta moglkwa, ana taragl okuwo ta panambuka ipre God kaima ka dipandigl Devit tongo ye pirkan orkwa. God yegl dungwa, ‘Okuwo king Devit gawan ta morambuka, ye usuglosi ene king motnere yegl morambuka.’ 31 God taragl erambuka i Devit kan kondungwa, te Mesaia gogltre andigl ukor enambuka ipre Devit yegl dungwa, ‘Makandle geglkwa mambuno i mina ye ta goglkrambuka, ba andigl ukor enambuka, te ye nangiye giglpene maugl mina ta buglkrambuka.’
32 God eremogl Yesus goglko ikor endungwa, ana no taragl orkwa i kaima kamga pre no ka i dinongugl endumga. 33 Yesus ukor pindre ana ende heven pi God ongo wokra moglkwa. Ana ye Nem okuna Holi Spirit tenagledi ka dipandigl dungo pamara pre ye Nem mina indre ana erme toindi no mina endungo, ana Holi Spirit i yombuglomo ene pirtre kandre erikwa. 34 Ana Devit ye ende heven ta pikrukwa. Ba ye yegl dungwa,
“ ‘Yaglkande ka yegl di
na Yaglkandena tongwa:
“Na onguna wokra igle ene amedi moglo.
35 Ene igle mogl emin ana na
kundan ikine yendimbo katn mina atnekra moraglkwa.” ’
36 “Yeglpre, ene Israel yomba prapra piryo, yaglmo Yesus ene ipi endi-prak mina sigeglkwa ikra, God erme ere endungo ye Yaglkande ya Mesaia akiye moglkwa!”
Yomba merkinde nomano yake tendre baptais erikwa
37 Ana yomba ka yegl dungwa pirtre ye deno munduno yumbun dongo ana ye krapogl Pita ya aposel tau teingwa, “Angrima wagle, no sragl eramne?”
38 Ana Pita yegl ditongwa, “Ene suwara suwarandi nomano yake tendre ana Yesus Krais kangiye mina baptais erimbi ana God ene tandaglmeno koko endinambuka. Yegl erimbi God munduwo argan pre Holi Spirit yoko tenan ene inaglkwa. 39 God okuna Holi Spirit tenagle dipanduglkwa ikra ene ya, nangro ya te yomba koglkoglo meglkwa i prapra Yaglkande, no Godno aglendi inambuka yomba ana Holi Spirit tenambuka.”
40 Pita ka tau giglendi merkinde dungwa, ba yomba bitno-kano ake ka yegl dungwa, “Ene kanpogl siyo. Aglau eran yomba mambuno kinde erikwa bogl ene akiye yumbun i-dinaglmiwa, ene ende eglke wiyo.” 41 Ana Pita ka dungwa i pirngi dingwa keunde ye baptais eriko ana ande enge igle yomba nambano 3,000 mereyegl wu ye mina ainingwa.
Yomba kor pirngi dingwa wagle mambuno wakai erikwa
42 Ana aposel wagle ka beke nerimbi piramnedi ye enge mere yombuglo ere prapra wu makaisi kaiya mokna ya bret bukondi nendre ana nomano suwara yei kamange erikwa.§ 43 Ana aposel wagle kamambuno dimara i God kimagl kanekane orko ana yomba prapra kandre nomano mina kundugl geglkwa. 44 Ana yomba Krais wedi pirngi dingwa ye prapra makaisi mogltre ana sragl kanekane ta kan neingwa imakaisi yumbusi ere neingwa. 45 Ye makano ya taragl kanekane ake-neingwa ipi topo bogl indre ana monimo i yene mina ya te taragl paitekrukwa yomba bogl kokunkuno yumbusi ingwa. 46 Ye God holi yungumo mina togl sunakra engenge wu makai singwa. Te yene yunguno mina bret diure nendre ana nomano argan orko gun yeingwa. 47 Pirngi dingwa yomba God dembiye siteingwa ana yomba prapra munduno argan orko gun yeingwa. Ana Yaglkande engenge pirngi dingwa yomba kor isuna endungo, pirngi dingwa nambano wu kande ongwa.
* 2:1 Pentikos Enge Kande iwe, kangiye ta Enge Kande Kaiya Mokna si yu makai singwa. Buk Wok Pris 23:15-22 kano. Engemo iwe, ande enge 50 mokomugl enge kande i Israel yomba pir ikine ende God kuko yei tongo wakai meglkwa, i kangiye Pasova we dingwa. 2:15 Pita ka yegl dungwa, sraglpre, enge kande yongwa ingine Juda yomba kaiya ya nigl tangina kinde ta nekre erikwa. 2:21 Joel 2:28-32 2:28 Buk Song 16:8-11 2:31 God, yagl i pinde indre yombama ere-inambe dungwa. Ana Grik yomba kanno mina “Krais” we dingwa. 2:35 Buk Song 110:1 § 2:42 Erme pirpogl singwa yomba tau yegl pirkwa, yomba okuna Kristen meglkwa i ye usuwara pindre kaiya mokna ne kondo ana ye bret ya wain nuglo neingwa i Yesus nangiye ya bormai mereyegl ormedi pirkwa.