5
Ti arazana ni niŋgbina la yela
1 Ti niŋgbina wenne fudoog ne. Ka ti miꞌ ye li yaꞌa ti saꞌam ti na mor niŋgbin siꞌa arazana ni ka li wenne doog. Ka li ane Winaꞌam mee li, ka kaꞌ ninsaaliba. Ka li na be yuma ka li kaꞌ naare.
2 Ti mor susaꞌaŋ dunia nwa ni ka bood ne ti sunf wusa ye Winaꞌam na noki ti arazana niŋgbiŋ la n yeeli ti wuu fuug ne.
3 Bozugo ti yaꞌa yeꞌ arazana fuug la ti ku ken biꞌel la.
4 Tiname be ti dunia niŋgbinin la, ka ti mor daamug ti sunfin ka siꞌimi li zug. Li kaꞌane ye ti pu bood ye ti mor ti dunia niŋgbiŋ laa, ka ane ye ti bood ye Winaꞌam noki ti arazana niŋgbiŋ la n yeeli ti bozugo vum na nyaŋ niŋgbiŋ line na kpi la.
5 Li ane Winaꞌam tiꞌebi ti ye ti nye tiaker kaŋa, ka tisi ti o Siig Suŋ ye li paꞌal ye ti na diꞌe on ye o tisi ti siꞌel la wusa.
6 Dinzugo ti yiti mor sukpiꞌeuŋ bedego, ka miꞌ ye ti yaꞌa be ti dunia niŋgbinin, ti kaꞌ Zugsob saꞌan arazana nii.
7 Ka li kaꞌane tiname nyet o la ke ka ti dol oo, ka ane ti yadda niŋir yela.
8 Ti mor sukpiꞌeuŋ bedego ka na boodin ye ti basin ti dunia niŋgbiŋ la ka moren ti arazana niŋgbiŋ la n be Zugsob saꞌan.
9 Aa to, ti yaꞌa be arazana ni bee ti dunia niŋgbinin ti bood bedego ye ti maꞌae Zugsob la sunf.
10 Li nar ka ti wusa na ziꞌe Kiristo tuon ka on na kadi ti saria, ka na tis on mekama on nar ne o diꞌe siꞌem la. Ka li yaꞌa a suꞌum bee beꞌed, li dolne on tum siꞌem dunia nwa ni.
Tiname voe ye ti naꞌas Winaꞌam la yela
11 Dinzugo tiname zot Zugsob la dabiem ne ti sunf wusa la zug ka ti mood ye ti ke ka nidib siak Winaꞌam. O miꞌ tinam a siꞌem suꞌuŋa. Ka m mor potenꞌer ye yanam me miꞌ ya sunfin tinam a siꞌem la.
12 Ti pu lem mood ye ti yeli ya tinam suꞌum yela yaꞌasa. Ti lee mood ye ti ke ka ya mor siꞌel na nweꞌe nyoꞌog ti yela. Ka ya mor siꞌel na yel nimbane nweꞌed nyoꞌog ban a siꞌem ka nidib nyeti li paalo la, ka kaꞌa ban a siꞌem ba sunfinee.
13 Ti niŋir yaꞌa a wuu geenmis tuuma, li ane Winaꞌam yela. Ka ti yaꞌa pu geenm li ane yanam meŋ zug.
14 Kiristo noŋir soꞌe ti ka ti baŋ suꞌuŋa ye dau yinni da kpi tis nidib wusa, ka dinzug ka nidib wusa da laꞌam kpi ne o.
15 Ka me baŋ ye o da kpi tisi ba ye bane mor vumpaal o zug la ku lem voe ye ba niŋ ba meŋ boodim, ka lee voe ye ba niŋ on, one kpi ka vuꞌug kumin n tisi ba la boodim.
Winaꞌam ke ka ti tiake a nimpaala la yela
16 Tiname tenꞌes nidib a siꞌem la, pu len dolne ti ninsaalib potendaa. Hale laꞌam ne tinam daa tenꞌes Kiristo a siꞌem la da dolne ti ninsaalib potenda la, ti pu len niŋid alaa.
17 Soꞌ yaꞌa a yinni ne Kiristo, Winaꞌam maal o ka o a nimpaal. Ka o boodim kudug la gaadeya, ka o yuꞌun mor boodim paal.
18 Winaꞌam niŋi li wusa ka naali ti ne o meŋ, ka li yine Kiristo ni na, ka tisi ti tuuma ye ti ke ka nidib me naal ne o.
19 Ti labaar ane ye Winaꞌam da be Kiristo ni ka da naal dunia dim ne o meŋ ka yiisi ti tuumbeꞌedi bas, ka guꞌuli ti o naaluŋ labaar la.
Tinam diꞌe Kiristo zinꞌig n tum siꞌem la yela
20 Dinzug ka ti ziꞌe Kiristo ziꞌa n pianꞌad. Ka Winaꞌam belim nidib, ka li yine tinam saꞌan. Ti ziꞌe Kiristo ziꞌa ka belimi ya ye ya naal noor ne Winaꞌam.
21 Kiristo pu mor tuumbeꞌede. Ka Winaꞌam da ke ka o diꞌe ti tuumbeꞌed zanꞌasa ye tinam lieb yinni ne o la, ka ti na diꞌe Winaꞌam popielim.