6
1 Tiname tum ne taaba Winaꞌam ni la, ti belimi ya ye yanam bane diꞌe Winaꞌam popielim piini la da ke ka li a zaalim ya saꞌane.
2 Bozugo Winaꞌam da yel o gbauŋin ye,
“Saŋkan ka m siak ye m tisi ya m yelsum la,
ka m wumi ya sosug.
Ka faangir daar la ka m suŋi ya.”
M na yeli ya ye saŋa kan ka Winaꞌam siak ye o tisi ya o yelsum la ane nannanna nwa, ka faangir daar la a zina.
3 Ti pu niŋid siꞌel line na viꞌi soꞌ suer ka ba luu, ka soꞌ da nye taali ti tuuma nii.
4 Ka lin wusa ka ti nyet la paꞌal ye ti ane nimbane tum Winaꞌam tuuma suꞌuŋa. Ti daa nyet daamug ne fara ne yeltood.
5 Ka ba daa buꞌudi ti ka loodi ti sarega ni. Ka nidib bedego giligi ti n kisi ti. Ka ti daa tum tuumkpiꞌema bedego, ka daa pu gbisida. Ka koꞌom daa more ti. Ti daa modig bama ni wusa.
6 Ti niŋir wusa a nyain. Ka lin ne ti miꞌilim ne ti modigir ne ti yelsum ne Winaꞌam Siig Suŋ ne ti sida noŋilim
7 ne ti sida pianꞌad ne Winaꞌam paŋ la wusa paꞌal ye ti ane nimbane tum o tuuma suꞌuŋa. Ti mor popielim wuu zaba laꞌad line be datiuŋ ne dagobug,
8 ka nyet naꞌasi ne nyan ne tuꞌud ne zunꞌor. Ba niŋidi ti wuu damaꞌanam ka ti lee a sida dim,
9 ka niŋidi ti wuu ba ziꞌi tii amaa nidib bedego miꞌi ti, ka niŋidi ti wuu ti kpine ka ti lee mor nyovur, ka namisidi ti ka ti lee pu kpii.
10 Ka ti mor susaꞌaŋ ka me yiti mor sumalisim, ka a noŋdim ka lee ke ka nidib bedego diꞌed yelsum bedego, ka pu mor siꞌel dunia nwa nii, ka lee mor siꞌel wusa Winaꞌam tuon.
11 M zuasuma bane be Korint teŋine, ti pie ti poog n pianꞌad, ka noŋi ya ne ti sunf bedego.
12 Tiname noŋi ya siꞌem la kaꞌ biꞌelaa. Ka li ane yanam noŋilim pu zuꞌe tinam saꞌanee.
13 M pianꞌadi ya wuu ya ane m biis, ye ya me noŋi ti ne ya sunf wusa wuu tiname noŋi ya siꞌem la.
Noor yinni ne bada dim saꞌalug la yela
14 Da mor noor yinni ne bane kaꞌ yadda niŋidib la ye ya niŋ siꞌela. Popielim ne beꞌed ku nyaŋe laꞌas taabaa. Ka li ku nyaŋ a lik ka a neesim saŋa yinnii.
15 Ka Kiristo ne Sutaana ku nyaŋe siak taaba noore. Ka one a yadda niŋid ku nyaŋe mor noor yinni ne one kaꞌ yadda niŋida.
16 Ka Winaꞌam puꞌusug yir ku nyaŋe a yinni ne badaa. Tinam meŋ ane Winaꞌam one voe la yir. Li dolne Winaꞌam da yel o gbauŋin siꞌem la ye,
“M na bee ba soogin ka laꞌam ken ne ba.
M na aa ba Winaꞌam.
Ka ban na aa m nidib.”
17 Ka dinzug ka Zugsob Winaꞌam one mor paŋ n gaad siꞌel wusa la da yel o nidib ye,
“Yimi bane kaꞌ m nidib la soogin,
ka baki ya meŋ ne ba.
Da siꞌis bun line a dianꞌade,
ka m na diꞌe ya.”
18 “M na aa ya Baꞌ
ka yanam me aa m biribis ne m bipumis.”