11
Naur a momol a tena warwara talapor
1 Di saran tar a por tak, i arlar ana rakai di sira mak onoi pa di atai iau mang, “Ur han pa ur mak a rumai a artabar ane God, pa a logo na tun artabar, pa ur was la ning la lotlotu tingia.
2 Ika ur madek sen a pukna tumo lapiu na rumai a artabar, gong u mak tari. Anasa di ka saran tari tetek a tarai ning belsur a tarai ane God, pa lar pas dur a totoh a hanua ane God arlar ana diat a bonot pa naur a kalang.
3 Par saran tar a rakrakai tana nuk naur a tena warwara talapor hok, diar mermer ana kaen a tobo pa diar warwara na propet pas ana 1,260 a pukakiar.”
4 Naur a tena warwara talapor ne, dia naur a rakai a oliw pa naur a turtur a lam, ning dia tur namatana Leklek anuna rakrakan hanua.
5 Ning tik i mang suir alaulau diau, a iah ir hanot miting na pahan diau pa ir ien sen anundiau na hiruala. Ning tik i mang suir alaulau diau, ir mat larot ning.
6 Naur a barsan ne dia tong akes a rakrakai sur diar sairas a bakut, sur gong a kiar i punga ana taem ning dia warwara na propet. Dia tong akes otleng a rakrakai sur diar keles a malum sur a suluk, pa diar dapis a rakrakan hanua ana urmatana ngas a akadik rop ana puka kamisla ning dia mang.
7 Ning dia ka arop sen a nundiau a warwara talapor, a rokoio a inagoi ir han kas kusun a tnan tung ning bel al araropna. Ir harum taum on diau, pa ir tolsot pas diau pa ir um kol sen diau.
8 Pa a minatindiau ir borbor ka ting na ngas ana tnan hanua di atong arlari o e Sodom pa e Ijip, a hanua ning di sai ahat otleng anundiau a Leklek ia.
9 Pa a tarai miting na hananuala rop, pa miting na mangis a tarai rop, pa miting la ning la warwara ana urmatana ngas a warwara rop pa miting na matanitula rop lar oroi a minatindiau tuk natol a pukakiar pa takai a tuka kamis pa bel lar longor sur dir por diau.
10 Pa na tarai miting na rakrakan hanua lar gas ka on diau, lar asangan anunla na gasgas ona artabar tetek la artalai, anasa naur a propet ne dia akadik a tarai te na rakrakan hanua.
11 Ika lamur tana natol a pukakiar pa takai a tuka kamis, e God i wus kas tar a wuwu na lalaun on diau. Pa dia laun pa dia tur, pa a tnan matmataut i los la ning la oroi diau.
12 Pa dia longor a tnan elngen takai misaot na langit i atai diau mang, “Mu han kas ute.” Pa dia han kas ana bakut usaot na langit, pa nundiau a hiruala la oroi sen diau.
13 Ana puka kamis ot ning, a tnan mamais i hanot. Pa takai a pukna miting na tnan hanua ning i tarege, pa siuk a pukna bel. Pa mais a rip a tarai la mat, pa la ning la laun kes la matmataut kol, pa la atong leklek pas e God ning i kes saot na langit.
14 Pa munaur a akadik ka rop. Pa munatol a akadik milau ir hanot.
A ararop a tawuru
15 A ararop a angelo ting na mais a angelo, i wus anuna tawuru, pa galis a tnan elngena tarai saot na langit la atongi mang,
“A matanitu ana rakrakan hanua ka keles sur a matanitu anuna Leklek anundalai, pa anuna Karisito anunai.
Ir kes na king tikin, bel ir rop pa bel ir rop.”
16 Naur a bonot pa diat a ningnigo, ning la kes ana anunla na keskes a king salanigo ta e God, la punga hanrawai ona patarinla ting na piu, pa la lotu tetek e God.
17 La atongi mang,
“Mila atong wakak tetek u a Leklek e God ning u rakrakai kol,
u laun nigo pa u laun anone,
anasa u ka kubas pas a tnan rakrakaim
pa u ka turpasi sur ur kes ana keskes a king pa u warkurai.
18 Na matanitu masik la balakut,
pa anuma balakut otleng ka hanot.
A taem ka hanot sur ur warkurai la ning la mat,
pa ur saran a arlou tetek anum na tena titol oros, a propetla
pa anum na tarai, pa la ning la hanrawai a risam,
la ning bel al risanla pa la ning la leklek,
pa ur kamar sen la ning la alaulau a rakrakan hanua.”
19 Lamur a rumai a artabar ane God saot na langit i sapang, pa ting na rumai a artabar anunai, di oroi anuna bok a kunubus. Pa a pil i pil, a unga, a bakut i pugur, a mamais, pa a tnan kiar a ais i hanot.