12
A hane pa dregon
1 A tnan akinalang i hanot saot na langit. Ning a hane i mermer ana kamis, pa a kalang kaning i kes ting nahai naur a hana, pa saot na pukulna, a kukuh na king, ning di toli ana ning a bonot pa naur a nangnang.
2 A hane ne i tianan, pa i woiwoi ana tnan kankan, anasa ka milau ir agon.
3 Ning a akinalang maleng i hanot saot na langit. Oroi, a tnan dregon, a palaona i kubar, mais a pukulna, ning a bonot a komna, pa mais a kukuh a king kaning na mais a pukulna.
4 A mukmukna i surupu purum sen a galis a nangnang misaot na bakut pa i minggen purum sen la ute lapiu. Larning di salar a nangnangla miting na natol a pukna, pa takai a pukna la rop la punga purum. Pa a dregon i tur tar salanigo tana hane ning i pele na agon, sur ono otning ir konom e natnalik ning ir agon seni.
5 Pa i agon pas a kaklik barsan, esaning ir warkurai rakrakai na tarai miting na matanitu rop ana bulse na aen. Pa di kibas kapit pas a kaklik usaot tetek e God, pa uting na nuna keskes a king.
6 Pa a hane ning i liu uting na hanua bel, sur uting na pukna ning e God ka sang tari, sur dir tai alari arlar ana 1,260 a pukakiar.
7 La tur na harum saot na langit. E Maikel pa nuna angelola la harum taum ana dregon, pa a dregon pa nuna angelola otleng la keles la.
8 La tolsot pas a dregon, pa bel ta pukna ulak ma anuna dregon pa nuna angelola saot na langit.
9 Di minggen purum sen a tnan dregon, a soi tagun nating, ning di atongi a tena artitiu, pa e Satan, esaning i ben rongon a rakrakan hanua rop. Di minggen purumi taum ana nuna angelola ute lapiu.
10 Pa a longor a tnan elngen takai saot na langit i atongi mang,
“Onone e God anundala ka alaun pas a tarai, i asangan a rakrakaina, pa anuna matanitu ka hanot,
pa a warkurai anuna Karisito anunai ka hanot.
Anasa a tena artitiu ning i sira tiu na tastasindala,
esaning i sira tiu la namatana e God ana kamisla pa moromla,
di ka minggen purum seni.
11 Na tastasindala la ka tolsot pasi
ana suluk a Nat a Sipsip
pa ana nunla na warwara talapor.
Bel la mangan alar anunla a lalaun kusun a minat.
12 Manglarning, a langit pa mulo ning mulo kes onoi,
mulor gas.
Ika ir laulau tetek a rakrakan hanua pa a puka tasi otleng,
anasa a tena artitiu ka han purum tar tetek mu!
Anun a balakut i irnga kol,
anasa i tasmani mang bel ma i bongnani.”
13 Ning a dregon i tasmani mang di ka minggen purum seni ute na rakrakan hanua, i lu a hane ning i agon pas a kaklik barsan.
14 Di saran tar naur a dehel a tnan manigulai tana hane ning, suir rowoi taum ono sur a pukna ning e God i sang tari saot na hanua bel, sur dir tai alari kusun a soi, arlar ana natol a rau pa tukna.
15 A soi i lewe sen a malum miting na pahana, arlar ana malum, suir los sen a hane ning.
16 Ika a piu i nangan a hane ning, i panganga pa i konom a malum ning a dregon i lewe seni.
17 Pa dregon i balakut kol tetek hane ning, pa i han suir harum taum dingla na natnatna a hane otleng ning. La ning la sira longor ana warkurai ane God, pa la sira mur a warwara talapor o e Iesu.
18 Pa a dregon i tur tar kama tumo na tasi.