མར༌ཀུས༌སི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌།
མར༌ཀུས༌སི༌ སྤེ༌ཆའེ༌ སྐོར༌།
འི༌ སྤེ༌ཆའེ༌ ནང༌ང༌ འི༌ སྤེ༌ཆ༌ བྲི༌ཁན༌བོའེ༌ སྐོར༌ལ༌ ཅའང༌ བྲིས༌ཏེ༌ མེད༌ཏེ༌ ཨིན༌ནོག༌, ཨིན༌ནའང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ བྲིས༌ཁན༌གུན༌ གྱུད༌ཏེ༌ འི༌ སྤེ༌ཆ༌ བྲི༌ཁན༌ ཡོ༌ཧཱ༌ནན༌ མར༌ཀུས༌ ཨིན༌ཁན༌བོ༌ གྱུས༌ ཆའ༌ནོག༌། ཁོའེ༌ སྐོར༌ལ༌ མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌ སྤེ༌ཆའེ༌ 12:12 དང༌ 25 ཡང༌ 15:37 ནང༌ང༌ བྲིའ༌ ཛད༌ཏེ༌ ཡོད༌ཏེ༌ ཨིན༌ནོག༌། མར༌ཀུས༌ པི༌ཏྲར༌རི༌ ཕྲོ༌པ༌ མ༌ ཉེ༌མོ༌ཞིག༌ ཨིན༌པིན༌, ཡང༌ ཁོའ༌ པི༌ཏྲར༌རི༌ ཏེ༌ཏུས༌སི༌ མ༌ཤི༌ཀ༌པ༌གུན༌ལ༌ ལབ༌ཞ༌ མང༌པོ༌ སལ༌ཁན༌གུན༌ གྱུད༌ཏེ༌ གཙོ༌བོའེ༌ མོལ༌ཁན༌ དང༌ ཆག༌ལས༌ ཚང༌མའེ༌ སྐོར༌ལ༌ ཚོར༌། ཚོར༌ཏེ༌ སྟིང༌ནེ༌, ཁོའེ༌ ཏེ༌ ཚང༌མ༌ ཚིར༌ ནང༌ཞིན༌ བྲིའ༌ ཛདས༌, ཀ༌བོ༌ ང༌དང༌གུན༌ལ༌ དག༌ས༌ མར༌ཀུས༌སི༌ བྲིའ༌ ཛད༌ཁན༌ནི༌ གའ༌མོའེ༌ ནས༌ཚུལ༌ལི༌ ནང༌ང༌ ཐོབ༌བ༌ནོག༌།
ཆོས༌སི༌ ཁས༌པ༌ མང༌ཆེའ༌ འི༌ སྤེ༌ཆ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 17 དང༌ 27 ནི༌ ཉེ༌ཁོར༌ལ༌ བྲིའ༌ ཛད༌ཁན༌བོའ༌ ཁའ༌ཆམས༌ཏེ༌ ཨིན༌ནོག༌། རོམ༌མི༌ གྱལ༌པོ༌ ནེ༌རོའེ༌ ཏད༌པ༌ཅན༌གུན༌ལ༌ ནགས༌ ལྟན༌ཅེས༌ གོ༌ཟུག༌གི༌ སང༌ སྔུན༌ལ༌ མར༌ཀུས༌སི༌ འི༌ ཆག༌བྲིས༌པོ༌ ཁོང༌ རོམ༌མི༌ གྱལ༌སའེ༌ ནང༌ང༌ ཡོད༌ ཟ༌ནེ༌, ཏེ༌རུ༌ དུག༌ཁན༌ ཡ༌ཧུ༌དཱ༌པ༌ མན༌ཁན༌ ཏད༌པ༌ཅན༌གུན༌ནི༌ ཕིའ༌ བྲིའ༌ ཛདས༌།
འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌གུན༌ ནི༌:-
ཏང༌པོ༌, ཏད༌པ༌ ཅོ༌ཁན༌ དང༌ མ༌ཅོ༌ཁན༌ ཉིས༌ཀོའེ༌ སྙིང༌ངི༌ ནང༌ང༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཅོ༌ཅུག༌ཅེས༌པོ༌ ཨིན༌ནོག༌།
ཉིས༌པ༌, མ༌ཤི༌ཀ༌པ༌གུན༌ལ༌ རྡུག༌ངལ༌ བྱུང༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ ཀ༌ཟུག༌ ཡེ༌ཤུའི༌ ཁོང༌ གྲུལ༌ལ༌ ཛད༌ཁན༌ནི༌ ལམ༌མི༌ཀ༌ གྲུལ༌ཁན༌གུན༌ལ༌ རྡུག༌ངལ༌ ཐོང༌ཨིན༌ མོལ༌ཏེ༌ ལན༌ མང༌པོ༌ ལབ༌བ༌ ཛདས༌།
སུམ༌པ༌, ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ ཨིན༌ནའང༌, འི༌ ཇིག༌རྟེན༌ནི༌ཀ༌ ཞབ༌སྟོག༌ ལེན༌ཅེས༌ལ༌ མན༌པ༌, ཞབ༌སྟོག༌ ཞུའ༌ལ༌ སྐྱོདས༌།
ཞི༌པ༌, ཡེ༌ཤུའི༌ ཞབ༌སྟོག༌གི༌ ཆག༌ལས༌པོ༌ ནི༌, མི༌གུན༌ སྡིག༌པའེ༌ ཀ༌ནེ༌ སྐྱོབ༌ཅེས༌པོ༌ ཨིན༌པིན༌།
ལྔ༌པ༌, ཡེ༌ཤུའི༌ ཆག༌ལས༌གུན༌ནི༌ ཁོང༌ ཅི༌ཚང༌མའེ༌, ༼ཡང༌ན༌ འི༌ ཇིག༌རྟེན༌, སེམས༌ཉིད༌དི༌ ཇིག༌རྟེན༌, ནམ༌ལ༌, ཟུ༌མོ༌གུན༌ དང༌ ཤི༌ཅེས༌༽ གཙོ༌བོ༌ དང༌ སྤོན༌བོ༌ ཨིན༌ཁན༌བོ༌ ལྟན༌ན༌ནོག༌།།
1
ཡོ༌ཧཱ༌ནན༌ ཁྲུས༌སལ༌ཁན༌ནི༌ མི༌གུན༌ གྲལ༌གྲིག༌ ཅོའ༌ ཛདས༌།
1:1 ནེ༌ 8
1 འི༌བོ༌ ནི༌ དཀོན༌མཆོག༌གི༌ སྲས༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཨིན༌ནོག༌། འི༌བོའེ༌ གོ༌ཟུག༌ ནི༌,
2 ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆའེ༌ ནང༌ང༌ བྲིའ༌ ཛད༌ཁན༌ ནང༌ཞིན༌ དཀོན༌མཆོག༌གི༌ མོལས༌,
"ལྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌།
ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།
3 ཁོའེ༌ རི༌སྟོང༌ངི༌ ནང༌ང༌ ཀུ༌ཅོ༌ ཏང༌ཨིན༌ མི༌གུན༌ལ༌ ཟེར༌ཨིན༌,
''གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོས༌,
ཡང༌ ཁོང༌ངི༌ ཕེབས༌ལམ༌བོ༌ དྲང༌པོ༌ ཅོས༌'། "
4 ཁྲུས༌སལ༌ཁན༌ ཡོ༌ཧཱ༌ནན༌ སྐྱོད༌ཏེ༌ རི༌སྟོང༌ངི༌ ནང༌ང༌ མི༌གུན༌ལ༌ ཤགས༌པ༌ ཐོབ༌ཅེས༌སི༌ ཕིའ༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ ཆོས༌ཤདས༌།
5 ཡེ༌རུ༌ཤ༌ལེམ༌མི༌ གྱལ༌སའེ༌ མི༌གུན༌ ཐེས༌ཏེ༌ ཡ༌ཧུ༌དཱའེ༌ ཡུལ༌མི༌ གང༌པོ༌ བིངས༌ཏེ༌ ཡོ༌ཧཱ༌ནན༌ལ༌ ལྟ༌ཅེས༌ དང༌ ཉན༌ན༌ལ༌ སོང༌། ཁོང༌གུན༌ནི༌ རང༌རང༌ངི༌ སྡིག༌པའེ༌ ལས༌གུན༌ མི༌གུན༌ནི༌ དུན༌ལ༌ ཤདས༌ པ༌སང༌ ཡོ༌ཧཱ༌ནན༌ནི༌ ཁོང༌གུན༌ལ༌ ཡོར༌དཱན༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
6 ཡོ༌ཧཱ༌ནན༌ནི༌ རྔ༌བོང༌ངི༌ བལ༌ལ༌ ཐགས༌ཁན༌ནི༌ ཀོས༌ དང༌, སྐེད༌པ༌ ཀོའེ༌ སྐྱེ༌རགས༌ ཅིང༌ངད༌པིན༌, ཡང༌ པར༌པར༌ཙེ༌ དང༌ རི༌སྟོང༌ངི༌ རང༌རྩི༌ ཟའད༌པིན༌།
7 ཡོ༌ཧཱ༌ནན༌ནི༌ ཁྱབ༌གྲགས༌ ཅོས༌, "ངའེ༌ སྟིང༌ནེ༌ སྐྱོད༌ཅེས༌ཅན༌བོ༌, ངའེ༌ སང༌ མང༌ང༌ ཝང༌ཅན༌, ཡང༌ ཞབ༌ཤི༌ ཙོགས༌ལ༌ ངའ༌ སྒུས༌ཏེ༌ ཁོང༌ངི༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།
8 ངའེ༌ ཁྱོ༌ཞ༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌, ཨིན༌ནའང༌ ཁོང༌ངི༌, ཁྱོ༌ཞ༌གུན༌ལ༌ དམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ཨིན༌།"
ཡེ༌ཤུའ༌ ཁྲུས༌སལས༌།
1:9 ནེ༌ 11
9 ཞག༌ཤིག༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ན༌ཙ༌རེད༌ གྲོང༌ཁྱེར༌ནེ༌ སྐྱོདས༌, ཡང༌ ཡོ༌ཧཱ༌ནན༌ནི༌ ཁོང༌ང༌ ཡོར༌དཱན༌ནི༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
10 ཡེ༌ཤུ༌ ཆུའི༌ ནང༌ནེ༌ བིང༌ང༌ཅིག༌, ཁོང༌ང༌ ནམ༌ཁའ༌ བེ༌ཏེ༌ དམ༌པའེ༌ ཐུག༌ཉིད༌ ཁོང༌ངི༌ཀ༌ ཕུར༌གོན༌ཞིག༌གི༌ ཚུལ༌ལ༌ བབས༌ཨིན༌ ཟིགས༌།
11 ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, "ཁྱོ༌རང༌ ངའེ༌ བུ༌ཚ༌ ཅེས༌པ༌བོ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།
ཤེ༌ཏན༌ནི༌ ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌།
1:12 ནེ༌ 15
12 ཏེན༌ན༌མལ༌ལ༌ དཀོན༌མཆོག༌གི༌ ཐུག༌ཉིད༌དི༌ གཙོ༌བོ༌ ཡེ༌ཤུ༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌།
13 ཀ༌རུ༌ ཤེ༌ཏན༌ནི༌, ཞག༌ 40 ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌ ཅོས༌། ཏེ༌ཏུས༌ ཁོང༌ རིའི༌ སེམས༌ཅན༌གུན༌ནི༌ ཕྲོའ༌ ཡོད༌ ཟ༌ནེ༌, དཀོན༌མཆོག༌གི༌ ཕོ༌ཉ༌གུན༌ནི༌ ཁོང༌ང༌ ཞབ༌སྟོག༌ ཞུའ༌ ཛདས༌།
14 ཡོ༌ཧཱ༌ནན༌ ཟུམས༌ཏེ༌ ཙོན༌ཁང༌ངི༌ ནང༌ང༌ ཀགས༌ཏེ༌ སྟིང༌ནེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ སྐྱོད༌ད༌ ཛད༌ཏེ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌།
15 ཡེ༌ཤུའི༌ མོལས༌, "ཞལ༌ཆད༌ ཛད༌ཁན༌ནི༌ ཏུས༌པོ༌ ལེབས༌ཏེ༌ ཨིན༌ནོག༌། དཀོན༌མཆོག༌གི༌ གྱལ༌སྲིད༌ ཉེ༌མོ༌ ཨིན༌ནོག༌། ཏེ༌བོའེ༌ཕིའ༌ གྱོད༌པ༌ ཅོས༌ཏེ༌ རང༌རང༌ངི༌ སྡིག༌པ༌གུན༌ ཕངས༌ཏེ༌ གའ༌མོའེ༌ ནས༌ཚུལ༌ལི༌ ནང༌ང༌ ཏད༌པ༌ ཅོས༌།"
གོ༌མའེ༌ ལོབ༌ཕྲུགས༌གུན༌།
1:16 ནེ༌ 20
16 གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ནེ༌ ཞབ༌གྲུལ༌ ཛད༌ཨིན༌ ཡོད༌ཏུས༌, ཁོང༌ངི༌ ཤི༌མོན༌ དང༌ ཁྱོའེ༌ ནོ༌ ཨེན༌གྲིརུ༌ ཚོའེ༌ ནང༌ང༌ ཉ༌དོལ༌ ཕང༌ཨིན༌ ཟིགས༌, ཅིའ༌ཟེར༌ན༌ ཁོང༌གུན༌ ཉ༌ ཟུམ༌ཁན༌ ཨིན༌པིན༌།
17 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ གྱབ༌ནེ༌ ཡོངས༌ཏེ༌ ངའེ༌ ལོབ༌ཕྲུགས༌ གྱུར༌, ཏ༌ནེ༌ཕར༌ལ༌ ངའེ༌ ཁྱོ༌ཞ༌གུན༌ལ༌ ཉའེ༌ ཚབས༌ལ༌ མི༌གུན༌ ཟུམ༌ཅེས༌ ལབ༌ཨིན༌།"
18 ཏེན༌ན༌མལ༌ལ༌ ཉ༌དོལ༌ སྤངས༌ཏེ༌ ཁོང༌གུན༌ ཡེ༌ཤུའི༌ གྱབ༌ནེ༌ བྲངས༌།
19 ཏེ༌ཀ༌ནེ༌ ཙ༌པིག༌ ཐག༌རིང༌ང༌ སྐྱོད༌ད༌ཅིག༌, ཡེ༌ཤུའི༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཟིགས༌། ཁོང༌གུན༌ནི༌ གྲུ༌ཟིང༌ངི༌ ནང༌ང༌ ཁོ༌རང༌གུན༌ནི༌ ཉ༌དོལ༌ གྲལ༌གྲིག༌ ཅོའད༌པིན༌།
20 ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ བོད༌ད༌ ཛདས༌, ཡང༌ ཁོང༌གུན༌ ཁོ༌རང༌གུན༌ནི༌ ཨ༌བ༌ ཟེ༌བེད༌དི༌ ལ༌པ༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ བོར༌ཏེ༌ ཡེ༌ཤུའི༌ གྱབ༌ནེ༌ བྲངས༌།
ཡེ༌ཤུའི༌ གོང༌པོ༌གུན༌ ཕིང༌ང༌ ཛདས༌།
1:21 ནེ༌ 28
21 གཙོ༌བོ༌ ཡེ༌ཤུ༌ དང༌ ཁོང༌ངི༌ ཕྲོ༌པ༌གུན༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌། ཤབ༌བད༌དི༌ ངལ༌ཚོའེ༌ ཞག༌པོ༌ ལེབ༌བ༌ཅིག༌, ཁོང༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོད༌ཏེ༌ ཆོས༌ཤད༌ཅེས༌ གོ༌ཟུགས༌།
22 མི༌གུན༌ ཁོང༌ངི༌ ལབ༌ཞ༌གུན༌ནི༌ཀ༌ ཧ༌ལས༌, ཅིའ༌ཟེར༌ན༌ ཁོང༌ངི༌ ལབ༌ཞ༌གུན༌ ཆོས༌ཁྲིམས༌ལ༌ ཁས༌པ༌གུན༌ ཙོགས༌ མེད༌པ༌, ཝང༌ཆ༌ ཉམ༌པོ༌ སལ༌ལད༌པིན༌།
23 དུ༌ཁང༌ངི༌ ནང༌ང༌ གོང༌པོ༌ ཞུགས༌ཁན༌ནི༌ མི༌ཞིག༌གི༌ ཧུན༌མེད༌ལ༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌,
24 "ན༌ཙ༌རེད༌པ༌ ཡེ༌ཤུ༌, ཉེ༌རང༌ང༌ ང༌ཞ༌གུན༌ནི༌ ཀ༌ནེ༌ ཅི༌ གོས༌སད༌? ཉེ༌རང༌ ང༌ཞ༌གུན༌ མེད༌ཁན༌ ཅོའ༌ལ༌ སྐྱོད༌ཏེ༌ ཨིན༌ན༌? ཉེ༌རང༌ སུ༌ ཞུགས༌ཏེ༌ ཨིན༌ཁན༌བོ༌ ངའ༌ གྱུས༌ཡོད༌། ཉེ༌རང༌ དཀོན༌མཆོག༌གི༌ དམ༌པ༌བོ༌ ཞུགས༌ཏེ༌ ཨིན༌ནོག༌།"
25 ཨིན༌ནའང༌ ཡེ༌ཤུའི༌ ཁོའ༌ ཁའ༌སྐྱེའ༌ ཛད༌ཏེ༌ མོལས༌, "ཅུབ༌ཅོད༌, ཁོའེ༌ ནང༌ནེ༌ བིང༌ཏེ༌ ཡོང༌།"
26 ཏེན༌ན༌མལ༌ལ༌, གོང༌པོ༌བོའེ༌ ཏེ༌ མི༌བོ༌ མ༌སྲན༌ཏྲེ༌ སྲུགས༌, ཡང༌ ཀུ༌ཅོ༌ ཏང༌ཨིན༌ ཁོའེ༌ ནང༌ནེ༌ བིང༌ཏེ༌ སོང༌།
27 མི༌ཚང༌མ༌ སྲན༌ཏྲེ༌ ཧ༌ལས༌ཏེ༌ ཅིག༌ དང༌ ཅིག༌ག༌ ཏྲིས༌, "འི༌བོ༌ ཀ༌ཟུག༌ཤིག༌ ཨིན༌ནོག༌? སོ༌མ༌ ལབ༌ཞ༌ ཝང༌ཆ༌ ཡོད༌ཁན༌ཞིག༌། ཁོའེ༌ བཀའ༌ ཏང༌ཁན༌བོའ༌ གོང༌པོ༌གུན༌ནིའང༌ ཁའ༌ ཉན༌དུག༌།"
28 ཁོང༌ངི༌ སྐོར༌ལ༌ ནས༌ཚུལ༌བོ༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ ནང༌ང༌ གྱོགས༌པ༌ ཕེལ༌།
ཡེ༌ཤུའི༌ མི༌ མང༌པོ༌ཞིག༌ ཕན༌ཅུག༌ག༌ ཛདས༌།
1:29 ནེ༌ 34
29 གཙོ༌བོ༌ ཡེ༌ཤུ༌ ཡ༌ཀོབ༌ དང༌ ཡོ༌ཧཱ༌ནན༌ གུན༌ ཉམ༌པོ༌ དུ༌ཁང༌ནེ༌ བིང༌ཏེ༌ ཁོང༌ངི༌ ལོབ༌ཕྲུགས༌ ཤི༌མོན༌ དང༌ ཁོའེ༌ ནོ༌ ཨེན༌གྲིརུ༌འི༌ ཁང༌པ༌ སྐྱོདས༌།
30 ཁོང༌གུན༌ནི༌ ཡེ༌ཤུའ༌ ཤི༌མོན༌ནི༌ ན༌མའེ༌ ཨ༌མ༌ ཚད༌ ཡོངས༌ཏེ༌ མལ༌ཙའེ༌ ནང༌ང༌ ཡོད༌ཁན༌བོའེ༌ སྐོར༌ལ༌ ཤདས༌,
31 ཡེ༌ཤུ༌ ཨ༌མ༌ ཡོད༌ས༌ སྐྱོད༌ཏེ༌ ཁོའེ༌ ལག༌པ༌ ཟུམས༌ཏེ༌ ཁོའ༌ ལང༌ཅེས༌ལ༌ རོགས༌ ཛདས༌། ཏེ༌ནེ༌ ཁོའེ༌ ཚད༌པོ༌ མེད༌ཁན༌ སོང༌, ཡང༌ ཁོའེ༌ ཁོང༌གུན༌ལ༌ ཞབ༌སྟོག༌ ཞུས༌།
32 ཏེན༌ན༌ ཕི༌ཏོག༌ ཉི༌མ༌ སྐྱོད༌ ཚར༌ཏེ༌ སྟིང༌ནེ༌, མི༌གུན༌ནི༌ ཟུ༌མོ༌ ཡོད༌ཁན༌ དང༌ རྡུད༌ ཞུགས༌ཁན༌ ཚང༌མ༌ ཡེ༌ཤུ༌ ཡོད༌ས༌ ཁྱོངས༌།
33 གྲོང༌ཁྱེར༌རི༌ མི༌ གང༌པོ༌ སྒོའེ༌ དུན༌ལ༌ ཛོམས༌།
34 ཟུ༌མོ༌ སྣ༌ཚོགས༌ ཡོངས༌ཁན༌ མང༌པོ༌ ཡེ༌ཤུའི༌ ཕན༌ཅུག༌ག༌ ཛདས༌, ཡང༌ རྡུད༌ ཞུགས༌ཁན༌ མང༌པོའེ༌ ནང༌ནེ༌ རྡུད༌ ཕིང༌ང༌ ཛདས༌, ཨིན༌ནའང༌ ཁོང༌ངི༌, རྡུད༌གུན༌ལ༌ སྤེ༌ར༌ ཏང༌ ཅུག༌ག༌ མ༌ཛདས༌, ཅིའ༌ཟེར༌ན༌ ཏེ༌གུན༌ནི༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ ཤེས༌སད༌པིན༌།
ཡེ༌ཤུའི༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ ཆོས༌ཤད༌ད༌ ཛདས༌།
1:35 ནེ༌ 39
35 སྟིང༌མ༌ཞག༌གི༌ ང༌ཏོག༌ ནམ༌ལངས༌སི༌ སང༌ སྔུན༌ལ༌, གཙོ༌བོ༌ ཡེ༌ཤུ༌ ཞངས༌ས༌ ཛད༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ མོས༌ལམ༌ ཞུའ༌ལ༌ སྐྱོདས༌།
36 ཤི༌མོན༌ དང༌ ཁོའེ༌ ཕྲོ༌པ༌གུན༌ ཁོང༌ ཙལ༌ལ༌ སོང༌།
37 ཁོང༌ ཐོབ༌བ༌ཅིག༌ ཁོང༌གུན༌ནི༌ ཟེརས༌, "ཚང༌མའེ༌ ཉེ༌རང༌ ཙལ༌དུག༌།"
38 ཨིན༌ནའང༌ ཡེ༌ཤུའི༌ ལན༌སལས༌, "ང༌དང༌གུན༌ ཉེ༌ཁོར༌རི༌ ཞན༌ཡང༌ གྲོང༌ཁྱེར༌གུན༌ལ༌ ཆེན༌ ཡང༌ ངའེ༌ ཁོང༌གུན༌ལའང༌ ཆོས༌ཤད༌ཨིན༌། ཏེན༌ན༌ གྱུན༌ཚན༌བོའེ༌ ཕིའ༌ ངའ༌ ཡོངས༌ཏེ༌ ཨིན༌།"
39 ཏེ༌བོའེ༌ཕིའ༌ ཁོང༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཨིན༌, རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌གུན༌ ཕིང༌ཨིན༌ སྐྱོདས༌།
ཡེ༌ཤུའི༌ ཛེ༌ནད༌ཅན༌ནི༌ མི༌ཞིག༌ ཕན༌ཅུག༌ག༌ ཛདས༌།
1:40 ནེ༌ 45
40 ཛེ༌ནད༌ཅན༌ནི༌ མི༌ཞིག༌ གཙོ༌བོ༌ ཡེ༌ཤུའི༌ དུན༌ལ༌ ཡོངས༌ ཡང༌ པིག༌དོང༌ ཙུགས༌ཏེ༌ ཇུ༌ཇུ༌ ཞུ༌ཨིན༌ ཟེརས༌, "ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།"
41 སྙིང༌རྗེ༌ གངས༌ཏེ༌ ཡོད༌ཅེས༌པོའེ༌, ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, "ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌།"
42 ཏེན༌ན༌མལ༌ལ༌ ཛེ༌ནད༌ པགས༌པའེ༌ ནད༌པོ༌ མེད༌ཁན༌ སོང༌ ཡང༌ མི༌བོ༌ ཕན༌།
43 ཡེ༌ཤུའི༌ ཁོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌, སྤང༌ པུད༌ཨིན༌ མོལ༌ལ༌ ཛདས༌,
44 "སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།"
45 ཨིན༌ནའང༌ ཁོ༌ སོང༌ཏེ༌ ཁོའ༌ བྱུང༌ཁན༌གུན༌ མི༌ཚང༌མ༌ལ༌ ཤད༌ཨིན༌ ནས༌ཚུལ༌བོ༌ ཁྱེབས༌ཤུགས༌, ཏེ༌བོའེ༌ ཞས༌ཏེ༌ ཁོང༌ མི༌གུན༌ལ༌ ཐོང༌ཅུགས༌ཏེ༌ ཀ༌ཟུག༌ གྲོང༌ཁྱེར༌ཞིག༌གི༌ ནང༌ངའང༌ སྐྱོད༌ མ༌ཉན༌། ཁོང༌ མི༌ མེད༌སའེ༌ ནས༌སའེ༌ ནང༌ང༌ ཞུགས༌, ཏེ༌ནེའང༌ མི༌གུན༌ ཀ༌རུང༌ས༌ནེ༌ ཁོང༌ ཡོད༌ས༌ ཡོངས༌།