2
གྲུལ༌ མ༌ཉན༌ཁན༌ནི༌ མི༌ཞིག༌ ཕན༌ཅུག༌ག༌ ཛདས༌།
2:1 ནེ༌ 12
1 ཞག༌ ཁ༌ཅིག༌གི༌ སྟིང༌ནེ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ ལོགས༌ཏེ༌ སྐྱོད༌ད༌ཅིག༌, ཁོང༌ ཁང༌པ༌ ལོགས༌ཏེ༌ སྐྱོད༌ཁན༌ནི༌ ནས༌ཚུལ༌བོ༌ གྱོགས༌པ༌ ཕེལ༌
2 ཡང༌ འི༌ཟམ༌ མི༌ མང༌པོ༌ ཛོམ༌, ཁོང༌ངི༌ ཁང༌པ༌ མ༌ཚད༌ སྒོའེ༌ ཕི༌ལོག༌གའང༌ ནས༌ས༌ སྟོང༌པ༌ མ༌ལུས༌། ཁོང༌ངི༌ མི༌གུན༌ལ༌ དཀོན༌མཆོག༌གི༌ བཀའ༌ ཤད༌ད༌ ཛདས༌ ཟ༌ནེ༌
3 མི༌གུན༌ནི༌ ཟའ༌ཕོག༌ཁན༌ཞིག༌ ཁོང༌ ཡོད༌ས༌ ཁྱོངས༌, ཁོ༌ མིང༌གོ༌ ཞི༌ མལ༌ཙའེ༌ཀ༌ ཁུར༌ཏེ༌ ཡོད༌པིན༌།
4 མི༌ཚོགས༌སི༌ ཞས༌ཏེ༌, ཁོང༌གུན༌ལ༌ ཁོ༌ ཡེ༌ཤུ༌ ཡོད༌ས༌ ཁྱོང༌ མ༌ཉན༌། ཁོང༌གུན༌ ཁང༌པའེ༌ ཁེ༌ཐོག༌ག༌ སོང༌ཏེ༌ ཡེ༌ཤུ༌ ཞུགས༌ཏེ༌ ཡོད༌སའེ༌ ཁ༌དྲང༌ང༌ ཧོལ༌ཏོར༌ པུད༌ཏེ༌ མལ༌ཙའ༌ ཉམ༌པོ༌ ཁོ༌ ཡེ༌ཤུའི༌ དུན༌ལ༌ ཕབས༌།
5 ཁོང༌གུན༌ནི༌ མི༌བོ༌ གྱལ༌ཅུག༌ཅེས༌སི༌ ཏད༌པ༌ ཅོ༌ཁན༌བོ༌ ཡེ༌ཤུའི༌ ཟིགས༌ཏེ༌ ཁོང༌ངི༌ ཟའ༌ཕོག༌ཁན༌བོའ༌ མོལས༌, "བུ༌ཚ༌, ངའེ༌ ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏང༌ངད༌།"
6 ཏེ༌ཀ༌ དུགས༌ཏེ༌ ཡོད༌ཁན༌ནི༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌གི༌ སེམས༌སི༌ ནང༌ང༌ སམས༌,
7 "ཁོའེ༌ ཏེ༌ཟུག༌ ཅིའ༌ ཟེར༌ར༌ནོག༌? ཁོའེ༌ དད༌ལོག༌ ཅོས༌ཏེ༌ ཨིན༌ནོག༌། དཀོན༌མཆོག༌ མ༌སྟོག༌ སུའ༌ སྡིག༌པ༌ ཤགས༌པ༌ སལ༌ ཉན༌ཨིན༌།"
8 ཏེན༌ན༌མལ༌ལ༌ ཁོང༌གུན༌ནི༌ སེམས༌སི༌ ནང༌ང༌ སམ༌ཁན༌བོ༌ ཡེ༌ཤུའི༌ ཁྱེན༌ཏེ༌ ཁོང༌གུན༌ལ༌ མོལས༌, "ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ འི༌ཟུག༌ ཅིའ༌ སམ༌མད༌?
9 ཟའ༌ཕོག༌ཁན༌བོའ༌, 'ཁྱོ༌རང༌ངི༌ སྡིག༌པའ༌ ཤགས༌པ༌ ཏངས༌ཏེ༌ ཨིན༌' ཟེར༌ཅེས༌པོ༌ ལ༌མོ༌ ཨིན༌ནོག༌ག༌ ཡ༌ 'ལངས༌ཏེ༌ ཁྱོ༌རང༌ངི༌ མལ༌ཙ༌ ཁུར༌ཏེ༌ གྲུལ༌' ཟེར༌ཅེས༌པོ༌?
10 ཨིན༌ནའང༌ མི༌རིགས༌སི༌བུའ༌ ཇིག༌རྟེན༌ནི༌ཀ༌ སྡིག༌པའ༌ ཤགས༌པ༌ ཏང༌ཅེས༌སི༌ ཝང༌ཆའ༌ ཡོད༌ཁན༌བོ༌ ཁྱོ༌ཞའ༌ ལྟན༌ཨིན༌" ཏེ༌ནེ༌ ཡེ༌ཤུའི༌ ཟའ༌ཕོག༌ཁན༌བོའ༌ མོལས༌,
11 "ངའེ༌ ཁྱོ༌རང༌ང༌ ཟེར༌རད༌, ལོངས༌, རང༌ངི༌ མལ༌ཙ༌ ཁུར༌ཏེ༌ ཁང༌པ༌ སོང༌།"
12 ཏེན༌ན༌མལ༌ལ༌ མི༌ ལྟའ༌ཁན༌ ཚང༌མའེ༌ དུན༌ལ༌ ཁོ༌ ལངས༌ཏེ༌ ཁོ༌རང༌ངི༌ མལ༌ཙ༌བོ༌ ཁུརས༌ ཡང༌ གྲུལ༌ཏེ༌ སོང༌། ཁོང༌ ཚང༌མ༌ ཧ༌ལས༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, "ང༌ཞ༌གུན༌ལ༌, འི༌ ཙོགས༌ཤིག༌ མ༌ནེ༌ མ༌ཐོང༌།"
ཡེ༌ཤུའི༌ མད༌ཐཱ༌ བོད༌ད༌ ཛདས༌།
2:13 ནེ༌ 17
13 ཏེ༌ནེ༌ ཡང༌སྐྱར༌ གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ སྐྱོདས༌, ཡང༌ ཁོང༌ ཡོད༌ས༌ ཡོང༌ཁན༌ནི༌ མི༌ཚོགས༌གུན༌ལ༌ ཆོས༌ཤད༌ད༌ ཛདས༌།
14 ཁོང༌ ཞབ༌གྲུལ༌ལ༌ སྐྱོད༌ ཟ༌ནེ༌ ཁོང༌ངི༌ ཨལ༌ཕཱི༌འུས༌སི༌ བུ༌ཚ༌ ལི༌ཝི༌, ཁྲལ༌ནེན༌སའེ༌ ནས༌སའེ༌ཀ༌ དུགས༌ཏེ༌ ཡོད༌ད༌ ཟིགས༌ ཡང༌ ཁོང༌ངི༌ ཁོའ༌ མོལས༌, "ངའེ༌ སྟིང༌རང༌ནེ༌ བྲོངས༌།" ཁོ༌ ལངས༌ཏེ༌ ཡེ༌ཤུའི༌ སྟིང༌རང༌ནེ༌ བྲངས༌།
15 སྟིང༌ནེ༌ ཡེ༌ཤུ༌ ལི༌ཝིའི༌ ཁང༌པ༌ གོང༌ཟན༌ དོན༌ན༌ལ༌ སྐྱོདས༌, ཁྲལ༌ལེན༌ཁན༌ དང༌ ཞན༌ སྡིག༌ཅན༌ མི༌ མང༌པོའང༌ ཡེ༌ཤུ༌ དང༌ ལོབ༌ཕྲུགས༌གུན༌ ཉམ༌པོ༌ ཁར༌ཇི༌ ཟའ༌ལ༌ ཡོད༌པིན༌ ༼ཡེ༌ཤུའི༌ སྟིང༌རང༌ནེ༌ བྲངས༌ཁན༌ མང༌ཆེའ༌ ཏེ༌ཙོགས༌སི༌ མི༌གུན༌ ཨིན༌པིན༌༽།
16 ཕ༌རུ༌ཤི༌པ༌ ཆོས༌ཁྲིམས༌ལ༌ ཁས༌པ༌གུན༌ནི༌, ཡེ༌ཤུ༌ ཁྲལ༌ནེན༌ཁན༌ དང༌ སྡིག༌ཅན༌ གུན༌ ཉམ༌པོ༌ དོན༌ཏང༌ དོན༌ཨིན༌ ཐོང༌ང༌ཅིག༌, ཁོང༌ངི༌ ལོབ༌ཕྲུགས༌གུན༌ལ༌ ཏྲིས༌, "ཁོང༌ ཁྲལ༌ལེན༌ཁན༌ དང༌ སྡིག༌ཅན༌ མི༌གུན༌ ཉམ༌པོ༌ ཅིའ༌ དོན༌ཏང༌ དོན༌ན༌ནོག༌?"
17 ཡེ༌ཤུའི༌ ཏེ༌བོ༌ སན༌ན༌ཅིག༌ ཁོང༌གུན༌ལ༌ མོལས༌, "ཟུ༌མོ༌ ཡོང༌ཁན༌ཞིག༌ག༌ མ༌ནེ༌ ཁམ༌ཟང༌ མི༌ཞིག༌ག༌ ཨམ༌ཆི༌ གོས༌ས༌ མ༌ནོག༌། ངའ༌ ཁྱོ༌ཞ༌ དྲང༌པོ༌ ཨིན༌ སམ༌ཁན༌གུན༌ལ༌ མན༌པ༌, སྡིག༌ཅན༌གུན༌ལ༌ བོད༌ད༌ ཡོངས༌པིན༌།"
ཡེ༌ཤུའི༌ ནང༌ང༌ མི༌ཚེ༌ ཕུད༌ཚུལ༌ སོ༌མ༌བོ༌, སྙིང༌པ༌བོ༌ སང༌ སོ༌སོ༌ ཨིན༌ནོག༌།
2:18 ནེ༌ 22
18 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པ༌གུན༌ ཉེ༌ནས༌ལ༌ དུགས༌ཏེ༌ ཡོད༌དི༌ ཏུས༌ཤིག༌ག༌, མི༌ ཁ༌ཅིག༌, ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌, "ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པ༌གུན༌ ཉེ༌ནས༌ལ༌ དུག༌དུག༌, ཨིན༌ནའང༌ ཉེ༌རང༌ངི༌ ལོབ༌ཕྲུགས༌གུན༌ ཅིའ༌ ཉེ༌ནས༌ལ༌ དུག༌ག༌ མ༌ནོག༌?"
19 ཡེ༌ཤུའི༌ ལན༌སལས༌, "བག༌སྟོན༌ནི༌ ནང༌ང༌ མག༌པ༌ ཉམ༌པོ༌ ཡོད༌ ཟ༌ནེ༌ ཁོའེ༌ གྲོན༌པོ༌གུན༌ ཉེ༌ནས༌ལ༌ དུག༌ཨིན༌ན༌? མི༌དུག༌།
20 ཨིན༌ནའང༌ ཏུས༌པོ༌ ལེབ༌ཨིན༌ ནམ༌ མག༌པ༌ གྲོན༌པོ༌གུན༌ནེ༌ ཕེས༌ཏེ༌ ཁྱེར༌ཨིན༌, ཏེ༌ནེ༌ ཁོང༌གུན༌ནི༌ རྡུག༌པོ༌ ཅོས༌ཏེ༌ ཉེ༌ནས༌ལ༌ དུག༌ཨིན༌།"
21 "སུ༌ཞིག༌གིའང༌ ཀོས༌ལག༌ སྙིང༌པ༌ཞིག༌ག༌ ལྷན༌བ༌ སོ༌མ༌ ཏབ༌བ༌ མ༌ནོག༌, གལ༌ཏེས༌ ཏབ༌ན༌ ཀོས༌ ཁྲུའ༌ཅིག༌ ལྷན༌བ༌ སོ༌མ༌བོ༌ ཁོངས༌ཏེ༌ ཀོས༌ ཆད༌ཁན༌བོ༌ མང༌ང༌ ཐུའ༌ ཅོའ༌ནོག༌།"
22 "ཏེན༌ན༌ ཙོགས༌ལ༌ ཆང༌ སོ༌མ༌ པགས༌པའེ༌ སྐྱ༌པ༌ སྙིང༌པའེ༌ ནང༌ང༌ མི༌ལུག༌། གལ༌ཏེས༌ ལུག༌ན༌ ཆང༌བོའ༌ སྐྱུར༌ ལངས༌ཏེ༌ པགས༌པའེ༌ སྐྱ༌པ༌ བོས༌ཏེ༌ ཆད༌ཨིན༌, ཆང༌ བོ༌ཏེ༌ སྐྱ༌པའང༌ དོད༌མེད༌ ཆེན༌། ཆང༌ སོ༌མ༌ པགས༌པའེ༌ སྐྱ༌པ༌ སོ༌མའེ༌ ནང༌ང༌ ལུག༌ཨིན༌།
ཡེ༌ཤུ༌ ཤབ༌བད༌དི༌ ཞག༌གི༌ གཙོ༌བོ༌།
2:23 ནེ༌ 28
23 གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ ཁོང༌ ཉམ༌པོ༌ གྲུལ༌ལད༌པིན༌། ཁོང༌གུན༌ནི༌ ཞིང༌ངི༌ སྙེ༌མ༌ ཅད༌ཅེས༌ གོ༌ཟུག༌།
24 ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཟེརས༌, "ལྟོས༌སའང༌ ཁོང༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཅིའ༌ ཆོས༌ཁྲིམས༌ ཅག༌ག༌ནོག༌?"
25 ཡེ༌ཤུའི༌ ལན༌སལས༌, "དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡང༌ སྒོས༌དོམ༌མི༌ ནང༌ང༌ ཡོད༌ ཟ༌ནེ༌ ཅི༌ ཅོས༌ དམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌ནེ༌ མ༌སིལ༌པིན༌ན༌?
26 ཨ༌བི༌འ༌ཐར༌ ཡ༌ཧུ༌དཱ༌པའེ༌ བླ༌མ༌ ཆེན༌མོ༌ འིན༌ནི༌ ཏུས༌, དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌ཏེ༌ དམ༌པའེ༌ ཏ༌གི༌ ཟོས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌, ཡང༌ ཁོའེ༌, ཕྲོ༌པ༌གུན༌ལའང༌ ཏངས༌།"
27 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, "མི༌ ངལ༌ཚོའེ༌ ཞག༌པོའེ༌ ཕན༌ཐོགས༌སི༌ ཕིའ༌ མན༌པ༌, ངལ༌ཚོའེ༌ ཞག༌པོ༌ མིའི༌ ཕན༌ཐོགས༌སི༌ ཕིའ༌ ཅོའ༌ ཛདས༌།
28 ཏེན༌ན༌བོའེ༌ཕིའ༌ མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།"