11
སྤང༌པོ༌ སལ༌ཁན༌ ཉིས༌།
11:1 ནེ༌ 14
1 ཏེ༌ནེ༌ ཚད༌ ཏབ༌བ༌ ཀོལ༌ཁན༌ནི༌ བེར༌ཀ༌ཞིག༌ སལ༌ཏེ༌ ངའ༌ མོལ༌ལ༌རག༌, "སོང༌ཏེ༌ དཀོན༌མཆོག༌གི༌ ཆོད༌ཁང༌ དང༌ ཆོད༌ཁྲི༌ ཚད༌པོ༌ ལེན༌, ཡང༌ ཏེ༌རུ༌ ཅོལ༌ཨིན༌ ཡོད༌ཁན༌ ཚང༌མའེ༌ ཀྲངས༌ཀ༌གུན༌ ལེན༌།
2 ཨིན༌ནའང༌ ཆོད༌ཁང༌ངི༌ ཕི༌ལོག༌ག༌ ཡོད༌ཁན༌ནི༌ ནས༌ས༌བོ༌ ཏབ༌ མ༌ཏབ༌, ཅིའ༌ཟེར༌ན༌ ངའེ༌ ཏེ༌བོ༌ ཏེ༌ གྱལ༌ཁམས༌གུན༌ལ༌ སྟད༌ཏེ༌ ཨིན༌, ཀ༌བོའེ༌ ཡེ༌རུ༌ཤ༌ལེམ༌མི༌ དམ༌པའེ༌ གྱལ༌ས༌བོ༌ ཟླ༌ཝ༌ 42 ཚག༌པ༌ ཝང༌ངི༌ ཡོག༌ག༌ ནན༌ཏེ༌ བོར༌ཨིན༌།
3 ངའེ༌ ང༌རང༌ངི༌ སྤང༌པོ༌ ཉིས༌ལ༌ ཝང༌ཆ༌ ཏང༌ཨིན༌, ཁོང༌གུན༌ནི༌ རྡུག༌གོས༌ གོན༌ཏེ༌ ཞག༌ 1,260 ལུང༌སྟན༌ ཤད༌ཨིན༌།"
4 "འི༌ སྤང༌པོ༌ ཉིས༌ཀོ༌ ནི༌, ཇིག༌རྟེན༌ནི༌ ཝང༌སྲུལ༌པ༌ གཙོ༌བོའེ༌ དུན༌ལ༌ ཡོད༌ཁན༌ནི༌ ཨོ༌ལིཝ༌ཝི༌ ལྕང༌མ༌ ཉིས༌ དང༌ འོད༌སྟགས༌ ཉིས༌ཀོ༌ ཨིན༌ནོག༌ །
5 གལ༌ཏེས༌ སུ༌ཞིག༌གི༌ ཏེ༌ ཉིས༌ཀོའ༌ ནོད༌པ༌ ཏང༌ཅེས༌ ཅོ༌ན༌, ཏེ༌ ཉིས༌ཀོའེ༌ ཁའ༌ནེ༌ མེ༌ བིངས༌ཏེ༌ གྲ༌འོ༌གུན༌ མེད༌ཁན༌ ཅོ༌ཨིན༌, ཡང༌ ཏེ༌ ཉིས༌ཀོའ༌ ནོད༌པ༌ ཅོ༌ཅེས༌སི༌ རྩོན༌གྲུས༌ ཅོ༌ཁན༌གུན༌ ཏེན༌ན༌ ཚུལ༌ལ༌ ཤི༌ཨིན༌།
6 ཁོང༌གུན༌ནི༌ ལུང༌སྟན༌ ཤད༌དི༌ ཏུས༌ གང༌པོ༌ ཆར༌པ༌ མི༌བབས༌ཤེས༌སི༌ ཕིའ༌ ནམ༌ཁའ༌ ཀབ༌ཅེས༌སི༌ ཝང༌ཆ༌ ཁོང༌གུན༌ལ༌ སལ༌ལ༌ ཛདས༌། ཡང༌ ཆུ༌ ཚང༌མ༌ ཁྲག༌ག༌ གྱུར༌ཅུག༌ཅེས༌ དང༌ ནམ༌ ཁོང༌གུན༌ ཐད༌ནའང༌, ཇིག༌རྟེན༌ནི༌ ཏད༌པ༌ མེད༌ཁན༌ནི༌ མི༌གུན༌ལ༌ རྡུག༌ངལ༌ སྣ༌ ཚང༌མ༌ ཡོང༌ཅུག༌ཅེས༌སི༌ ཝང༌ཆ༌ སལས༌།
7 ཁོང༌ ཉིས༌ཀོའེ༌ དཀོན༌མཆོག༌གི༌ བཀའ༌ ཤད༌ཅེས༌གུན༌ དྲན༌དྲ༌ གྲུབ༌ ཚར༌ར༌ཅིག༌, ཇིགས༌ནང༌ཅན༌ནི༌ སེམས༌ཅན༌བོ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ནེ༌ བིངས༌ཏེ༌, ཁོང༌ ཉིས༌ཀོའེ༌ཀ༌ སྤུང༌གོལ༌ ཅོ༌ཨིན༌, ཡང༌ ཕམ༌ཀལ༌ཏེ༌ སད༌ཨིན༌།
8 ཁོང༌ ཉིས༌ཀོའེ༌ རོ༌གུན༌ འི༌ གྱལ༌ས༌ མིང༌ཅན༌བོའེ༌ སྲང༌གུན༌ནི༌ ནང༌ང༌ ལུས༌ཨིན༌, ཀ༌བོའ༌ དཀོན༌མཆོག༌གི༌ སོ༌དོམ༌ དང༌ ཨི༌ཇིབ༌ ནས༌ས༌ ཙོགས༌ ཐེའ༌ ཛདས༌། ཏེ༌ ནས༌སའེ༌ ནང༌ང༌ གཙོ༌བོ༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ཏེ༌ ཨིན༌པིན༌།
9 ཡང༌ ཞག༌ སུམ༌ནང༌ཕེད༌ ཚག༌པ༌ མི༌རིགས༌, སྐད༌རིགས༌ དང༌ གྱལ༌ཁམས༌ ཚང༌མའེ༌ མི༌གུན༌ནི༌, ཁོང༌ ཉིས༌ཀོའེ༌ རོ༌གུན༌ལ༌ ལྟས༌ཏེ༌ དུག༌ཨིན༌, ཡང༌ ཏེ༌གུན༌ནི༌ སུ༌ཞིག༌གའང༌ ཏེ༌ རོ༌གུན༌ སྤུར༌ཁང༌ངི༌ ནང༌ང༌ སུབ༌ མི༌ཅུག༌།
10 ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌, ཁོང༌ ཉིས༌ཀོ༌ ཤི༌ཁན༌བོའེ༌ཀ༌ ཐད༌པོ༌ ཅོ༌ཨིན༌, ཅིག༌ དང༌ ཅིག༌ག༌ སྐྱེས༌གུན༌ ཏངས༌ཏེ༌ གའ༌སྟོན༌ ཅོ༌ཨིན༌, ཅིའ༌ཟེར༌ན༌ ཏེ༌ ལུང༌སྟོན༌པ༌ ཉིས༌ཀོའེ༌ ཇིག༌རྟེན༌པ༌གུན༌ལ༌ ནགས༌ ལྟན༌ཏེ༌ ཨིན༌པིན༌།
11 ཨིན༌ནའང༌ ཞག༌ སུམ༌ནང༌ཕེད༌དི༌ སྟིང༌ནེ༌ དཀོན༌མཆོག༌གི༌ སལ༌ཁན༌ནི༌ སྲོག༌གི༌ འུགས༌པོ༌ ཁོང༌གུན༌ནི༌ ནང༌ང༌ ཞུགས༌ཏེ༌ ཁོང༌ ཉིས༌ཀོ༌ ཀོའག༌ ལངས༌, ཡང༌ ཁོང༌ ཉིས༌ཀོ༌ ཐོང༌ཁན༌ ཚང༌མ༌ མ༌སྲན༌ཏྲེ༌ ཇིགས༌།
12 ཏེ༌ནེ༌ ནམ༌ཁའ༌ནེ༌ སྐད༌ ཆེན༌མོ༌ཞིག༌གི༌ ཁོང༌ ཉིས༌ཀོའ༌ མོལས༌, "འི༌རུ༌ ཀེན༌ལ༌ ཡོང༌།" ཁོང༌ ཉིས༌ཀོ༌ ནམ༌ཁའེ༌ ནང༌ང༌ སྲིན༌ནི༌ཀ༌ ཞོན༌ཏེ༌ སྐྱོདས༌, ནམ༌ ཁོང༌ ཉིས༌ཀོའེ༌ གྲ༌འོ༌གུན༌ ལྟེན༌ ཡོད༌པིན༌།
13 ཏེན༌ན༌མལ༌ལ༌ སང༌གུལ༌ སྲན༌ཏྲེ༌ཞིག༌ ཡོངས༌ཏེ༌ གྱལ༌སའེ༌ ཁག༌ རྕུའི༌ ནང༌ནེ༌ ཁག༌ཅིག༌ ཟམ༌ཤིག༌ ཁྲེས༌སྟོར༌ སོང༌། མི༌ སྟོང༌རྡུན༌ ཤི༌། སོན༌ཏེའ༌ ལུས༌ཁན༌གུན༌ མ༌སྲན༌ཏྲེ༌ ཇིགས༌, ཡང༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌ ནི༌ ཀུན༌ཝང༌ ཨིན༌ཁན༌བོ༌ ཁའ༌ རྟོར༌ཏེ༌ ཟེརས༌།
14 ཇིགས༌པ༌ ཉིས༌པ༌བོ༌ བུད༌ཚར༌, ཨིན༌ནའང༌ ལྟོས༌སའང༌, ཇིགས༌པ༌ སུམ༌པ༌བོ༌ གྱོགས༌པ༌ ལེབ༌ཅེས༌དུག༌།
ཏུང༌ རྡུན༌པ༌བོ༌ ཕུས༌།
11:15 ནེ༌ 19
15 ཕོ༌ཉ༌ རྡུན༌པའེ༌ ཏུང༌ ཕུའ༌ཅིག༌, ངའ༌ ནམ༌ཁའ༌ནེ༌ སྐད༌ ཆེན༌མོ༌ཞིག༌གི༌ མོལ༌ལ༌ རག༌, "ཇིག༌རྟེན༌ནི༌ གྱལ༌སྲིད༌པོ༌ ཏ༌ གཙོ༌བོ༌ དཀོན༌མཆོག༌ དང༌ ཁོང༌ངི༌ མ༌ཤི༌ཀའེ༌ གྱལ༌སྲིད༌ གྱུར༌ཏེ༌ ཨིན༌ནོག༌, ཡང༌ ཁོང༌ངི༌ ཏུས༌གྱུན༌ནེ༌གྱུན༌ ཝང༌སྲུལ༌ལ༌ ཛད༌ཨིན༌།"
16 དཀོན༌མཆོག༌གི༌ སྐུན༌དུན༌ལ༌ ཁོ༌རང༌གུན༌ནི༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ནི༌ འུ༌སྐྱོང༌ 24 བོའེ༌ དཀོན༌མཆོག༌ག༌ ཆག༌ཕུལ༌ཨིན༌ ཁོང༌ང༌ ཅོལས༌།
17 ཁོང༌གུན༌ནི༌ མོལས༌,
"ཀྱེ༌ གཙོ༌བོ༌ དཀོན༌མཆོག༌ ཀུན༌ཝང༌, ཉེ༌རང༌ དག༌ས༌ ཞུགས༌ཁན༌ དང༌
སྔུན༌ལ༌ ཞུགས༌ཏེ༌ ཡོད༌ཁན༌ ཨིན༌ནོག༌, ང༌ཞ༌གུན༌ནི༌ ཉེ༌རང༌ང༌ ཐུག༌རྗེ༌ཆེ༌ ཞུའད༌,
ཅིའ༌ཟེར༌ན༌ ཉེ༌རང༌ངི༌ རང༌ངི༌ ཝང༌ ཀྲག༌པོ༌ ཀོལ༌ཏེ༌
ཉེ༌རང༌ངི༌ ཝང༌སྲུལ༌བོ༌ གོ༌ཟུག༌ག༌ ཛད༌ཏེ༌ ཨིན༌ནོག༌།
18 ཏད༌པ༌ མེད༌ཁན༌ནི༌ གྱལ༌ཁམས༌གུན༌ སྲོའེ༌ གངས༌ཏེ༌ ཨིན༌ནོག༌།
ཨིན༌ནའང༌ ཏ༌ ཉེ༌རང༌ངི༌ ཐུགས༌སྲོའེ༌ ཏུས༌པོ༌ ལེབས༌ཏེ༌ ཨིན༌ནོག༌,
ཡང༌ ཤི༌ཁན༌གུན༌ལ༌ ཤགས༌ ཅད༌ཅེས༌,
ཉེ༌རང༌ངི༌ ཞབ༌སྟོག༌པ༌གུན༌, ལུང༌སྟོན༌པ༌གུན༌, དམ༌པ༌ མི༌གུན༌,
འུ༌ཐུགས༌ དང༌ ཇིགས༌པོ༌ ཉེ༌རང༌ང༌ ཇིགས༌ཁན༌ ཚང༌མ༌ལ༌,
སོལ༌རས༌ སལ༌ཅེས༌ ཡང༌ ཇིག༌རྟེན༌ ཁྲེས༌སྟོར༌ ཅོ༌ཁན༌གུན༌
ཁྲེས༌སྟོར༌ ཛད༌ཅེས༌སི༌ ཏུས༌པོ༌ ལེབས༌ཏེ༌ ཨིན༌ནོག༌།"
19 ཡང༌ ངའེ༌ ནམ༌ཁའེ༌ ནང༌ང༌ དཀོན༌མཆོག༌གི༌ ཆོད༌ཁང༌ ཕེས༌ཏེ༌ ཡོད༌ཁན༌ནི༌ ནང༌ང༌ ཁོང༌ངི༌ ཆད༌དོན༌ནི༌ སྒམ༌བོ༌ ཇལ༌། ཡང༌ སྐམ༌ལག༌གི༌ འོད༌, ཇིགས༌ཤེས༌ཅན༌ནི༌ སྐད༌, ཆད༌མེད༌ལ༌ བྲུག༌ཀྲག༌པོ༌ལྡིར༌, སང༌གུལ༌ ཡོངས༌, ཡང༌ ཇིགས༌ནང༌ཅན༌ནི༌ སེར༌ར༌རུ༌ ཆེན༌མོ༌ བབས༌།