8
เอซรา ลาว โกตไม ยุฮ พะจาว ละ โม ลัปซด่อน
1-2 เญือม เอีจ มัฮ อื ซเงะ ติ, เคิ อาแลฮ นึง อื, โม อิซราเอน เตือง โอยจ อื เอีจ อาวต นึง ย่วง แตะ ไอฮ เตือง ไพ เตือง มัน. โม อิซราเอน ฮอยจ โพรม ดิ ไม่ ปุ แตะ นึง เวียง เยรูซาเลม, นึง กังเด่น โบ โตะ รเวือะ รอาวม. โม เซ ปัว เอซรา ป มัฮ คู เพอึก โกตไม เซ ตุย นังซื โกตไม ยุฮ ไอ โมเซ ป เกือฮ พะจาว ละ โม อิซราเอน เซ ละ แตะ.
เญือม เซ, เอซรา ป มัฮ ซตุ เซ ตุย เนอึม โรวก นังซื โกตไม เซ ฮอยจ นา ก โพรม ปุย, อาวต ไม่ อื ลั่กกา โม ป โพรม เซ. โม ป โพรม เซ ไก เตือง ปรเมะ ปรโปวน, เตือง กวนดุ เมาะ ป เอีจ เกียฮ คาวไจ ป อัฮ ปุย.
3 เอซรา เซ อาวต ลั่กกา ปุย นึง กังเด่น โบ โตะ รเวือะ รอาวม นึง กไน เวียง เซ. ลาว นังซื โกตไม ยุฮ พะจาว เซ ละ ปุย โม เซ, เน่อึม เมือ กซะ อื ฮอยจ ละ ง่อน ซเงะ. ปุย โม เซ ดาวง เนอึม ฮยวก แตะ ละ ง่อต แตะ ป อัฮ อื เซ โครยญ โฆะ แตะ.
4 เอซรา ป มัฮ คู เพอึก พะทัม เซ ชุง นึง เวที ป ยุฮ ปุย นึง โคะ ละ โกว อื นึง กัน เซ. ป มัฮ มัตทีทิยา, เชมา, อานายา, อุรีอา, ฮินคียา, ไม่ มาอาเซอา, ชุง ลวง เฆียง ลั่ก ดอม อื. ป มัฮ เปด่ายา, มิชาเอน, มันคิยา, ฮาชุม, ฮัตบั่ตด่านา, เซคาริยา, ไม่ เมชุนลัม, ชุง ลวง เฆียง ลั่ก วิ อื.
5 เญือม ชุง เอซรา นึง เวที เซ, ปุย ชวน เอิน อื เตือง โอยจ แตะ นึง ฮลาวง ก อาวต อื ฮา ปุย ไฮญ. เญือม เอีจ ไลฮ อื นังซื เซ ปุย โกฮ ชุง เอิน เตือง โอยจ แตะ.
6 เอซรา อัฮ เฮี, “ลืลาว เยโฮวา ป มัฮ พะจาว ป ตึก นึง ระ นัน นึง ฮลาวง แตะ,” อัฮ เซ. เญือม เซ ปุย เตือง โอยจ อื ยวก เตะ แตะ อัฮ เฮี ไม่ อื, “อาเมน, อาเมน,” อัฮ เซ. ฟวยจ เซ นุ่ม ไว พะจาว ปอ จิ ไกญ แตะ เตะ.
7 เญือม เซ เยชูอา, บ่านี, เชเรบี่ยา, ยามิน, อักคุป, ชัปเบ่ไท, โฮดี่ยา, มาอาเซอา, เคลิทา, อาซาริยา, โยซาบั่ต, ฮานัน, เปไลยา, ป มัฮ โม เลวี เซ, เรอึม เพอึก โม ลัปซด่อน เกือฮ อื คาวไจ ไลลวง พะทัม โกตไม ยุฮ พะจาว เซ. โม ลัปซด่อน เซ ชุง ลั่ง นา ก อาวต แตะ เซ.
8 ปุย โม เซ ลาว นังซื โกตไม ยุฮ พะจาว เซ ละ อื แปนๆ คัก อื ไม่ อาทิไบ่ อื ควัมไม อื ละ ซ เกือฮ อื เยือ คาวไจ ละ ปุย.
9 โม ลัปซด่อน เญือม ฮมอง อื รซอม ป ลาว ปุย ละ แตะ เซ, เยือม เอิน ฆาื อื. เญือม เซ เนฮะมี ป มัฮ จาวเมือง ไม่ เอซรา ป มัฮ ซตุ ไม่ มัฮ อื คู เพอึก พะทัม, ไม่ โม เลวี ป เกียฮ อาทิไบ่ ไลลวง โกตไม ยุฮ พะจาว เซ, อัฮ อื ละ ปุย ตอก เฮี, “เนาะ เฮี มัฮ ซเงะ ซัมคัน ละ เยโฮวา พะจาว ยุฮ เปอะ. ปุ เยือม, ปุ เกือฮ ติ เปอะ ตุก รพาวม เฟือฮ เอิน,” อัฮ เซ.
10 เนฮะมี อัฮ เฮี, “เอีญ ฮา นึง ย่วง เปอะ เมิฮ. เอีญ โซม ญุ่ก กุก ญึม นึง ย่วง เปอะ เซ. ไมจ เปอะ รฆุ ป โซม ไม่ รอาวม อะงุน ยุฮ แตะ ละ โม ป โอ ไก. ซเงะ เนาะ เฮี มัฮ ซเงะ ซัมคัน ละ พะจาว ยุฮ เอะ. ปุ เญาะ เกือฮ ติ เปอะ ไลจ รพาวม เฟือฮ เอิน. รพาวม ไมจ มวน ป เกือฮ พะจาว ละ เปอะ เซ ซ แปน เรียง แด่น ละ เปอะ,” อัฮ เซ.
11 ป มัฮ โม เลวี เซ ดวน ปุย ญึ่ต. อัฮ เฮี ละ อื, “ปุ เญาะ เยือม. เนาะ เฮี มัฮ ซเงะ ซัมคัน, ปุ เญือะ เกือฮ ติ เปอะ ตุก เปละ นัน พาวม,” อัฮ เซ.
12 เญือม เซ โม ลัปซด่อน เตือง โอยจ อื เอีญ เนอึม นึง เญือะ แตะ, โซม ญุ่ก กุก ญึม ไม่ ปุ แตะ. ปุย รฆุ เนอึม ป โซม ป ปอน ไม่ ปุ แตะ, นึง เอีจ คาวไจ อื ไลลวง พะทัม โกตไม ป ลาว ปุย ละ แตะ เซ.
กัน ชลอง อาวต นึง เตอึป
13 ซเงะ ลอา นึง อื โม ป มัฮ ฮัวนา ปุย โฮวน เซ โครยญ ซฆลาวม อื, ไม่ โม ซตุ, ไม่ โม เลวี, โฮว เคะ เอซรา ป มัฮ คู เพอึก พะทัม, ละ ซ เฮียน อื โกตไม ยุฮ พะจาว เซ.
14 โม เซ ยุ นังซื โกตไม ป เกือฮ พะจาว ละ ไอ โมเซ ไพรม อื โฮ, เกว ไม่ ไลลวง ไมจ โม อิซราเอน อาวต นึง เตอึป เญือม ไก กัน เลียง อื ปุ แตะ ไน เคิ อาแลฮ เซ.
15 มัฮ เซ ป ดวน อื ปุย โฮว ครอฮ ละ ปุย นึง เวียง เยรูซาเลม, ไม่ นึง ย่วง ระ ย่วง แตวะ โครยญ โดฮ ฆาื อื ตอก เฮี, “ไมจ เปอะ โฮว ฮอยจ นึง บลาวง ไม่ ตุย เปอะ โรวก กัก โคะ กาวก, โคะ ฆิ, โคะ ลออยฮ ซงา, โคะ อินทพลัม, ไม่ กัก โคะ ป เกลอึม ฮละ ป ไก นึง บลาวง เซ, ละ ซ ยุฮ เปอะ เตอึป นึง, ตัม ป ไซฮ ปุย อาึง เซ,” อัฮ เซ.
16 เญือม เซ โม ลัปซด่อน โฮว ตุย เนอึม กัก โคะ โม เซ ละ ซ ยุฮ แตะ เตอึป นึง ละ โกะ แตะ. ง่อน อื ยุฮ อื นึง ดั่ตฟะ เญือะ แตะ, ง่อน อื ยุฮ อื นึง เฆียง เญือะ แตะ, ง่อน อื ยุฮ อื นึง ควง วิฮัน, ง่อน อื ยุฮ อื นึง กัง เด่น โบ โตะ รเวือะ รอาวม, ไม่ โบ โตะ รเวือะ เอฟราอิม นึง กไน เวียง เซ.
17 โม ลัปซด่อน เตือง โอยจ อื เมาะ ป เอีญ เน่อึม แปน แตะ ครา เซ, ยุฮ เนอึม เตอึป ละ อาวต แตะ ลโล่ะ นึง. โม เซ ไก เนอึม รพาวม ไมจ มวน ไม่ ปุ แตะ กุม ปอ. เน่อึม เจน โยชูวา กวน นุน, ฮอยจ ละ ซเงะ เซ, โม อิซราเอน ดิ โฮลฮ โตว ยุฮ อื ตอก ยุฮ แตะ โฮน เฮี ติ ชวง.
18 โม เซ ชลอง กัน อาวต นึง เตอึป เซ อาแลฮ ซเงะ. เอซรา ลาว นังซื โกตไม ยุฮ พะจาว นึง กัน ชลอง เซ โครยญ ซเง่ะ, เน่อึม ซเงะ เมือ โรง อื ฮอยจ ละ ซเงะ ลอยจ อื. ซเงะ ซเตะ นึง อื มัฮ ซเงะ โพรม อื ไม่ ปุ แตะ ตัม ป ไซฮ ปุย อาึง นึง โกตไม เซ.