24
ᤕᤜᤢᤍᤡᤜᤠ᤹ᤖᤧ ᤐᤠᤘᤗᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢ᤹
1 ᤅᤠᤛᤡ ᤕᤧᤴ ᤀᤣᤃᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤏᤏᤡᤕᤠᤖᤧ ᤁᤢᤓᤠ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤋᤖᤋᤢᤗᤛ ᤔᤧᤵᤔᤏᤠᤒᤠ ᤁᤢᤓᤠᤱᤛᤧᤶᤒᤠᤴ ᤋᤣ᤹ᤖᤢᤀᤠᤱ ᤕᤥ ᤛᤡᤈᤖᤡᤕᤠ ᤕᤧᤰᤕᤰᤁᤥ ᤐᤣ. ᤂᤧᤵᤔᤥ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤍᤃᤡ ᤐᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤡ᤹ ᤀᤠᤵᤋᤡᤰ ᤐᤠ᤺ᤴᤏᤡᤴ ᤔᤧᤍᤥ᤺ᤴᤍᤢᤖᤥ॥
2 ᤐᤠᤘᤗᤧᤴ ᤂᤧᤵᤔᤥ ᤔᤧᤀᤢ᤺ᤳᤋᤢᤀᤠᤱ ᤋᤖᤋᤢᤗᤛᤖᤧ ᤂᤢᤏᤧ᤹ ᤀᤠᤵᤋᤡᤰ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤑᤧᤗᤡᤰᤛᤖᤧ ᤁᤢᤍᤃᤡ ᤕᤢᤰᤂᤢᤖᤥ–
“ᤀᤠᤍᤠᤱᤒᤠ ᤋᤢᤳᤋᤢ ᤛᤢᤜᤠᤱᤃᤧᤶᤒᤠᤀᤣ. ᤂᤧᤏᤧ᤹ ᤛᤡᤁᤢᤶᤏᤡᤒᤠ ᤁᤧᤗᤠᤶᤗᤥ᤺ᤸᤗᤧ ᤕᤖᤡᤰ ᤋᤱᤒᤣᤀᤠᤱᤎᤥ ᤀᤠᤏᤡᤃᤧ ᤛᤏᤠᤖᤢᤱᤅᤥ ᤘᤠ᤹ᤔᤠ ᤂᤥ᤺ᤛᤢᤶᤒᤧᤀᤠᤱ ᤘᤕᤡᤃᤧ. ᤜᤧᤰᤁᤩᤠᤱ ᤀᤠᤏᤡᤃᤧ ᤗᤠᤈᤣ᤹ᤀᤥ ᤌᤥᤒᤥᤀᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
3 ᤀᤠᤏᤡᤃᤧ ᤀᤠᤳᤋᤡᤛᤠᤱ ᤀᤠᤵᤑᤠᤸᤗᤧᤛᤠᤱ ᤂᤧᤏᤧ᤹ ᤏᤢ ᤏᤢ᤺ᤒ᤻ ᤏᤢ᤺ᤒᤠ ᤁᤧᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤸᤗᤧ ᤏᤡᤱᤘᤠ᤹ ᤛᤡᤃᤠᤱᤗᤠᤶ ᤂᤧᤏᤧ᤹ ᤏᤥᤃᤧᤴ ᤐᤡᤀᤠᤛᤡᤃᤧ᤹ᤖᤥ॥
4 ᤜᤧᤰᤁᤣ᤺ᤸᤗᤧ ᤕᤖᤡᤰ ᤜᤶᤔᤠᤛᤡᤃᤧᤛᤠᤱ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤀᤠᤏᤡᤃᤧ ᤐᤣᤗᤡᤃᤧᤴ ᤐᤠ᤺ᤴᤏᤡᤴ ᤆᤢᤰᤔᤢᤰᤁᤥ ᤂᤧᤵᤛᤧ᤹ ᤀᤠᤒᤡᤖᤧ᤹ᤀᤥ॥
5 ᤁᤴ ᤔᤏᤠ᤺ᤴ ᤀᤠᤏᤡᤃᤧ ᤁᤢ᤹ᤀᤡ ᤁᤧᤓᤧ᤹ᤒᤠ ᤏᤡ᤺ᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤁᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤕᤜᤢᤍᤡ ᤗᤢᤶᤔᤥ ᤒᤡᤑᤩᤢᤱ ᤆᤥᤃᤢᤖᤥ॥ ᤁᤴ ᤔᤏᤠ᤺ᤴ ᤏᤠᤛᤖᤡ ᤛᤠᤶᤕᤥ ᤏᤛᤠ᤺ᤴᤒᤠ ᤗᤠᤶᤗᤥ᤺ᤒᤠᤀᤠᤱᤗᤥ॥
6 ᤁᤴ ᤔᤏᤠ᤺ᤸᤗᤧ ᤔᤠᤱᤜᤡᤶᤔᤡᤴ ᤆᤡ᤺ᤶᤔᤠ ᤁᤥ᤺ᤳᤋᤢᤸᤗᤧ ᤀᤠᤏᤡᤃᤧ ᤋᤧᤶᤛᤢᤶᤒᤧᤒᤠᤖᤥ॥ ((ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤠᤛᤧᤴ ᤗᤥ᤺ᤴᤍᤢᤶᤒᤧᤔᤧᤴ
7 ᤁᤖ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤛᤠᤰᤁᤧᤸᤗᤧᤰ ᤀᤠᤏᤡᤃᤧ ᤜᤢᤰᤁᤥᤗᤠᤶ ᤁᤴ ᤔᤏᤠ᤺ᤴ ᤏᤠᤵᤋᤡᤃᤧᤀᤠᤱ ᤋᤣ᤹ᤖᤢᤖᤥ॥
8 ᤜᤧᤰᤁᤩᤠᤱ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤏᤠᤜᤠ᤹ ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤸᤗᤥ ᤔᤧᤍᤠᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥)) ᤀᤠᤍᤠᤱᤒᤠᤖᤧ ᤀᤠᤒᤠᤅᤣ ᤁᤴ ᤔᤏᤠ᤺ᤴ ᤛᤣ᤺ᤴᤃᤧᤍᤥ᤺ᤛᤢᤏᤧ ᤑᤠ᤹ᤃᤪ ᤀᤠᤏᤡᤃᤧ ᤁᤢᤍᤰᤗᤧᤱᤘᤠᤀᤥ ᤁᤢ᤺ᤳᤋᤢᤶᤒᤧᤒᤠ ᤀᤠᤵᤋᤡᤰᤁᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥”
9 ᤂᤧᤵᤔᤥ ᤘᤣ᤹ ᤕᤜᤢᤍᤡᤜᤠ᤹ᤖᤧᤀᤠᤱ ᤂᤧᤴ ᤀᤠᤵᤋᤡᤰᤁᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤢᤖᤠ ᤔᤧᤍᤱᤄᤢᤖᤥ॥
10 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤐᤠᤘᤗᤧᤴ ᤐᤠᤖᤧ᤹ ᤑᤠ᤹ᤀᤠᤱ ᤜᤢᤰᤆᤠ᤺ᤸᤁᤡ ᤐᤡᤖᤢᤀᤠᤱ ᤐᤠᤘᤗᤧᤴ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤀᤣ. ᤁᤴ ᤗᤠᤈᤣ᤹ᤀᤥ ᤂᤠᤛᤧᤴᤗᤥ᤺ᤶᤒᤠ ᤁᤧᤒᤥ᤺ᤰᤂᤧᤒᤠ ᤕᤖᤡᤰ ᤋᤱᤒᤣ ᤁᤧᤖᤧ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤏᤠᤱᤛᤡᤱᤔᤠ ᤀᤠᤒᤠ᤺ᤴᤏᤡᤴ ᤕᤢᤱᤔᤠ ᤀᤠᤛᤡᤖᤠ᤹ ᤌᤠᤱᤗᤥ॥
11 ᤕᤖᤢᤛᤗᤧᤶᤔᤥ ᤔᤠᤱᤛᤣᤘᤠ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤣᤃᤠᤱᤒᤠ ᤌᤡᤰ-ᤏᤧᤳ ᤕᤧᤴᤏᤠᤱ ᤔᤧᤱᤃᤧᤳᤋᤣ ᤘᤠ᤹ ᤁᤧᤗ᤹ᤒᤠᤱᤃ ᤀᤠᤍᤠᤱᤒᤠᤖᤧ ᤀᤢᤛᤢᤖᤢ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥
12 ᤕᤠᤵᤔᤡ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ᤖᤧ ᤔᤧᤍᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤔᤠᤱᤜᤡᤶᤔᤥ ᤐᤠ᤺ᤴ ᤌᤰᤁᤡ ᤕᤠᤃᤠᤱᤒᤠ. ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤕᤧᤰᤕᤰᤁᤥ ᤀᤠᤳᤋᤡᤛᤠᤱ ᤔᤏᤠᤜᤠ᤹ ᤜᤢᤛᤢᤱᤛᤡᤱᤗ ᤘᤕᤠᤱᤒᤠ ᤜᤥ᤺ᤵᤋᤧᤖᤥ॥
13 ᤂᤧᤱᤜᤠ᤹ᤖᤧ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰᤗᤧ ᤋᤥ᤺ᤴᤍᤡᤀᤠᤱ ᤋᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
14 ᤁᤖᤛᤠᤱ. ᤀᤡᤱᤃᤠ᤹ᤃ ᤀᤠᤏᤡᤃᤧ ᤌᤠ᤺ᤰᤌᤧᤒᤠᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤋᤧᤴᤍᤡᤱ ᤆᤥᤃᤢᤱᤗᤥ॥ ᤂᤧᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠ ᤕᤧᤛᤢᤖᤧ ᤁᤢᤗᤠᤶᤔᤡᤴ. ᤂᤧᤱᤜᤠ᤹ᤖᤧ ᤑᤥᤋᤩᤠᤒᤠ ᤔᤧᤔᤧᤳᤋᤢᤖᤥ॥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤏᤛᤠ᤺ᤴ ᤆᤥᤃᤢᤱᤗᤥ॥
15 ᤀᤡᤱᤃᤠ᤹ ᤂᤢᤏᤡ᤹ ᤜᤧᤰᤁᤣᤀᤣ ᤛᤠᤶᤕᤥᤏᤡᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤛᤠᤱ ᤆᤥᤃᤢᤱᤗᤥ॥
16 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤋᤃᤡ ᤛᤣᤛᤣ ᤂᤠᤛᤡᤱ ᤁᤵᤔᤠ ᤋᤶᤛᤡᤴ ᤆᤥ᤺ᤰᤁᤠᤖᤥ॥
17 ᤕᤖᤢᤛᤗᤧᤶᤔᤥᤏᤢ ᤗᤠ᤺ᤰᤁᤠᤳ ᤘᤕᤠᤱᤒᤠ ᤕᤖᤡᤰ ᤋᤱᤒᤣ ᤐᤥ᤺ᤰᤂᤧᤀᤠᤱ ᤂᤠᤖᤰ ᤀᤡᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤕᤜᤢᤍᤡᤕᤠᤛ᤻ᤔᤠ ᤀᤠᤔᤏᤠᤜᤠ᤹ ᤀᤣᤴᤋᤡᤀᤥᤰᤗᤠᤶ ᤛᤢᤶᤔᤏᤠᤒᤠ ᤜᤢᤰᤛᤥ ᤕᤠᤱ ᤜᤢ᤹ᤔᤠᤛᤡ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤵᤔᤥ ᤋᤩᤠᤱᤗᤥ॥
18 ᤀᤡᤱᤃᤠ᤹ ᤂᤠᤖᤰ ᤔᤠᤱᤜᤡᤶᤔᤥ ᤛᤣᤛᤣ ᤐᤥ᤺ᤱᤔᤠ ᤌᤡᤶ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤕᤠᤱᤅᤡᤸᤗᤧ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤔᤧᤏᤡ᤺ᤛᤠᤱ॥ ᤀᤡᤱᤃᤠ᤹ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤜᤥ᤺ᤵᤋᤧ. ᤜᤕᤱᤁᤡᤸᤗᤡᤱᤅᤠᤱ ᤜᤥ᤺ᤵᤋᤧ॥
19 ᤁᤖ ᤂᤧᤵᤔᤥ ᤀᤣᤛᤡᤕᤠ ᤋᤧᤱᤃᤵᤗᤠᤶ ᤁᤧᤍᤠ᤺ᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤏᤧ ᤑᤠ᤹ᤃᤪ ᤜᤠᤖᤠ᤹ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤵᤋᤡᤰ ᤋᤥ᤺ᤴᤇᤧ ᤔᤧᤍᤠᤖᤖᤥ॥
20 ᤔᤧ᤺ᤴᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤵᤔᤥ ᤁᤧᤘᤠ᤹ᤒᤠᤜᤠ᤹ᤖᤧᤀᤠᤱ ᤕᤧᤈᤢᤶᤓᤥᤀᤥ ᤏᤠᤱᤛᤡᤱᤛᤧ ᤕᤧᤒᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤄᤥ᤺ᤛᤢᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤔᤧᤍᤠᤖᤢᤸᤗᤧ ᤐᤥ᤺ᤱᤗᤥ.
21 ᤁᤖ ᤀᤡᤱᤃᤠ᤹ᤃ ᤂᤢᤏᤡ᤹ ᤋᤃᤠᤱ ᤀᤰᤂᤣᤗ᤹ᤖᤡᤰᤗᤰ ᤀ᤺ᤰᤋᤠᤱᤗ ᤕᤧᤒᤠᤱᤗᤥ. ‘ᤀᤡᤱᤃᤠ᤹ᤃ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠᤜᤠ᤹ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤀᤠᤄᤠᤛᤧᤴ ᤁᤧᤗᤥ᤺ᤴᤍᤡᤖ ᤁᤧᤒᤳᤇᤡᤖᤥ॥’ ”
22 ᤑᤧᤗᤡᤰᤛᤖᤧ ᤁᤴ ᤕᤧᤛᤢᤖᤧ ᤁᤢᤛᤱ ᤁᤢᤗᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤖᤡᤰᤁᤠᤱ ᤗᤧᤛ᤻ᤛᤢᤀᤠᤱ ᤘᤕᤧᤀᤠᤱ ᤒᤠ ᤂᤧᤴ ᤕᤧᤶᤔᤥᤀᤣ ᤂᤠᤛᤧᤴ ᤗᤥ᤺ᤶᤔᤠᤀᤠᤱ ᤁᤧᤛᤢᤰᤐᤠ ᤆᤥᤃᤧ. ᤁᤖ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤆᤢᤶᤗᤢᤱᤅᤡᤴ ᤏᤢᤵᤛᤢ. “ᤀᤠᤸᤗ ᤌᤰᤋᤢᤶᤒᤠ ᤗᤢᤛᤡᤕᤛᤧᤴ ᤕᤢ᤺ᤀᤠᤱ ᤂᤠᤛᤧᤴ ᤗᤥ᤺ᤴᤍᤢᤱ ᤐᤡᤏᤡᤱᤗᤥ॥”
23 ᤜᤧᤰᤁᤩᤠᤱ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤁᤥᤔᤠ ᤌᤰᤛᤢᤒᤠᤜᤠ᤹ ᤕᤢᤱᤔᤠᤛᤡ ᤜᤧᤰᤁᤩᤠᤱ ᤘᤠ᤹ᤔᤠ ᤐᤣ᤺ᤰᤔᤠ ᤛᤠ᤹ᤖᤡᤰ ᤛᤠᤰᤔᤠ ᤔᤧ᤺ᤴᤏᤠᤱ ᤁᤢᤴᤈᤢᤶ ᤁᤢᤴᤍᤣ᤺ᤱᤜᤠ᤹ᤖᤧ ᤂᤢᤏᤧ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤔᤧᤍᤠᤖᤢ ᤔᤧᤒᤡᤖᤢᤏᤡ ᤑᤠ᤹ᤀᤠᤱ ᤌᤰᤋᤢᤶᤒᤠᤴ ᤀᤡᤱᤈᤠ᤺ᤱ ᤐᤡᤖᤢᤖᤥ॥
ᤐᤠᤘᤗᤧ ᤑᤧᤗᤡᤰᤛ ᤍᤪᤢᤛᤡᤸᤗᤠ᤺ᤴᤏᤢ ᤐᤠ᤺ᤳ
24 ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤑᤧᤗᤡᤰᤛᤧᤴ ᤁᤢᤔᤣ᤺ᤳ ᤍᤪᤢᤛᤡᤸᤗᤠ᤺ᤴᤏᤢ ᤋᤩᤧᤳᤇᤡ॥ ᤍᤪᤢᤛᤡᤸᤗᤠ᤺ᤴ ᤕᤜᤢᤍᤡ ᤘᤕᤧᤖᤥ॥ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤀᤢ᤺ᤳᤋᤢᤀᤠᤱ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ᤗᤠᤶ ᤂᤧᤵᤛᤢ॥
25 ᤐᤠᤘᤗᤖᤧ ᤋᤠ᤹ᤎᤰᤋᤢᤖ ᤋᤣ᤹ᤖᤢᤸᤗᤧ ᤛᤠᤶᤕᤥᤏᤡᤒᤠ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ ᤏᤢ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤐᤕᤶ ᤂᤢᤶᤍᤡᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤀᤠᤱ ᤐᤥᤎᤰ ᤆᤥᤃᤢᤖᤥ॥ ᤁᤖ ᤑᤧᤗᤡᤰᤛᤧᤴ ᤁᤡ᤺ᤛᤧᤀᤠᤱ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤐᤣᤃᤧ᤹. ᤀᤡᤱᤃᤠ᤹ ᤕᤠ᤺ᤴᤍᤡᤰ ᤋᤠᤀᤠᤸᤗᤧ ᤕᤠᤶᤔᤥ ᤀᤢ᤺ᤳᤏᤧᤀᤠᤱ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤱᤗᤥ॥”
26 ᤂᤢᤏᤧ᤹ᤃ ᤐᤠᤘᤗᤗᤠᤶ ᤛᤢᤖᤢᤳ-ᤕᤠᤱ ᤂᤥ᤺ᤛᤢᤱᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤧᤳᤗᤧᤱ ᤀᤢ᤺ᤳᤋᤢᤖ ᤋᤠ᤹ᤈᤧᤰᤂᤧᤛᤠᤱ ᤐᤠᤘᤗᤖᤧ ᤌᤣᤀᤠᤱ ᤔᤧᤒᤡᤖᤢᤴᤗᤥ॥
27 ᤀᤠᤸᤗ ᤋᤱᤒᤣ ᤏᤧᤳᤇᤡ ᤀᤣᤃᤠᤱ ᤑᤧᤗᤡᤰᤛᤖᤧ ᤁᤢᤗᤧᤰᤘᤠ ᤐᤥᤷᤁᤡᤕᤛ ᤑᤧᤛ᤻ᤋᤛᤧᤴ ᤛᤢᤜᤠᤱᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤋᤩᤧᤖᤥ. ᤁᤖ ᤑᤧᤗᤡᤰᤛᤖᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤐᤠᤘᤗᤧᤴ ᤐᤢᤱᤗᤠᤜᤡᤶᤔᤥᤀᤣ ᤗᤧᤖᤢᤎᤀᤠᤱ ᤐᤣᤖᤥ॥