25
ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤥ ᤐᤠᤘᤗᤖᤧ ᤁᤢᤍᤢ᤺ᤴᤍᤣ᤹ᤀᤡᤴ
ᤑᤧᤛ᤻ᤋᤛᤧᤴ ᤛᤢᤜᤠᤱᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤖᤥᤔᤗᤠᤶ ᤕᤜᤢᤍᤡᤕᤠ ᤌᤢᤶᤔᤥ ᤋᤩᤧᤒᤠ ᤛᤢᤶ ᤕᤧᤴ ᤀᤣᤃᤠᤱ ᤛᤡᤈᤖᤡᤕᤠᤗᤠᤶ ᤌᤥ ᤕᤖᤢᤛᤗᤧᤔ ᤐᤣ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤃᤡ ᤐᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤵᤋᤡᤰᤜᤠ᤹ ᤔᤧᤕᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤑᤧᤛ᤻ᤋᤛᤧᤴ ᤐᤠᤘᤗᤖᤧ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴ ᤗᤥ᤺ᤴᤇᤧ ᤕᤖᤢᤛᤗᤧᤶᤔᤥ ᤌᤠᤰᤔᤠ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ. ᤌᤣᤀᤠᤱᤓᤧᤸᤗᤧ ᤐᤠᤘᤗᤧᤴ ᤂᤧᤱᤜᤠ᤹ᤖᤧ ᤗᤠᤶᤔᤥᤛᤠ ᤛᤧᤵᤔᤠ ᤁᤧᤗ᤹ᤒᤠ ᤆᤧᤶᤑᤴ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥ ᤁᤖ ᤑᤧᤛ᤻ᤋᤛᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤐᤠᤘᤗᤧᤱᤃ ᤛᤡᤈᤖᤡᤕᤠᤛ᤻ᤔᤠ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤘᤠ᤹॥ ᤀᤡᤱᤃᤠ᤹ᤀᤣ ᤛᤡᤈᤖᤡᤕᤠᤀᤥ ᤜᤠᤖᤠ ᤐᤣ᤺ᤰᤁᤠᤖ ᤐᤳᤋᤠ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤁᤢᤓᤠ ᤗᤠᤶᤗᤥ᤺ᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤌᤩᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤛᤧᤰᤂᤠᤀᤣ ᤐᤠ᤺ᤴ ᤑᤣ᤺ᤴᤍᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤁᤢᤍᤰᤗᤧᤱᤘᤠᤀᤥ ᤜᤠᤖᤠ᤹ ᤂᤧᤵᤔᤥᤀᤣ ᤀᤠᤵᤋᤡᤰ ᤁᤢ᤺ᤳᤋᤧᤶᤔᤧ᤹ᤀᤥ॥”
ᤜᤧᤰᤁᤩᤠᤱ ᤑᤧᤛ᤻ᤋᤛᤧᤴ ᤕᤖᤢᤛᤗᤧᤶᤔᤥ ᤕᤧᤳᤇᤡ ᤕᤧᤴᤏᤠᤱᤎᤥ ᤌᤡᤒᤥ᤺ᤱ ᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤌᤩᤧᤒᤣᤖᤥ॥ ᤕᤖᤡᤰ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤀᤠᤱ ᤂᤧᤵᤔᤥ ᤔᤧᤒᤣ॥ ᤛᤡᤈᤖᤡᤕᤠ ᤁᤧᤖᤧᤒᤠ ᤁᤢᤍᤠ᤺ᤴᤍᤡᤰᤔᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤅᤠᤱ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤖᤢᤛᤗᤧᤶᤗᤠᤶ ᤁᤧᤕᤢ᤺ᤒᤠ ᤕᤜᤢᤍᤡᤜᤠ᤹ ᤂᤢᤏᤧ᤹ ᤁᤢᤄᤡᤖᤡ ᤔᤧᤕᤧᤶᤛᤡᤱᤅᤠᤱ ᤐᤕᤶ ᤕᤶᤒᤠ ᤀᤠᤵᤋᤡᤰᤜᤠ᤹ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤜᤠ᤹ ᤛᤧᤰᤂᤠᤀᤣ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠ ᤔᤧᤴᤇᤢᤰᤋᤢᤴᤗᤥ॥
ᤜᤧᤰᤁᤩᤠᤱ ᤐᤠᤘᤗᤖᤧ ᤏᤠᤱᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤕᤜᤢᤍᤡ ᤛᤠᤶᤕᤥᤌᤡᤶ. ᤔᤠᤱᤜᤡᤶ ᤏᤢ ᤖᤥᤔᤡ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠᤖᤥ॥”
ᤁᤖ ᤑᤧᤛ᤻ᤋᤛᤖᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤐᤠᤘᤗᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤶᤃᤢ᤺ᤳᤋᤧᤒᤠ ᤀᤠᤵᤋᤡᤰᤁᤡᤸᤗᤧᤴ ᤋᤢ᤺ᤴᤍᤣ᤹ᤖᤧ ᤂᤠᤛᤧᤴᤏᤡᤴ ᤌᤥ ᤕᤖᤢᤛᤗᤧᤶᤔᤥ ᤀᤠᤍᤃᤡ ᤐᤥ᤺ᤱᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
10 ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤔᤧ᤺ᤴᤗᤥ. ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤡᤈᤖᤧᤸᤗᤣ ᤁᤢᤄᤠᤛᤧᤴ ᤕᤢᤰᤏᤠ᤺ᤸᤗᤣ ᤁᤢᤍᤃᤡ ᤕᤧᤵᤐᤠ᤹ᤖᤥ॥ ᤁᤵᤔᤥᤀᤣ ᤀᤡᤱᤃᤠ᤹ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠ ᤁᤧᤗ᤹ᤒᤠ ᤀᤠᤍᤠᤱᤒᤠᤖᤧ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ 11 ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤔᤠ ᤌᤡᤶ ᤑᤣ᤺ᤴᤍᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤔᤠ ᤐᤥ᤺ᤱᤛᤠᤱ ᤔᤧᤀᤳᤋᤢᤱᤅᤡᤴᤗᤥ॥ ᤁᤖ ᤀᤡᤱᤃᤠ᤹ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰ ᤐᤠ᤺ᤴᤏᤥ ᤛᤧᤰᤂᤠ ᤐᤠ᤺ᤴ ᤜᤥ᤺ᤵᤐᤠᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤂᤢᤏᤡ᤹ᤀᤥ ᤜᤢᤰᤛᤢᤵᤔᤠ ᤔᤧᤴᤇᤢᤰᤁᤠᤴᤗᤥ॥ ᤀᤡᤱᤃᤠ᤹ ᤖᤥᤔᤀᤥ ᤜᤠᤱᤕᤢᤰᤐᤠ ᤛᤡᤈᤖᤖᤧᤸᤗᤥ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤗ ᤑᤠ᤹ᤀᤠᤱ ᤕᤧᤰᤐᤣᤗᤡ ᤆᤥ᤺ᤰᤁᤠᤖᤥ᥄”
12 ᤑᤧᤛ᤻ᤋᤛᤧᤴ ᤁᤢᤛᤢᤈᤠᤛᤠᤒᤠᤜᤠ᤹ᤏᤢ ᤋᤠ᤹ᤈᤧᤰᤂᤧᤀᤠᤱ ᤐᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤛᤡᤈᤖᤗᤥ ᤕᤧᤰᤐᤣᤗᤡ* ᤁᤧᤈᤥᤃᤢᤀᤠᤱ ᤁᤧᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤛᤡᤈᤖᤗᤥᤀᤣ ᤐᤠᤱᤏᤧ᤹ᤖᤥ॥”
ᤑᤧᤛ᤻ᤋᤛᤧᤴ ᤀᤃᤪᤡᤐᤠ ᤜᤠᤱᤅᤡᤴᤏᤢ ᤛᤢᤈᤠ ᤆᤥ᤺ᤰ
13 ᤁᤢᤓᤠ ᤕᤧᤴ ᤀᤣᤃᤠᤱ ᤀᤃᤪᤡᤐᤠ ᤜᤠᤱ ᤏᤢ ᤁᤢᤴᤈᤣᤗᤡ ᤒᤷᤏᤡᤛᤧᤴ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤧᤴ ᤋᤢᤶᤍᤢᤶ ᤗᤠᤱᤍᤠ᤺ᤰᤛᤧ ᤛᤡᤈᤖᤡᤕᤠᤀᤥ ᤋᤩᤧᤳᤇᤡᤖᤥ॥
14 ᤂᤢᤴᤇᤡ᤹ ᤕᤖᤡᤰ ᤕᤧᤴ ᤘᤕᤧᤳᤇᤡᤸᤗᤧ ᤑᤧᤛ᤻ᤋᤛᤖᤧ ᤀᤃᤪᤡᤐᤠ* ᤜᤠᤱᤅᤡᤴ ᤐᤠᤘᤗᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢ. “ᤑᤧᤗᤡᤰᤛᤧᤴ ᤁᤵᤔᤥᤗᤠᤶ ᤐᤣ᤺ᤸᤗᤧ ᤐᤠᤘᤗ ᤔᤧᤵᤔᤏᤠᤒᤠ ᤐᤢᤱᤗᤠᤎᤠᤒᤠᤴ ᤐᤰᤌ᤺ᤀᤠᤱ ᤘᤕᤧ॥ 15 ᤀᤡᤱᤃᤠ᤹ ᤌᤥ ᤕᤖᤢᤛᤗᤧᤶᤔᤥ ᤐᤣᤃᤠᤱᤅᤡᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤵᤋᤡᤰ ᤔᤧᤍᤥ᤺ᤴᤍᤢᤀᤠᤱ ᤜᤠᤖᤠ᤹ ᤂᤢᤶᤍᤡᤱ ᤂᤥ᤺ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
16 ᤀᤡᤱᤃᤠ᤹ ᤂᤧᤱᤜᤠ᤹ ‘ᤀᤠᤵᤋᤡᤰᤛᤠᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤗᤧ ᤁᤢᤍᤰᤗᤧᤱᤘᤠᤀᤥ ᤏᤠᤱᤛᤡᤱᤔᤠ ᤛᤢᤕᤧᤶ ᤔᤧᤶᤒᤡᤀᤣ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤂᤧᤴ ᤜᤢᤰᤛᤢᤵᤔᤠ ᤖᤥᤔᤡᤌᤡᤶ ᤜᤥ᤺ᤵᤗᤥ’ ᤗ᤹ᤖᤡᤰ ᤔᤧᤳᤋᤢᤱᤛᤡᤱᤗᤥ॥ 17 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤛᤡᤈᤖᤡᤕᤠᤀᤥ ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤔᤧᤴᤏᤠ᤺ᤶᤛᤡᤱᤅᤣ ᤁᤢᤍᤠ᤺ᤴᤍᤡᤰᤔᤠᤀᤣ ᤂᤠᤛᤧᤴᤜᤡᤶᤔᤥ ᤀᤢ᤺ᤳᤋᤢᤱᤛᤡᤱᤅᤠᤱ ᤂᤧᤴ ᤐᤠᤘᤗᤧᤴᤏᤠᤱ ᤂᤧᤵᤔᤥ ᤋᤠ᤺ᤵᤔᤠ ᤐᤠᤱᤄᤢᤱᤛᤡᤱᤗᤥ॥ 18 ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤕᤧᤶᤛᤡᤱᤅᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤜᤧᤰᤁᤣ ᤐᤕᤶ ᤀᤠᤵᤋᤡᤰ ᤌᤣᤀᤠᤱ ᤁᤢ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 19 ᤁᤖ ᤁᤢᤀᤠᤵᤋᤡᤰᤁᤡᤱᤃ ᤀᤠᤒᤠᤅᤣ ᤂᤢᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤏᤡᤱᤘᤠ᤹ ᤔᤧᤴᤍᤱ ᤐᤠ᤺ᤴᤎᤱᤜᤠ᤹ ᤏᤢ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤘᤕᤧᤖᤥ॥ ᤂᤧᤴ ᤀᤠᤸᤗᤥᤀᤠᤱ ᤁᤢᤜᤡᤱᤘᤧᤳ ᤘᤠ᤹ ᤗ᤹ᤖᤡᤰ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤜᤠᤍᤡᤱ ᤌᤰᤋᤧᤖᤥ॥ 20 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤁᤥ᤺ᤶᤓᤥ ᤆᤥ᤺ᤰᤔᤠ ᤀᤡᤱᤃᤠ᤹ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤌᤥ ᤕᤖᤢᤛᤗᤧᤶᤔᤥ ᤁᤧᤍᤢ᤺ᤴᤍᤣ᤹ᤖᤧ ᤂᤠᤛᤧᤴ ᤗᤥ᤺ᤶᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱᤗᤥ॥ 21 ᤁᤖ ᤐᤠᤘᤗᤖᤧ ᤂᤢᤏᤧ᤹ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴᤏᤡᤴ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤆᤥᤃᤢᤏᤡ ᤗ᤹ᤖᤡᤰ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤐᤕᤶ ᤜᤠᤱ ᤛᤡᤈᤖᤧᤸᤗᤥᤀᤣ ᤐᤠᤱᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤧ᤹ ᤔᤧᤶᤒᤠᤱᤅᤣ ᤌᤠᤖᤡᤰ ᤋᤡᤗᤡᤱᤃᤠᤜᤠ᤹ ᤁᤥᤔᤠᤀᤠᤱ ᤁᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥” 22 ᤜᤧᤰᤁᤣ᤺ᤸᤗᤧ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤑᤧᤛ᤻ᤋᤛᤧᤴ ᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥”
ᤑᤧᤛ᤻ᤋᤛᤖᤧ ᤏᤥᤃᤵ ᤐᤡᤖᤢ. “ᤐᤥ᤺ᤱ ᤀᤠᤍᤠᤱᤒᤣ. ᤂᤧᤏᤧ᤹ ᤋᤠ᤺ᤴᤍᤡᤰ ᤂᤧᤵᤛᤧ᤹ᤀᤥ॥”
23 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤀᤃᤪᤡᤐᤠ ᤜᤠᤱ ᤏᤢ ᤒᤷᤏᤡᤛᤧᤴ ᤀᤠᤳᤋᤠᤳᤋᤠᤴᤏᤣ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤋᤩᤧᤳᤇᤡᤀᤠᤱ ᤆᤢᤶᤗᤢᤱᤜᤡᤶᤔᤥ ᤌᤰᤋᤢᤶᤒᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤔᤡᤱᤛᤥᤍᤠᤱᤒᤠᤜᤠ᤹ᤏᤢ ᤗᤠ᤺ᤛᤧᤳᤇᤡ॥ ᤜᤧᤰᤁᤩᤠᤱ ᤑᤧᤛ᤻ᤋᤛᤖᤧ ᤐᤠᤘᤗᤧᤴ ᤋᤠ᤺ᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤍᤠᤖᤢ॥ 24 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤧ ᤐᤠ᤺ᤳᤋᤢ. “ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱ ᤏᤢ ᤁᤵᤔᤥ ᤁᤧᤍᤠ᤺ᤒᤠ ᤋᤢᤳᤋᤢᤃᤧᤴ ᤋᤢᤶᤔᤩᤠᤱᤜᤠᤱᤛᤣ. ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤔᤏᤠ᤺ᤴ ᤁᤧᤏᤡ᤺ᤛᤢᤶ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤖᤢᤛᤗᤧᤔ ᤏᤢ ᤁᤵᤔᤥᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤁᤸᤗᤧ ᤀᤠᤸᤗ ᤜᤡᤱᤔᤠ ᤔᤧᤄᤥ᤺ᤛᤢᤴᤏᤡ. ᤂᤧᤴ ᤛᤡ᤺ᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤀᤡᤱᤃᤠ᤹ᤀᤥ ᤐᤣᤗᤡ ᤔᤧᤍᤥ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥ 25 ᤁᤖ ᤁᤴ ᤔᤏᤠ᤺ᤸᤗᤧ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤌᤧᤔᤠᤀᤠᤱ ᤐᤠ᤺ᤴ ᤔᤧᤶᤓᤣ᤺ᤴᤏᤣ ᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤱ॥ ᤕᤠᤶᤔᤥ ᤁᤴ ᤔᤏᤠ᤺ᤸᤗᤧ ᤐᤕᤶ ᤜᤠᤱ ᤛᤡᤈᤖᤗᤥ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤛᤡᤈᤖᤧᤸᤗᤥᤀᤣ ᤖᤥᤶᤔᤥ ᤂᤧᤴ ᤐᤠᤱᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ 26 ᤁᤖ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤕᤶ ᤜᤠᤱ ᤛᤡᤈᤖᤧᤴ ᤛᤰᤀᤡᤱᤄᤱᤅᤥ ᤌᤣ ᤛᤠᤵᤔᤠ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤔᤏᤠ᤺ᤴ ᤁᤢᤳᤆᤡᤀᤥ ᤂᤧᤏᤧ᤹ ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤁᤧᤍᤃᤡ ᤋᤠᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤥᤖᤡᤰ ᤀᤠᤏᤡ᤹ ᤁᤥ᤺ᤶᤓᤥ ᤀᤠᤈᤥᤃᤢᤶᤔᤡᤸᤗᤧ ᤛᤠᤵᤔᤠ ᤐᤠ᤺ᤴ ᤁᤢᤓᤠ ᤀᤡᤱᤃᤠ᤹ ᤂᤥ᤺ᤛᤢᤱᤅᤣᤖᤥ॥ 27 ᤌᤣᤀᤠᤱᤓᤧᤸᤗᤧ ᤐᤢᤱᤗᤠᤎᤠᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤛᤧᤰᤂᤠ ᤀᤠᤵᤋᤡᤰ ᤐᤠ᤺ᤴᤜᤠ᤹ ᤔᤧᤴᤇᤠᤵᤐᤣ ᤛᤡᤈᤖᤗᤥ ᤐᤠᤱᤔᤠ ᤀᤡᤱᤃᤠ᤹ ᤏᤢ᤺ᤒᤠ ᤔᤧᤴᤏᤡ᤺ᤒᤧᤴᤗᤥ॥”
* 25:12 ᤛᤈᤖᤗᤥ ᤕᤧᤰᤐᤣᤗᤡ–ᤖᤥᤔᤡ ᤕᤰᤕᤢᤱᤒᤠᤜᤠ᤹ᤖᤧ ᤐᤕᤶ ᤜᤠᤱ ᤛᤡᤈᤖᤗᤧ ᤂᤢᤏᤡ᤹ ᤋᤢᤴᤍᤧᤖᤧᤴ ᤕᤧᤰᤐᤣᤗᤡ ᤆᤥ᤺ᤰᤔᤠ ᤕᤢᤰ ᤔᤧᤃᤳᤋᤢᤖᤥ॥ * 25:14 ᤀᤃᤪᤡᤐᤠ–ᤁᤴ ᤜᤧᤖᤥᤍ ᤀᤃᤪᤡᤐᤠ ᤌᤡᤰᤛᤡᤃᤣ᤺ᤰᤛ᤻ᤔᤠ ᤜᤠᤱᤖᤧ ᤁᤢᤛ᤻ᤛᤠ᤺ ᤜᤧᤖᤥᤍ ᤀᤃᤪᤡᤐᤠ ᤏᤡᤛᤡᤃᤣ᤺ᤰᤛ᤻ᤔᤠ ᤘᤕᤧ॥