ᤐᤠᤘᤗᤖᤧ ᤁᤥᤖᤴᤌᤡᤜᤠ᤹ ᤜᤠᤰᤋᤢᤛᤡᤒᤠ ᤏᤡᤛᤡᤃᤣ᤺ᤰᤐᤠ ᤛᤰᤀᤡᤱᤄᤱ
ᤏᤡ᤺ᤛᤢᤶ
ᤐᤠᤘᤗᤖᤧ ᤁᤥᤖᤴᤌᤡ ᤕᤧᤰᤕᤰᤁᤥ ᤂᤢᤏᤧ᤹ ᤜᤣ᤺ᤰᤋᤢᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ ᤜᤠᤰᤋᤢᤛᤡᤒᤠ ᤏᤡᤛᤡᤃᤣ᤺ᤰᤐᤠ ᤛᤰᤀᤡᤱᤄᤱᤗᤥ॥ ᤐᤠᤘᤗᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤒᤠ ᤕᤧᤶᤔᤥ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤏᤢ᤺ᤒᤠ ᤁᤢᤍᤱᤈᤢᤶ ᤜᤥ᤺ᤵᤋᤧᤖᤥ॥ ᤛᤣᤛᤣᤜᤢᤵᤗᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤀᤠᤱ ᤘᤕᤧᤖᤥ. ᤜᤧᤰᤁᤣᤛᤠᤱ ᤐᤠᤘᤗᤖᤧ ᤂᤧᤱᤜᤠ᤹ᤏᤢ ᤏᤠᤍᤱ ᤆᤥ᤺ᤰᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡ᤺ᤳᤋᤢᤒᤠ ᤜᤧᤰᤁᤣ ᤐᤥ᤺ᤱᤅᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤀᤥᤔᤢ ᤗ᤹ᤒᤠ ᤐᤠ᤺ᤴᤏᤡᤴ ᤁᤵᤔᤥ ᤆᤧᤰᤂᤢ᤹ᤖᤥ॥
ᤁᤴ ᤛᤰᤀᤡᤱᤄᤱᤅᤡᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤗᤰᤁᤡᤸᤗᤧ ᤐᤠᤘᤗ ᤏᤢ ᤁᤥᤖᤴᤌᤡᤒᤠ ᤛᤣᤛᤣᤜᤢᤵᤗᤰᤁᤡᤸᤗᤧ ᤂᤢᤏᤡ᤹ ᤋᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤥᤎᤰ ᤀᤠᤈᤥ᤺ᤰᤗᤥ॥ ᤐᤠᤘᤗᤖᤧ ᤛᤣᤛᤣᤜᤢᤵᤗᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤒᤠ ᤏᤢ ᤔᤧᤀᤳᤋᤢᤒᤠᤀᤥ ᤁᤧᤛᤠᤰᤐᤠ ᤏᤥᤃᤵ ᤐᤡᤖᤢᤛᤡᤀᤠᤱ ᤂᤧᤴ ᤏᤥᤃᤵᤐᤡᤸᤗᤧ ᤔᤏᤠᤜᤠ᤹ ᤗᤢᤶᤔᤥ ᤗᤠᤕᤥᤗᤠᤶ ᤜᤡᤶᤔᤠ ᤏᤢ ᤏᤠᤍᤱ ᤆᤥ᤺ᤰᤔᤠᤴ ᤋᤩᤧᤒᤠᤸᤗᤧ ᤂᤢᤏᤧ᤹ ᤁᤢᤛᤡᤰ ᤛᤔᤧᤀᤠᤱ ᤘᤕᤧᤖᤥ॥
ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤡᤴᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤥᤒᤠ ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ ᤜᤶᤔᤠᤀᤠᤱ ᤁᤢᤓᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ᤹ᤛᤡᤖᤥ॥
ᤜᤧᤰᤁᤩᤠᤱ ᤀᤣᤃᤠᤱᤛ᤻ᤔᤠ ᤏᤠ᤺ᤳᤗᤠᤜᤠ᤹ᤀᤥ ᤐᤠᤘᤗᤖᤧ ᤂᤢᤏᤧ᤹ ᤁᤢᤳᤆᤠ᤹ᤀᤣ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤀᤡᤃᤢ ᤔᤧᤳᤇᤡᤱᤅᤠᤱ ᤛᤠᤵᤋᤢᤖᤥ. ᤌᤣᤀᤠᤱᤓᤧᤸᤗᤧ ᤁᤥᤖᤴᤌᤡᤒᤠ ᤁᤢᤓᤠ ᤔᤏᤠᤜᤠ᤹ ᤛᤧᤰᤂᤠᤒᤠ ᤛᤣ᤺ᤰᤕᤢᤰᤔᤡᤒᤠᤛᤡᤃᤧ ᤗ᤹ᤖᤡᤰ ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤐᤠᤘᤗᤧᤴ ᤀᤡᤱᤗᤧᤰᤐᤠᤖᤥ ᤗ᤹ᤖᤡᤰ ᤐᤠ᤺ᤴ ᤔᤧᤎᤡᤰᤋᤢᤀᤠᤱ ᤘᤕᤧᤖᤥ॥
ᤌᤠᤔᤡᤱ
ᤏᤡ᤺ᤛᤢᤶ ᥇.᥇-᥇᥇
ᤐᤠᤘᤗᤧᤴ ᤏᤢ ᤁᤥᤖᤴᤌᤡᤒᤠ ᤛᤣᤛᤣᤜᤢᤵᤗᤰ ᥇.᥇᥈-᥍.᥇᥌
ᤕᤜᤢᤍᤡᤕᤠ ᤌᤢᤶᤔᤥ ᤁᤧᤘᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤕᤠᤱ ᥎.᥇-᥏.᥇᥋
ᤐᤠᤘᤗᤖᤧ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤀᤢᤘᤠ ᤆᤥᤃᤢᤒᤠ ᥇᥆.᥇-᥇᥉.᥇᥆
ᤁᤢᤏᤢᤵᤔᤠ ᥇᥉.᥇᥇-᥇᥉
1
ᤐᤠᤘᤗᤗᤠᤶᤒᤠ ᤛᤣᤘᤠ
1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤗᤠᤶᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤛᤣᤃᤠᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤖᤧ ᤁᤥᤖᤴᤌᤡ ᤕᤧᤰᤕᤰᤁᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰ ᤏᤢ ᤀᤰᤂᤤᤕᤠ ᤋᤧᤱᤃᤵ ᤂᤠᤖᤠᤰ ᤁᤧᤕᤢᤱᤒᤠ ᤁᤠᤰ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥
2 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤂᤡᤏᤡ᤹ ᤁᤧᤒᤡᤖᤡᤖᤖᤥ॥
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠ᤺ᤴᤇᤡᤱᤔᤠ ᤀᤠᤒᤡ᤹
3 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤶᤒᤠ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤏᤢ ᤀᤠ᤺ᤴᤇᤡᤱᤔᤠ ᤕᤠᤵᤔᤡ ᤁᤧᤒᤡᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ॥
4 ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤠᤄᤥ᤺ᤛᤢᤶᤒᤠ ᤀᤠ᤺ᤴᤇᤡᤱᤔᤠᤸᤗᤧ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤘᤠ᤹ᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤔᤠ ᤀᤠᤛᤢᤰᤋᤢᤶᤛᤡᤶᤗ ᤑᤠ᤹ᤀᤠᤱ ᤂᤢᤏᤧ᤹ᤀᤣ ᤁᤠᤰ ᤀᤠᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤀᤠ᤺ᤴᤇᤡᤱᤔᤠ ᤀᤠᤒᤡ᤹ᤖᤥ॥
5 ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤀᤠᤏᤡ᤹ᤀᤠᤱ ᤕᤖᤡᤰ ᤋᤢᤰᤂᤣ ᤀᤠᤈᤠ᤹᤺॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤗᤠᤶ ᤕᤖᤡᤰ ᤀᤠ᤺ᤴᤇᤡᤱᤔᤠᤴ ᤀᤠᤒᤡ᤹ᤖᤥ॥
6 ᤀᤠᤏᤡᤃᤧ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤁᤧ᤺ᤵᤋᤡᤃᤧᤸᤗᤧ ᤂᤧᤱᤃ ᤂᤡᤏᤡ᤹ ᤀᤠ᤺ᤴᤇᤡᤱᤔᤠ ᤏᤢ ᤛᤧᤴᤗᤵᤖᤧ ᤗᤠᤃᤡᤏᤧ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤸᤗᤧ ᤂᤧᤴᤏᤠᤱ ᤂᤡᤏᤡ᤹ ᤀᤠ᤺ᤴᤇᤡᤱᤔᤠᤸᤗᤧ ᤗᤠᤃᤡᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤐᤡᤀᤠᤛᤡᤃᤧᤒᤠ ᤀᤠ᤺ᤴᤇᤡᤱᤔᤠᤗᤠᤶ ᤀᤠᤏᤡᤃᤧ ᤌᤖᤢᤶᤒᤧᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤂᤡᤏᤡ᤹ᤀᤠᤱ ᤏᤠᤛᤡ ᤌ᤺ᤵᤔᤠ ᤁᤧᤛᤢᤰᤋᤢᤶᤗᤥ॥
7 ᤜᤧᤰᤁᤩᤠᤱ ᤀᤠᤏᤡᤃᤧ ᤀᤡᤏᤥᤃᤧᤴ ᤋᤢᤰᤂᤣ ᤆᤩᤧ᤹ᤀᤡᤃᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤋᤢᤰᤂᤣ ᤁᤧᤈᤩᤧ᤹ᤀᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤀᤠ᤺ᤴᤇᤡᤱᤔᤠ ᤁᤧᤒᤡᤖᤡ᤹ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤛᤠᤱᤅᤡᤴ ᤔᤧᤔᤢᤴᤏᤧᤴᤗᤥ॥
8 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤣᤛᤡᤕᤠᤒᤠ ᤋᤧᤱᤃᤵᤐᤥ ᤀᤠᤏᤡᤃᤧ ᤋᤢᤔᤢᤶᤒᤧᤒᤠ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤋᤠ᤺ᤵᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤴ ᤋᤢᤰᤂᤣ᤺ᤱᤃ ᤌᤶᤔᤠ ᤛᤢᤰᤔᤧᤴᤍᤧᤵᤔᤏᤠ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤜᤡᤅᤡᤃᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ᤀᤣ ᤔᤧᤴᤀᤡ᤺ᤵᤔᤏᤠᤖᤥ॥
9 ᤛᤧᤰᤂᤠᤀᤣ ᤀᤠᤏᤡᤃᤧᤃ ᤛᤩᤧ᤹ᤀᤡᤃᤧᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥ ᤁᤖ ᤁᤱᤃ ᤀᤠᤏᤡᤃᤧ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤁᤧᤛᤡ᤺ᤒᤠᤜᤠ᤹ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤋᤠᤱᤛᤧ᤺ᤵᤔᤠ ᤀᤠᤛᤢᤰ ᤁᤧᤗ᤹ᤒᤠ ᤀᤡ᤺ᤵᤔᤠ ᤛᤢᤰᤋᤢᤶᤒᤧᤖ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
10-11 ᤂᤢᤏᤧ᤹ᤃ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤛᤡ᤺ᤔᤧᤴᤗᤠᤶ ᤛᤧ᤺ᤵᤋᤡᤃᤧ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤛᤧ᤺ᤵᤋᤡᤃᤧᤖᤥ॥ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤕᤠᤶᤔᤥᤀᤠᤱ ᤛᤧ᤺ᤵᤋᤡᤃᤧ ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤆᤥ᤺ᤰᤏᤢ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡ᤹ ᤑᤠ᤹ᤀᤠᤱ ᤂᤢᤏᤧ᤹ᤀᤥ ᤏᤡᤱᤛᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤀᤠᤏᤡᤃᤧ ᤗᤠᤃᤡ ᤔᤧᤈᤥᤃᤢᤒᤠ ᤋᤢᤘᤠ᤺ᤸᤗᤧᤴ ᤏᤥᤃᤵᤐᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤔᤢ᤹ᤀᤡᤛᤠᤶ ᤐᤡᤖᤡᤃᤧ᤹ ᤜᤧᤰᤁᤩᤠᤱ ᤀᤠᤏᤡᤃᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢ᤹ᤖᤥ॥
ᤐᤠᤘᤗᤖᤧ ᤁᤥᤖᤴᤌᤡ ᤔᤧᤶᤒᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹
12 ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤔᤥᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ ᤋᤃᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧ ᤕᤧᤵᤗᤧᤰᤁᤡᤴ ᤛᤣᤛᤣ ᤏᤢ ᤁᤢᤍᤥ᤺ᤵᤔᤠ ᤁᤳᤋᤢᤶᤒᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤢᤖᤠ ᤔᤧᤴᤕᤠᤀᤣ ᤐᤠ᤺ᤵᤔᤠ ᤛᤢᤰᤋᤢᤶᤒᤧᤖᤥ॥ ᤁᤱᤃ ᤔᤧᤴᤇᤠᤶ ᤕᤠᤵᤔᤡ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤁᤳᤋᤢᤶᤒᤧᤒᤠ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤁᤳᤋᤢᤶᤒᤧᤒᤠᤖᤥ॥
13-14 ᤂᤡᤏᤡ᤹ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤏᤢ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥ ᤌᤣᤀᤠᤱ ᤔᤧᤛᤠᤵᤋᤢᤶᤒᤧᤴᤗᤥ॥ ᤀᤠᤸᤗᤥ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤔᤡᤛᤠᤰᤗᤰ ᤁᤢᤛᤡᤱᤃᤧᤴᤏᤡ᤺ᤳᤋᤢᤶ. ᤁᤖ ᤌᤡᤰᤕᤧᤴ ᤂᤡᤏᤡ᤹ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ᤺ᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤘᤣ᤹ ᤔᤏᤠᤜᤠ᤹ ᤏᤢ᤺ᤒᤠ ᤐᤠ᤺ᤴ ᤔᤧᤳᤋᤢᤶᤛᤡᤶᤒᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤏᤢ᤺ᤒᤠ ᤐᤠ᤺ᤴ ᤁᤧᤈᤧᤰᤋᤢᤶᤛᤡᤶᤗᤥ॥
15 ᤀᤠᤏᤡ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤠᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤀᤡᤃᤢ ᤁᤳᤋᤢᤱᤒᤠᤸᤗᤧ ᤆᤥᤃᤢᤸᤗᤧ ᤔᤢ᤹ᤀᤡᤛᤠᤶ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤕᤠᤶᤔᤥ ᤂᤡᤏᤡ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱᤗᤥ॥
16 ᤀᤡᤱᤃᤠ᤹ ᤔᤧᤛᤥᤍᤥᤏᤡᤕᤠ ᤋᤧᤱᤃᤵ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ᤀᤥ ᤗ᤺ᤶᤔᤠᤖ ᤐᤣ᤺ᤰᤔᤠ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤏᤢ᤺ᤱᤅᤠᤀᤡᤸᤗᤧᤀᤠᤱ ᤂᤡᤏᤡ᤹ᤀᤥ ᤗ᤺ᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤕᤜᤢᤍᤡᤕᤠ ᤌᤢᤶ ᤐᤣ᤺ᤰᤁᤠᤸᤗᤧ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠ॥
17 ᤂᤡᤏᤡ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤐᤧᤴ. ᤁᤖ ᤀᤡᤱᤃᤠ᤹ ᤁᤴ ᤜᤏᤧ ᤏᤡᤱᤘᤠ᤹ ᤆᤥᤃᤢᤱᤒᤠ ᤔᤧ᤺ᤴ. ᤜᤧᤰᤁᤩᤠᤱ ᤀᤡᤰᤛᤠᤒᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰ ᤗᤳᤌᤡᤰ ᤔᤢᤖᤠ᤺ᤸᤗᤧ ᤀᤥ ᤏᤢ ᤔᤧ᤺ᤴ ᤗ᤹ᤖᤡᤰ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤔᤧ᤺ᤴᤗᤥ॥
18 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤏᤛᤠ᤺ᤴᤛᤠᤒᤠ ᤆᤥ᤺ᤰᤁᤠ॥ ᤀᤡᤱᤃᤠ᤹ ᤆᤥᤃᤢᤱ ᤏᤢ ᤔᤧᤈᤥᤃᤢᤱᤅᤡᤴ ᤗ᤹ᤖᤡᤰ ᤁᤧᤒᤠ᤺ᤵᤐᤠ ᤔᤏᤠ ᤔᤧ᤺ᤴᤏᤠ᤹ᤖᤥ॥
19 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹. ᤋᤡᤔᤥᤌᤡ ᤏᤢ ᤛᤡᤗᤠᤛᤗᤠᤶᤒᤠ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤀᤡᤱᤓᤥ᤺ᤛᤢᤶᤒᤧᤸᤗᤧ ᤀᤥ ᤏᤢ ᤔᤧ᤺ᤴ ᤁᤧᤗ᤹ᤒᤠ ᤐᤠ᤺ᤴ ᤜᤥ᤺ᤵᤋᤧᤖᤥ॥ ᤁᤖ ᤂᤢᤏᤧ᤹ “ᤀᤥᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤆᤥᤃᤢ᤹ᤀᤣᤖᤥ॥
20 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤀᤠᤰᤂᤧᤴ ᤔᤠᤱᤜᤧᤰᤜᤠ᤹ᤛᤠᤱ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ “ᤀᤥᤖᤥ” ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗ ᤑᤠ᤹ᤀᤠᤱ ᤀᤠᤏᤡᤃᤧ “ᤀᤠᤔᤧᤴ”. (ᤀᤥᤖᤥ. ᤜᤧᤰᤁᤣ ᤐᤥ᤺ᤱᤗᤖᤥ). ᤐᤠ᤺ᤳᤋᤢᤶᤒᤧᤖᤥ॥
21 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤏᤡ᤹ ᤁᤧᤖᤧᤰ ᤁᤧᤎᤢᤶᤒᤠ ᤀᤠᤈᤥ᤺ᤰ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤕᤠᤵᤔᤡ ᤔᤠᤱᤎᤥ᤺ᤰᤏᤠ ᤀᤠᤒᤡᤖᤧᤀᤠᤱ
22 ᤀᤠᤏᤡ᤹ ᤂᤢᤏᤧ᤹ᤀᤡᤴ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤖᤧ ᤗᤠᤃᤡ ᤛᤣᤛᤣᤔᤠᤱᤅᤡᤴ ᤋᤧᤴᤕᤠᤱ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤛᤡᤰᤗᤢᤱᤔᤥ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤴ ᤀᤠᤒᤡᤖᤧᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤔᤠᤱᤜᤧᤰ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤋᤠ᤺ᤖᤥ ᤑᤠ᤹ᤀᤠᤱ ᤏᤡ᤺ᤴᤎᤥ ᤐᤥ᤺ᤱᤗᤥ॥
23 ᤂᤡᤏᤡ᤹ ᤐᤠ᤺ᤴ ᤔᤧᤔᤧᤳᤏᤡᤱᤅᤡᤴᤗ ᤑᤠ᤹ᤀᤠᤱ ᤁᤥᤖᤴᤌᤡ ᤕᤧᤰᤕᤰᤁᤥ ᤕᤠᤶᤔᤥ ᤔᤧᤴᤍᤠᤒᤠᤴᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤏᤡ᤺ᤛᤢ᤹ᤖᤥ॥
24 ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠ᤺ᤴᤏᤥ ᤕᤢᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤃᤳᤋᤢᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡ᤹. ᤁᤖ ᤂᤡᤏᤡ᤹ ᤁᤧᤛ᤺ᤳᤋᤡᤖ ᤑᤠ᤹ᤀᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤕᤠ᤺ᤶᤒᤰ ᤆᤥᤃᤡᤃᤧᤖᤥ॥