2
1 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤐᤠ᤺ᤴ ᤔᤧᤳᤇᤧ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ᤀᤥ ᤔᤧᤴᤍᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥
2 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤏᤠᤔᤠᤰᤔᤥ ᤌᤠᤏᤡᤱᤏᤧ ᤑᤠ᤹ᤃᤪ ᤏᤠᤔᤠᤰᤔᤥ ᤌᤠ᤺ᤛᤢᤱᤛᤡᤱᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧ ᤀᤡᤱᤃᤠ᤹ ᤛ᤺ᤳᤋᤠᤖ ᤕᤠ᤺ᤶᤔᤠ ᤛᤢᤰᤁᤠᤒᤣ᥅
3 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤛ᤺ᤵᤔᤠ ᤁᤧᤒᤠᤱᤒᤠᤸᤗᤧᤀᤣ ᤀᤠᤏᤡᤱᤘᤠ᤹ ᤔᤧᤍᤢᤰᤂᤢᤴᤗ ᤑᤠ᤹ᤀᤠᤱ ᤋᤃᤡᤒᤠ ᤛᤰᤀᤡᤱᤄᤱᤅᤥ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤐᤠ᤺ᤴ ᤛᤠᤵᤋᤢᤱᤒᤠᤖᤥ॥ ᤀᤡᤱᤃᤠ᤹ ᤛ᤺ᤳᤋᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤛ᤺ᤳᤋᤡ᤹ ᤁᤧᤗ᤹ᤒᤠ ᤛᤧᤰᤂᤠᤀᤣ ᤏᤡ᤺ᤛᤢᤱᤗᤥ॥
4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤗ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱᤅᤣ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤀᤠᤕᤥ᤺ᤶ ᤐᤢ᤹ᤖᤧ ᤜᤧᤰᤁᤩᤠᤱ ᤀᤠᤔᤡᤰᤘᤠ ᤌᤠ᤺ᤛᤢᤱᤗ ᤂᤧᤴ ᤛᤰᤀᤡᤱᤄᤱᤅᤡᤴ ᤀᤡᤱᤃᤠ᤹ ᤜᤠᤰᤏᤡᤱᤅᤠᤱ ᤘᤕᤠᤱᤗᤥ॥
ᤐᤠ᤺ᤴᤃᤧᤓᤣ᤺ᤶᤒᤠᤜᤠ᤹ ᤗᤧᤵᤔᤡ ᤐᤡᤔᤠᤛᤡ
5 ᤀᤡᤱᤃᤠ᤹ ᤂᤡᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠ᤺ᤴ ᤐᤠ᤺ᤵᤔᤠ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ. ᤁᤖ ᤀᤡᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤱᤒᤠᤏᤢ᤺ᤸᤗᤧᤀᤠᤱ ᤔᤠᤱᤓᤠ ᤕᤖᤡᤰ ᤂᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤳᤋᤡᤀᤠᤱ ᤘᤠ᤹ᤖᤥ॥
6 ᤂᤡᤏᤡ᤹ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤒᤡᤖᤢᤶᤒᤠ ᤂᤢᤶᤍᤡᤱᤅᤡᤴ ᤂᤢᤏᤧ᤹ ᤁᤢᤗᤠᤃᤡ ᤁᤧᤖᤧᤀᤠᤱ ᤘᤠ᤹ᤖᤥ॥
7 ᤜᤧᤰᤁᤣ᤺ᤸᤗᤧ ᤀᤠᤸᤗ ᤂᤧᤴ ᤗᤧᤵᤔᤡ ᤁᤧᤒᤡᤖᤢᤶᤗ ᤐᤥ᤺ᤱ. ᤀᤠ᤺ᤴᤇᤡᤱᤔᤠ ᤁᤧᤒᤡᤖᤢᤶᤗ ᤐᤥ᤺ᤱ. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤃ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤰᤁᤠᤱ ᤏᤡᤱᤛᤠᤶᤔᤥ ᤌᤠ᤺ᤖᤥ॥
8 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤂᤧᤴ ᤔᤏᤠ᤺ᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
9 ᤌᤣᤀᤠᤱ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤰᤀᤡᤱᤄᤱ ᤜᤠᤰᤏᤡᤱᤒᤠ ᤑᤠ᤹ᤗᤧ ᤁᤠᤰ ᤀᤠᤀᤡᤱᤈᤠ᤺ᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤗ ᤁᤧᤘᤕᤡ᤹ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢᤱᤒᤠᤖᤥ॥
10 ᤂᤡᤏᤡ᤹ ᤗᤧᤵᤔᤡ ᤁᤧᤒᤡᤖᤢᤶᤒᤠ ᤔᤏᤠ᤺ᤴ ᤀᤡᤱᤃᤠ᤹ᤀᤠᤱ ᤗᤧᤵᤔᤡ ᤐᤡᤖᤢᤱᤗᤥ॥ ᤗᤧᤵᤔᤡ ᤐᤡᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴ ᤘᤠ᤹ᤏᤧ ᤑᤠ᤹ᤃᤪ. ᤂᤧᤴ ᤗᤧᤵᤔᤡ ᤐᤡᤖᤢᤱᤅᤡᤸᤗᤧ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤂᤡᤏᤡ᤹ ᤗᤠᤃᤡᤀᤣ ᤜᤧᤰᤁᤣ ᤆᤥᤃᤢᤱᤗᤥ॥
11 ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤏᤡ᤹ ᤀᤡᤱᤀᤠᤴᤗᤧᤰᤏᤧᤸᤗ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤱᤒᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤁᤣ ᤁᤢᤕᤠ᤺ᤶᤒᤰᤁᤡᤴ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹ᤖᤥ॥
ᤐᤠᤘᤗᤧᤴ ᤋᤪᤥᤀᤠᤛ ᤕᤧᤰᤕᤰᤁᤥ ᤐᤣ᤺ᤰ
12 ᤀᤠᤸᤗ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤋᤪᤥᤀᤠᤛ ᤐᤣᤃᤠᤱᤅᤡᤸᤗᤧ ᤂᤧᤵᤔᤥ ᤍᤠᤱᤒᤠᤸᤗᤧ ᤀᤡᤱᤓᤥ᤺ᤔᤠ ᤛᤢᤕᤧᤶᤎᤡᤰ ᤐᤡᤖᤠᤱᤗᤥ॥
13 ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤛᤏᤠᤖᤢᤱ ᤜᤥ᤺ᤵᤋᤧᤖᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤄᤱ ᤁᤧᤍᤠ᤺ᤵᤐᤠ ᤀᤠᤴᤛᤠ᤹ ᤋᤡᤋᤛᤧᤴ ᤔᤧᤴᤍᤢᤶᤒᤠᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤧᤶᤔᤢ᤹ᤀᤡ ᤏᤠ᤺ᤰᤋᤢᤱᤛᤡᤱᤅᤠᤱ ᤔᤧᤛᤣᤍᤥᤏᤡᤕᤠ ᤋᤧᤱᤃᤵᤗᤧᤵᤔᤠᤱ ᤐᤣᤃᤠᤱᤗᤥ॥
ᤂᤪᤡᤛ᤻ᤋᤗᤠᤶᤒᤠ ᤏᤠ᤺ᤶᤔᤠ ᤂᤥ᤺ᤍᤧᤳ
14 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤍᤠᤍᤡᤱ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤌᤱᤏᤠ᤺ᤶᤒᤠ ᤛᤛ᤺ᤳᤛᤖᤠᤱᤅᤥ ᤗᤠᤶᤀᤠᤗᤥ᤺ᤖᤥ॥ ᤜᤧᤰᤁᤩᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶᤔᤡᤴ ᤛᤧ᤺ᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤏᤡ᤹ᤗᤠᤶᤒᤠ ᤁᤧᤖᤧᤰ ᤐᤡᤛᤠᤱ ᤛᤧ᤺ᤛᤢᤖᤥ.
15 ᤌᤣᤀᤠᤱᤓᤧᤸᤗᤧ ᤛᤧᤴᤗᤵ ᤁᤧᤄᤥ᤺ᤒᤠᤖ ᤁᤧᤒᤵᤐᤠ ᤜᤧᤰᤁᤩᤠᤱ ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤏᤡ᤹ ᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤪᤡᤛ᤻ᤋᤖᤧ ᤋᤥ᤺ᤴᤍᤢᤒᤠ ᤑᤢᤱᤏᤠᤶ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
16 ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤱᤃ ᤛᤡ᤺ᤔᤧᤸᤗᤧ ᤁᤢᤏᤠᤶ ᤁᤢᤀᤡᤛᤡ᤺ᤰ ᤐᤥ᤺ᤱ. ᤁᤖ ᤛᤧᤴᤗᤵ ᤁᤧᤄᤥ᤺ᤒᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤑᤢᤱᤏᤠᤶ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥ ᤀᤰᤋᤱᤒᤠ ᤕᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠ᤺ᤳ ᤗᤠ᤹ᤖᤢᤒᤣ᥅
17 ᤀᤠᤏᤡᤃᤧᤃ ᤘᤣ᤹ᤜᤠ᤹ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤗᤧᤱᤜᤱ ᤁᤧᤈᤥ᤺ᤰᤐᤠᤛᤡᤃᤧᤃ ᤔᤧ᤺ᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤛᤡᤒᤠ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤐᤠᤖᤡᤃᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤳᤋᤡᤃᤧᤖ ᤘᤠ᤹ ᤁᤧᤗ᤹ᤒᤠᤴ ᤏᤡ᤺ᤛᤢᤶᤒᤧᤖᤥ॥