11
ᤐᤠᤘᤗᤧᤴ ᤏᤢ ᤀᤡᤱᤗᤧᤰᤁᤣ ᤛᤣ᤺ᤰᤕᤢᤰᤔᤡᤒᤠᤜᤠ᤹
ᤀᤡᤱᤃᤠ᤹ ᤀᤡᤈᤧ᤺ᤳᤇᤡᤰ ᤀᤍᤱ ᤆᤥ᤺ᤰᤁᤠᤛᤠᤱ ᤕᤠᤵᤔᤡ ᤁᤧᤎ᤺ᤳᤋᤡ᤹ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤂᤡᤏᤡ᤹ ᤀᤠᤎᤖᤧᤶᤔᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤃᤧᤜᤧᤳᤋᤡᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤏᤠᤜᤧᤳᤏᤡᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤀᤡᤳᤌᤢᤱᤃᤧᤴ ᤏᤠᤗᤡᤛᤠᤱ ᤂᤪᤡᤛ᤻ᤋᤧᤴᤏᤢᤖᤰ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠ ᤔᤠᤱᤜᤧᤰ ᤆᤥᤃᤢᤱ ᤐᤡᤏᤡᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤛᤣᤛᤣᤔᤠ ᤛᤡᤛᤠᤔᤣ᤺ᤳ ᤁᤢᤀᤡᤛᤡ᤺ᤰ ᤂᤢᤏᤧ᤹ᤀᤥᤀᤣ ᤋᤥ᤺ᤶᤔᤠ ᤛᤢᤰᤏᤡᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤁᤖ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤛᤫᤠᤔᤠᤀᤥᤗᤠᤶ ᤜᤘᤠ᤺ᤴ* ᤀᤡᤱᤗᤧᤰᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤂᤪᤡᤛ᤻ᤋᤀᤥ ᤁᤧᤍᤥ᤺ᤴᤍᤢᤶᤒᤠ ᤔᤡ᤺ᤶᤈᤡᤴ ᤏᤢ ᤋᤥ᤺ᤴᤍᤥ᤺ᤶᤒᤠ ᤏᤡᤱᤘᤠ᤹ᤀᤡᤴ ᤗᤠᤶᤓᤥ᤺ᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤡ᤺ᤀᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤔᤧᤍᤠᤀᤠᤱ ᤁᤢᤓᤠᤖᤧᤃ ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧᤒᤠ ᤕᤧᤛᤢ᤺ᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠ ᤕᤧᤛᤢ᤺ᤴ ᤀᤡᤱᤔᤧᤓᤥ᤺ᤛᤢ᤹ᤏᤧ ᤑᤠ᤹ᤃᤪ. ᤀᤡᤃᤪ ᤁᤧᤄᤥ᤺ᤛᤢᤶᤒᤠ ᤛᤣᤛᤣᤔᤠᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠᤴ ᤁᤧᤄᤥ᤺ᤛᤢᤶᤏᤧ ᤑᤠ᤹ᤃᤪ. ᤀᤡᤃᤪ ᤕᤠᤶᤔᤥ ᤋᤧᤴᤍᤡᤱ ᤁᤧᤈᤥᤃᤢᤶᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶᤏᤧ ᤑᤠ᤹ᤃᤪ ᤂᤧᤴ ᤐᤠ᤺ᤴᤜᤠ᤹ ᤁᤧᤎᤖᤢᤶᤔᤠᤱ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ॥ ᤁᤖ ᤕᤶᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧ ᤀᤡᤱᤃᤠ᤹ᤃ ᤆᤢ᤺ᤰᤁᤠᤒᤡᤗᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤱᤅᤡᤴᤗᤥ॥ ᤂᤧᤱᤜᤠ᤹ ᤜᤧᤰᤁᤣ ᤀᤡᤱᤃᤠ᤹ ᤗᤧᤛ᤻ᤛᤢᤱ ᤏᤡ᤺ᤛᤢᤱᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤋᤱᤔᤠᤖ ᤐᤠ᤺ᤵᤔᤠ ᤔᤧᤛᤢᤰᤁᤠᤴᤒᤡᤗᤠ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤕᤖᤡᤰ ᤗᤧᤛ᤻ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤋᤃᤡᤛᤠ ᤁᤠᤰ ᤐᤖᤡᤰᤗᤧ ᤏᤢ᤺ᤖᤡᤰᤁᤠᤱ ᤂᤡᤏᤡ᤹ᤀᤥ ᤀᤥᤛᤣ᤺ᤴᤍᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥
ᤀᤡᤱᤃᤠ᤹ ᤆᤢᤱᤈᤡᤃᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤀᤠᤶᤓᤠᤀᤣ ᤂᤡᤏᤡ᤹ ᤀᤡᤱᤓᤥ᤺ᤏᤡᤱᤅᤡᤸᤗᤧ ᤗᤠᤕᤥ ᤆᤥᤃᤢᤱᤒᤡ᥅ ᤂᤡᤏᤡ᤹ᤀᤥ ᤔᤠᤱᤛᤣᤘᤠ ᤆᤥᤃᤢᤱᤅᤡᤸᤗᤧ ᤘᤣ᤹ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤁᤢᤓᤠ᤹ ᤕᤠᤱ ᤔᤧᤒᤡᤖᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤀᤠᤶᤓᤠᤀᤣ ᤛᤣᤘᤠ ᤆᤥ᤺ᤰᤛᤧ ᤘᤣ᤹ᤜᤠ᤹ ᤏᤠᤵᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤖᤧᤗᤠᤃᤡ ᤂᤡᤏᤡ᤹ ᤀᤠᤳᤋᤡᤴᤏᤠᤱ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤔᤧᤛᤣᤍᤥᤏᤡᤕᤠᤗᤠᤶ ᤁᤧᤍᤠ᤺ᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤀᤡᤱᤃᤠ᤹ ᤕᤠᤵᤔᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤖᤧᤴ ᤋᤱᤃᤠᤶ ᤔᤧᤈᤥᤃᤠᤱ ᤔᤧᤒᤡᤖᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤀᤠᤳᤋᤡᤴᤏᤠᤱ ᤀᤠᤳᤋᤡᤴ ᤐᤖᤡᤰᤗᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤏᤡᤱᤅᤡᤸᤗᤥ॥ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤜᤧᤰᤁᤣᤀᤣ ᤆᤥᤃᤢᤱᤗᤥ॥ 10 ᤂᤪᤡᤛ᤻ᤋᤖᤧ ᤁᤢᤛᤧᤰᤂᤠ᤺ᤴ ᤀᤡᤱᤃᤠ᤹ᤀᤥ ᤘᤠ᤹ᤖ ᤌᤠᤖᤡᤰ ᤀᤰᤂᤤᤕᤠ ᤌᤢᤶᤔᤥᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤴ ᤕᤶᤒᤠ ᤗᤧᤱᤛᤡᤱᤔᤠ ᤐᤠ᤺ᤴ ᤐᤠ᤺ᤵᤔᤠᤗᤠᤶ ᤛᤠᤰᤔᤠ ᤔᤧᤴᤇᤢᤰᤁᤠᤴᤗᤥ॥ 11 ᤌᤣᤀᤠᤱᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤗᤢᤱᤔᤠ᤹ ᤔᤧᤍᤢᤰᤏᤡᤱᤅᤡᤴᤏᤠᤱᤒᤡ᥅ ᤔᤧ᤺ᤴᤗᤥ᥄ ᤀᤡᤱᤃᤠ᤹ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ॥
12 ᤀᤠᤏᤡᤃᤧ ᤆᤥᤃᤢᤶᤒᤧᤖ ᤘᤕᤡᤃᤧᤒᤠ ᤕᤠ᤺ᤶᤒᤰ ᤜᤧᤰᤋᤱᤒᤠᤀᤣ ᤂᤧᤴ ᤘᤣ᤹ “ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ” ᤔᤧᤈᤥᤃᤢᤀᤠᤱ ᤀᤠᤱᤍᤡᤱ ᤗ᤹ᤔᤠ ᤔᤧᤱᤄᤥ᤺ᤛᤢᤴᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤸᤗᤥ ᤆᤥᤃᤢᤱᤗ ᤘᤠ᤹ᤀᤠᤒᤠ ᤔᤠᤱᤛᤣᤘᤠ᤺ᤴ ᤛᤍᤠᤍᤡᤱ ᤁᤢᤓᤠ᤹ ᤕᤠᤱ ᤔᤧ᤺ᤴᤏᤣ ᤀᤠᤶᤓᤠ ᤆᤥᤃᤢᤱᤗᤥ॥ 13 ᤌᤣᤀᤠᤱᤓᤧᤸᤗᤧ ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤑᤥᤋᤩᤠᤒᤠ ᤛᤣ᤺ᤰᤕᤢᤰᤔᤡᤒᤠᤛᤡ ᤏᤢ ᤀᤡᤱᤗᤧᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤔᤧᤗᤧᤱᤛᤡᤱᤗᤥ॥ 14 ᤔᤠᤑᤧᤴᤛᤠᤶᤔᤡᤴᤏᤠᤱ ᤀᤥ᤺ᤳᤋᤡ᤺ᤸᤗᤧᤴ ᤔᤠᤱᤗᤠᤀᤡᤱᤒᤠ ᤗᤧᤱᤛᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥ 15 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ᤀᤠᤱ ᤛᤠᤶᤕᤥᤏᤡᤒᤠ ᤔᤠᤱᤛᤣᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤔᤧᤗᤧᤱᤛᤡᤱᤅᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤜᤥ᤺ᤵᤗᤥ॥ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤗᤠ᤹ᤖᤢᤒᤠ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥
ᤐᤠᤘᤗᤖᤧ ᤋᤢᤰᤂᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹
16 ᤀᤡᤱᤃᤠ᤹ ᤕᤠᤶᤔᤥ ᤐᤠ᤺ᤳᤋᤢᤱ. ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤀᤍᤱ ᤁᤢᤀᤡᤛᤡ᤺ᤰ ᤔᤧᤴᤀᤡ᤺ᤳᤋᤠᤴᤗᤖᤥ॥ ᤁᤖ ᤂᤡᤏᤡ᤹ ᤜᤧᤰᤁᤣ ᤕᤠᤵᤔᤡ ᤁᤧᤀᤡ᤺ᤳᤋᤡᤛᤠᤱ ᤀᤡᤱᤃᤠ᤹ ᤆᤩ᤹ᤛᤡᤰ ᤆᤶᤛᤡᤱᤔᤠ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤍᤱ ᤁᤢᤀᤡᤛᤡ᤺ᤰᤁᤣ ᤕᤠᤵᤔᤡ ᤀᤡ᤺ᤳᤋᤧᤀᤠᤱ ᤀᤠᤍᤠ᤺ᤰᤋᤧᤶᤔᤧ᤹ᤀᤥ॥ 17 ᤀᤰᤂᤣᤗ᤹ᤖᤡᤰ ᤆᤶᤛᤡᤱᤅᤠᤸᤗᤧ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤀᤡᤱᤃᤠ᤹ ᤀᤍᤱ ᤁᤢᤀᤡᤛᤡ᤺ᤰᤏᤧ ᤆᤥ᤺ᤰᤁᤠᤖᤥ॥ 18 ᤘᤣ᤹ ᤔᤏᤠᤜᤠ᤹ ᤕᤠ᤺ᤶᤒᤰᤁᤥ ᤔᤧᤈᤶᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤱᤃᤠ᤹ᤀᤠᤱ ᤆᤶᤛᤡᤱᤅᤠᤖᤥ॥ 19 ᤛᤧᤰᤂᤠ᤺ᤸᤗᤧ ᤂᤡᤏᤡ᤹ᤃ ᤛᤡᤰᤁᤢᤶᤛᤠᤒᤠ ᤁᤧᤀᤡ᤺ᤳᤋᤠᤛᤡᤒᤠᤸᤗᤧ ᤀᤍᤱᤜᤠ᤹ᤀᤠᤱ ᤁᤧᤎᤖᤢᤶᤛᤡᤶᤔᤠᤱ ᤘᤠ᤹ᤖᤧᤳᤇ᥄ 20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤧᤱᤜᤠ᤹ᤖᤧ ᤕᤥ᤺ᤰ ᤁᤧᤶᤈᤥᤃᤡ᤹. ᤂᤡᤏᤡ᤹ ᤁᤧᤃᤳᤋᤢᤶᤒᤠᤴ ᤁᤧᤖᤧᤰ ᤔᤧᤍᤣ᤹ᤖᤢ᤹. ᤂᤡᤏᤡ᤹ᤗᤠᤶᤒᤠ ᤀᤡᤴᤎᤠ᤺ᤰ ᤔᤧᤈᤥᤃᤢ᤹. ᤀᤡᤱᤃᤠ᤹ᤀᤣ᤺ᤰ ᤗ᤹ᤖᤡᤰ ᤔᤧᤜᤧᤴᤇᤡᤱ. ᤜᤧᤰᤁᤩᤠᤱ ᤂᤡᤏᤡ᤹ ᤏᤧᤍᤧᤱᤒᤠᤴ ᤁᤧᤶᤗᤧᤰᤂᤡ᤹ ᤁᤧᤶᤒᤡᤖᤡ᤹ᤛᤠᤱ ᤁᤧᤖᤧᤰ ᤁᤧᤎᤖᤢᤶᤛᤡᤶᤔᤠᤱ ᤘᤠ᤹ᤖᤧᤇ॥ 21 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤀᤠᤏᤡᤃᤧᤃ ᤂᤡᤏᤡ᤹ ᤔᤧᤵᤔᤠ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤋᤢᤶᤒᤠᤴᤗᤥ ᤗ᤹ᤖᤡᤰ ᤐᤠ᤺ᤵᤔᤠ ᤀᤡᤱᤃᤠ᤹ ᤛᤡᤖᤡᤱ ᤔ᤺ᤀᤠᤖᤥ॥
ᤕᤠᤶᤔᤥ ᤀᤍᤱ ᤁᤢᤀᤡᤛᤡ᤺ᤰ ᤐᤠ᤺ᤳᤋᤠᤖᤥ–ᤀᤠᤳᤋᤡᤴ ᤐᤠ᤺ᤴᤏᤥ ᤂᤧᤱᤜᤠ᤹ ᤔᤧᤜᤧᤴᤇᤡᤱ. ᤀᤡᤱᤃᤠ᤹ᤀᤠᤱ ᤒᤠ ᤂᤧᤴ ᤐᤠ᤺ᤴᤏᤥ ᤜᤧᤴᤇᤡᤱᤔᤠ ᤛᤢᤰᤁᤠᤖᤥ॥ 22 ᤂᤧᤱᤜᤠ᤹ ᤜᤡᤒᤪᤢᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤜᤡᤒᤪᤢᤀᤠᤖᤥ॥ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤀᤡᤛᤪᤠᤀᤡᤗᤡᤀᤠᤖᤥ॥ ᤂᤧᤱᤜᤠ᤹ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤀᤠᤖᤥ॥ 23 ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠᤛᤡᤒᤡ᥅ ᤀᤡᤱᤃᤠ᤹ᤃ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤢᤛᤣᤘᤠᤖᤥᤒᤠᤀᤠᤖᤥ. ᤁᤖ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤠᤸᤗᤧ ᤁᤢᤎᤏᤠ ᤁᤧᤗᤧᤱᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰᤁᤠᤖᤥ॥ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤱᤃᤠ᤹ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤠᤱ. ᤕᤖᤡᤰᤗᤧᤱ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱ. ᤕᤖᤡᤰᤗᤧᤱ ᤋᤧ᤺ᤶᤓᤢᤰ ᤆᤩᤠᤱ. ᤜᤧᤰᤁᤩᤠᤱ ᤀᤧᤳᤗᤧᤱ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤠᤱᤗᤥ॥ 24 ᤅᤠᤛᤡ ᤗᤧᤱ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤛᤢᤶ-ᤑᤠᤱ (᥉᥏) ᤌᤠᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤠᤱ. 25 ᤛᤢᤶᤗᤧᤱ ᤖᤥᤔᤡᤜᤠ᤹ᤖᤧ ᤋᤰᤁᤠ᤺ᤳᤋᤡᤸᤗᤧ ᤔᤧᤜᤡᤵᤋᤠᤱ. ᤌᤡᤰᤗᤧᤱ ᤏᤡᤱᤔᤡᤜᤠ᤹ᤖᤧ ᤗᤢᤱᤅᤡᤸᤗᤧ ᤔᤧᤒ᤺ᤳᤋᤠᤱ. ᤛᤢᤶᤗᤧᤱ ᤀᤡᤱᤃᤠ᤹ ᤗᤠᤶᤍᤡ᤺ᤰ ᤆᤥᤃᤠᤱᤒᤠ ᤘᤠᤗᤠᤎᤠ᤺ᤴ ᤏᤡᤒᤧ. ᤜᤧᤰᤁᤩᤠᤱ ᤌᤡᤰᤗᤧᤱ ᤌᤡᤰ ᤕᤧᤴ ᤏᤢ ᤌᤡᤰ ᤛᤧᤴᤍᤡᤰ ᤂᤠᤖᤠᤰ ᤀᤡᤱᤃᤠ᤹ ᤘᤖᤰᤁᤥᤀᤣ ᤕᤠᤃᤠᤱᤗᤥ॥ 26 ᤀᤡᤱᤃᤠ᤹ᤃ ᤕᤖᤡᤰᤗᤧᤱ ᤗᤠᤶᤍᤡ᤺ᤰ ᤆᤥᤃᤠᤱᤅᤡᤸᤗᤧ ᤘᤠᤜᤱᤅᤥ ᤜᤧᤰᤁᤩᤠᤱ ᤑᤠ᤺ᤴᤍᤠᤜᤠ᤹ᤗᤠᤶᤒᤠ. ᤀᤠᤒᤠᤅᤣ ᤗᤠᤈᤣ᤹ᤛᤠᤒᤠᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤗᤠᤶᤒᤠ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ ᤋᤢᤔᤢᤱᤗᤥ॥ ᤜᤧᤰᤁᤩᤠᤱ ᤕᤧᤰᤕᤰᤁᤥ. ᤕᤧ᤺ᤱᤄᤠᤍᤧᤴᤏᤥ. ᤘᤖᤰᤁᤥᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱᤅᤥ. ᤜᤧᤰᤁᤩᤠᤱ ᤑᤥᤋᤩᤠᤒᤠ ᤑᤢ᤹ᤏᤢᤛᤠ᤹ᤗᤠᤶᤒᤠᤀᤠᤱ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ ᤋᤢᤔᤢᤱᤅᤠᤱ ᤘᤠ᤹ᤀᤠᤖᤥ॥ 27 ᤀᤡᤱᤃᤠ᤹ᤃ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤠᤱ ᤜᤧᤰᤁᤩᤠᤱ ᤕᤖᤡᤰᤗᤧᤱ ᤛᤧᤴᤍᤡᤰ ᤔᤧᤀᤡᤵᤛᤠᤱᤅᤡᤴᤗᤥ॥ ᤛᤧᤳᤗᤠ᤺ᤰᤔᤠ ᤏᤢ ᤘᤠᤔᤡ᤺ᤔᤠᤸᤗᤧ ᤋᤖᤠᤱ ᤜᤧᤰᤁᤩᤠᤱ ᤕᤖᤡᤰᤗᤧᤱ ᤌᤣᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤱᤄᤥ᤺ᤒᤠᤴᤗᤥ॥ ᤆᤢᤱᤅᤡᤸᤗᤧ ᤌᤳᤋᤠᤱ ᤌᤣᤀᤠᤱᤓᤧᤸᤗᤧ ᤁᤧᤃᤥ᤺ᤒᤠ ᤆᤠᤱᤍᤣ᤺ᤳ ᤔᤧᤱᤃᤵᤐᤧᤴᤗᤥ॥ 28 ᤜᤧᤰᤁᤩᤠᤱ ᤂᤧᤴ ᤋᤢᤰᤂᤣᤜᤠ᤹ᤖᤰ ᤔᤧ᤺ᤴ. ᤁᤖ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤗᤠᤃᤡᤀᤠᤱ ᤌᤡᤰᤕᤠ᤺ᤴᤎᤰ ᤏᤡᤱᤛᤠᤶᤔᤥ ᤌᤩᤠᤱᤅᤠᤱ ᤀᤠᤏᤡᤱᤘᤠ᤹ᤒᤥ ᤋᤢᤰᤂᤣ ᤆᤩᤠᤱᤗᤥ॥ 29 ᤜᤠ᤺ᤳᤋᤠᤱ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤈᤥ᤺ᤰᤏᤧᤴᤏᤡᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤠᤕᤥᤀᤥ ᤔᤧᤎᤠ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤰᤗᤥ॥
30 ᤀᤡᤱᤃᤠ᤹ ᤆᤶᤛᤡᤱᤔᤠᤀᤣ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴ ᤗ᤹ᤖᤡᤰ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤀᤥᤏᤧ ᤆᤶᤛᤡᤱᤅᤠᤖᤥ॥ 31 ᤛᤍᤠᤍᤡᤱ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤑᤥ᤺ᤔᤏᤠᤒᤠ ᤍᤠᤱᤒᤠ ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤱᤅᤡᤴ ᤑᤠ᤹ᤀᤠᤱ ᤏᤡ᤺ᤛᤢ᤹ᤖᤥ॥ 32 ᤍᤔᤛ᤻ᤁᤛ ᤕᤧᤰᤕᤰᤁᤥ ᤘᤕᤠᤱᤅᤡᤸᤗᤧ ᤀᤖᤡᤋᤛ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤸᤗᤧ ᤀᤡᤱᤃᤠ᤹ ᤀᤠᤍᤧᤶᤛᤧ ᤕᤧᤰᤕᤰᤁᤥ ᤌᤰᤛᤢᤒᤠᤜᤠ᤹ ᤕᤧᤵᤛᤢᤛᤡᤖᤥ॥ 33 ᤁᤖ ᤀᤡᤱᤃᤠ᤹ᤃ ᤗᤢᤶᤓᤢ᤹ᤀᤥ ᤔᤧᤕᤠᤰᤋᤠᤱᤅᤠᤱ ᤕᤧᤰᤕᤰᤗᤧᤴ ᤗᤢᤱᤎᤠᤰᤁᤥᤒᤠ ᤐᤣᤎᤠ᤺ᤵᤗᤠᤶᤒᤠ ᤕᤥ ᤗᤠ᤺ᤰᤁᤠᤳ ᤔᤧᤎᤠᤛᤠᤱ ᤔᤧᤗ᤺ᤳᤋᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤜᤢᤰᤁᤥ ᤔᤧᤴᤎᤠᤒᤠᤴᤗᤥ॥
* 11:3 ᤜᤘᤠ–ᤌᤡᤰᤛᤡᤃᤣ᤺ᤰᤛᤔᤠ ᤔᤧᤴᤇᤡᤔᤠ᤹॥ ᤔᤠᤑᤧᤴᤛᤠᤶᤔᤡᤴ ᤀᤛᤣ᤺ᤰ ᤗᤧᤱᤛᤡᤱᤅᤠᤱ ᤜᤘᤠ᤺ᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤡᤱᤛᤣ᤹ᤀᤡᤴ ᤆᤠᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤛᤠ᤺ᤴ ᤔᤧᤈᤥᤃᤧᤴᤏᤧ᤹ ᤔᤧᤳᤋᤢᤀᤠᤱ ᤘᤕᤧ (ᤋᤥᤗᤡᤱᤛᤥᤔᤢ ᥉)॥ ᤜᤘᤠ᤺ᤸᤗᤧ ᤔᤠᤑᤧᤴᤛᤠᤶᤔᤡᤴ ᤏᤛᤠ᤺ᤴ ᤆᤥᤃᤢ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤑᤣ᤺ᤴᤍᤢ॥