12
ᤐᤠᤘᤗᤖᤧ ᤏᤡ᤺ᤛᤢᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤛᤢᤑᤥ
1 ᤀᤡᤱᤃᤠ᤹ ᤆᤶᤛᤡᤱᤅᤠᤸᤗᤧ ᤌᤣᤀᤠᤱ ᤔᤧᤈᤰᤁᤠᤴᤇᤠᤱ ᤀᤡᤱᤃᤠ᤹ ᤍᤠᤱᤒᤠᤗᤠᤶᤒᤠ ᤂᤥ᤺ᤛᤢᤱᤒᤠ ᤛᤢᤑᤥᤜᤠ᤹ ᤏᤢ ᤀᤥᤛᤣ᤺ᤴᤍᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤆᤶᤛᤡᤱᤅᤠᤖᤀᤣ ᤐᤥ᤺ᤱᤗᤥ॥
2 ᤀᤡᤱᤃᤠ᤹ ᤌᤡᤰ-ᤗᤡ (᥇᥊) ᤋᤱᤒᤣ ᤋᤃᤡ ᤛᤢᤶᤛᤡᤃᤣ᤺ᤰᤐᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤋᤣ᤹ᤖᤧᤀᤠᤱ ᤘᤕᤧᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤎᤡᤰ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤂᤧᤴ ᤔᤏᤠ᤺ᤴ ᤏᤠᤛᤡᤱᤃᤧᤴ ᤌᤰᤁᤥᤒᤡ ᤔᤧ᤺ᤶᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ॥
3-4 ᤀᤡᤱᤃᤠ᤹ ᤁᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤒᤠ ᤔᤏᤠ᤺ᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ (ᤕᤠᤶᤔᤥᤀᤠᤱ ᤐᤠ᤺ᤳᤋᤢᤱ–ᤂᤧᤴ ᤔᤏᤠ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤐᤣ᤺ᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤐᤣᤒᤡ ᤀᤡ ᤛᤢᤑᤥᤖᤰ ᤏᤡ᤺ᤛᤢᤱᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ)॥ ᤂᤧᤸᤗᤧ ᤔᤏᤠᤖᤧ ᤐᤠ᤺ᤵᤔᤠ ᤔᤧᤸᤗᤠ᤹ᤔᤏᤠᤒᤠ ᤛᤠ᤹ᤖᤡᤰ ᤛᤣᤛᤣᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤖᤥ॥
5 ᤀᤡᤱᤃᤠ᤹ᤃ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤏᤧ ᤆᤶᤛᤡᤱᤅᤠᤖᤥ. ᤁᤖ ᤀᤡᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴ ᤗ᤹ᤖᤡᤰ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤐᤠ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤒᤠᤅᤣ ᤀᤠᤕᤠ᤺ᤶᤒᤣᤀᤥ ᤔᤧᤈᤶᤛᤡᤱᤅᤠᤴᤗᤥ॥
6 ᤀᤡᤱᤃᤠ᤹ᤃ ᤆᤶᤛᤡᤱᤔᤠᤀᤣ ᤐᤥ᤺ᤱᤛᤠᤱ ᤀᤍᤱ ᤔᤧᤒᤥ᤺ᤱᤅᤠᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤧᤰᤂᤠᤀᤣ ᤐᤠ᤺ᤳᤋᤠᤖ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤔᤧᤈᤶᤛᤡᤱᤅᤠᤴᤗᤥ. ᤜᤧᤰᤁᤣᤗ᤹ᤖᤡᤰ ᤆᤥᤃᤢᤱ ᤐᤠ᤺ᤳᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤳᤋᤡᤸᤗᤧᤀᤠᤱ ᤔᤧᤀᤡ᤺ᤳᤋᤠᤴᤗᤖᤥ॥
ᤏᤠᤛᤡᤱᤃᤧᤴ ᤌᤰᤁᤥ ᤀᤠᤄᤄᤒᤠ ᤋᤡᤱᤅᤡᤴ
7 ᤁᤴ ᤐᤕᤶ ᤕᤶᤒᤠ ᤀᤥᤛᤣ᤺ᤴᤍᤠᤱᤜᤠ᤹ ᤂᤥ᤺ᤛᤢᤱᤒᤠᤸᤗᤧ ᤀᤠᤱᤍᤡᤱ ᤔᤧᤗ᤹ᤀᤠᤴᤗ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤋᤡᤱ ᤁᤢᤀᤡᤛᤡ᤺ᤰ ᤀᤠᤄᤄᤒᤠ ᤐᤠ᤺ᤴᤎᤡᤰ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤱᤛᤠᤒᤠᤖᤥ. ᤂᤧᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤖ ᤘᤠ᤹ᤖᤥ॥
8 ᤁᤴ ᤀᤡᤱᤃᤠ᤹ᤀᤥᤏᤢ ᤂᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤛᤢᤶᤗᤧᤱ ᤌᤠᤖᤡᤰ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱ॥
9 ᤁᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ᤀᤥ ᤀᤡᤱᤃᤠ᤹ ᤀᤠᤗᤢᤱᤃᤢᤶᤔᤡᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠ᤹ᤀᤡᤔᤧᤴᤕᤠᤰᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤀᤠᤔᤢᤰᤛᤠᤶᤔᤡᤴ ᤁᤢᤗᤡᤱᤎᤥ ᤁᤧᤳᤗᤥ॥” ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤴ ᤀᤡᤱᤃᤠ᤹ᤀᤥ ᤘᤠ᤹ᤖ ᤑᤠ᤹ᤀᤠᤱ ᤔᤧᤴᤎᤢᤶᤔᤏᤠ ᤀᤠᤒᤠ᤺ᤴᤜᤠ᤹ᤀᤥᤏᤧ ᤛ᤺ᤳᤋᤠᤖ ᤆᤶᤛᤡᤱᤅᤠᤖᤥ॥
10 ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤛᤠ᤹ᤀᤡᤔᤧᤴᤕᤠᤰᤔᤏᤠ ᤐᤠ᤺ᤴᤜᤠ᤹ᤀᤥ. ᤏᤠᤎᤠᤔᤠᤀᤥ. ᤕᤧᤳᤋᤢᤰᤂᤣᤀᤥ. ᤏᤡᤱᤄᤢᤶᤔᤥ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ᤀᤥ ᤌᤠᤀᤠᤸᤗᤧᤀᤣ ᤛ᤺ᤳᤋᤠᤖᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤠ᤹ᤀᤡ ᤔᤧᤕᤠᤰᤏᤧᤴᤏᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤶᤒᤠ ᤐᤥ᤺ᤱᤅᤠᤖᤥ॥
ᤛᤣ᤺ᤰᤕᤢᤰᤔᤡᤒᤠ ᤔᤡᤰᤛᤣ᤺ᤴ
11 ᤀᤡᤱᤃᤠ᤹ᤃ ᤀᤍᤱ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤗᤥ. ᤁᤖ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤕᤠᤵᤔᤡ ᤁᤧᤒᤠᤱᤄᤡᤖᤥ॥ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤏᤢ᤺ᤒᤠ ᤐᤠ᤺ᤴ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧ᤺ᤴᤏᤠ᤹ᤛᤠᤱ ᤕᤶᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧ ᤆᤢᤰᤛᤠ ᤔᤧᤈᤥ᤺ᤰᤁᤠᤴᤗᤥ॥
12 ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤏᤠᤛᤡ ᤌ᤺ᤳᤋᤢᤱᤗ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢ᤹ᤖᤥ॥
13 ᤂᤡᤏᤡ᤹ ᤀᤠᤳᤋᤡᤴ ᤐᤠ᤺ᤴᤏᤥ ᤘᤣ᤹ᤛ᤻ᤔᤠ ᤛᤣᤛᤣᤜᤢᤵᤗᤰᤜᤠ᤹ᤏᤢ᤺ᤸᤗᤧ ᤁᤧᤛᤢ᤺ᤴᤍᤡᤒᤣ᥅ ᤁᤶᤔᤩᤠᤰᤗᤰᤗᤥ–ᤀᤡᤱᤃᤠ᤹ ᤂᤡᤏᤡ᤹ ᤁᤢᤓᤠ᤹ ᤕᤠᤱ ᤔᤧᤏᤠ᤺ᤰᤏᤡᤱᤅᤡᤴᤗᤥ᥄ ᤀᤰᤂᤣᤗ᤹ᤖᤡᤰ ᤋᤢᤰᤂᤣ ᤆᤠᤳᤏᤡᤱᤒᤠᤀᤥ ᤗᤧᤵᤔᤡ ᤀᤠᤒᤡᤖᤧᤶᤔᤧ᤹ᤀᤥ᥄
ᤐᤠᤘᤗᤖᤧ ᤁᤥᤖᤴᤌᤡ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤳᤋᤢ᤹
14 ᤀᤠᤸᤗ ᤛᤢᤶᤗᤧᤱᤅᤥ ᤂᤡᤏᤡ᤹ ᤛᤠ᤹ᤛᤧ ᤋᤠ᤺ᤔᤠ ᤕᤠᤖᤡᤵ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ᤺ᤴ ᤔᤧ᤺ᤴ. ᤁᤖ ᤂᤡᤏᤡ᤹ᤏᤧ ᤆᤠᤜᤠᤒᤠ ᤆᤥ᤺ᤰᤁᤠᤖᤥ॥ ᤌᤣᤀᤠᤱᤓᤧᤸᤗᤧ ᤛᤠ᤺ᤜᤠ᤹ᤖᤧ ᤔᤠ-ᤒᤠᤜᤠ᤹ᤖᤧᤗᤠᤃᤡ ᤔᤧ᤺ᤴ. ᤁᤖ ᤔᤠ-ᤒᤠᤜᤠ᤹ᤖᤧᤏᤧ ᤛᤠ᤺ᤜᤠ᤹ᤖᤧᤗᤠᤃᤡ ᤕᤠᤱᤛᤠᤁᤢᤴᤎᤣ ᤕᤠᤱᤄᤥ᤺ᤵᤔᤠ ᤐᤥ᤺ᤱᤗᤥ॥
15 ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤕᤠᤱᤅᤡᤴ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤐᤎᤠᤱᤎᤠᤱᤗ ᤋᤣ᤺ᤛᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤐᤡᤛᤡᤱᤅᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤕᤖᤡᤰ ᤗᤢᤱᤔᤠ᤹ ᤋᤢᤰᤏᤡᤱᤅᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤆᤩ᤹ᤖᤰ ᤗᤢᤱᤔᤠ᤹ ᤕᤠᤵᤔᤡ ᤁᤧᤍᤢᤰᤋᤡᤒᤠᤒᤣ᥅
16 ᤕᤠᤱ ᤏᤠ᤺ᤰᤏᤡᤱᤅᤠᤱ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤒᤠ ᤐᤠ᤺ᤴᤏᤡᤴ ᤁᤧᤏᤡ᤺ᤛᤢᤶᤗᤥ. ᤁᤖ ᤀᤡᤱᤃᤠ᤹ ᤀᤡᤱᤗᤧᤰᤏᤡᤱᤅᤠᤱ ᤂᤡᤏᤡ᤹ ᤀᤡᤈᤥᤀᤥ ᤌᤠᤏᤡᤱ ᤑᤠ᤹ᤀᤠᤱ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤗᤥ॥
17 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤒᤠ ᤔᤏᤠᤜᤠ᤹ᤗᤠᤶ ᤌᤣᤀᤡ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤡᤱᤗᤧᤰᤏᤡᤱᤒᤡ᥅
18 ᤀᤡᤱᤃᤠ᤹ ᤋᤡᤋᤛᤧᤴ ᤂᤡᤏᤡ᤹ᤀᤥ ᤐᤠᤱᤔᤠ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤅᤠᤱ ᤘᤣ᤹ᤛ᤻ᤔᤠ ᤏᤢᤛᤠ᤹ᤀᤡᤴᤏᤠᤱ ᤂᤢᤏᤧ᤹ᤏᤢᤀᤣ ᤐᤠᤱᤄᤢᤱᤗᤥ॥ ᤋᤡᤋᤛᤖᤧ ᤂᤡᤏᤡ᤹ᤗᤠᤶᤒᤠ ᤌᤣᤀᤡ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤡᤱᤃᤧᤗᤧᤰᤋᤡᤒᤡ᥅ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤴᤇᤡᤃᤧᤃ ᤌᤡᤰ ᤛᤣᤛᤣᤔᤠᤱᤅᤡᤴ ᤁᤳᤇᤢᤃᤧ ᤜᤧᤰᤁᤩᤠᤱ ᤌᤡᤰ ᤗᤠᤶᤔᤥ ᤗᤠᤱᤄᤣᤃᤧᤳᤇᤡᤃᤧᤖᤥ॥
19 ᤀᤠᤏᤡᤃᤧ ᤀᤠᤸᤗ ᤌᤠᤖᤡᤰ ᤂᤡᤏᤡ᤹ᤗᤠᤶᤒᤠ ᤀᤠᤒᤠᤅᤣ ᤛᤧ᤺ᤵᤐᤠᤛᤡᤃᤧᤖ ᤘᤕᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤐᤠᤖᤡᤃᤧᤖ ᤘᤕᤡᤃᤧᤖᤥ॥ ᤀᤠᤏᤡᤃᤧ ᤔᤡ᤺ᤶ ᤆᤢᤶᤛᤣ. ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤆᤥᤃᤢᤶᤒᤧᤒᤠᤖᤥ॥
20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤀᤡᤱᤃᤠ᤹ ᤏᤡᤱᤛᤠᤱ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰ ᤔᤧᤄᤥ᤺ᤏᤡᤱᤅᤡᤴ. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤕᤠᤵᤔᤡ ᤁᤧᤱᤄᤥᤛᤡᤴᤒᤡ ᤑᤠ᤹ᤀᤠᤱ ᤁᤡ᤺ᤀᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤣᤔᤠ. ᤏᤠᤜᤧᤶᤔᤠ. ᤛᤡᤰ ᤐᤥ᤺ᤰᤔᤠ. ᤛᤧ᤺ᤔᤠ. ᤆᤧ᤹ᤕᤠ ᤐᤱᤔᤠ. ᤔᤏᤠ ᤆᤧᤱᤔᤠ. ᤀᤠᤱᤍᤡᤱ ᤗ᤹ᤔᤠ ᤏᤢ ᤕᤧᤔᤧᤴᤍᤱ ᤕᤧᤵᤗᤧᤰᤜᤠ᤹ᤀᤥ ᤁᤧᤕᤠᤃᤡᤒᤠ ᤋᤢᤶᤏᤡᤱᤒᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤡ᤺ᤀᤠᤖᤥ॥
21 ᤂᤡᤏᤡ᤹ ᤋᤢᤶᤛᤧ ᤕᤠᤶᤔᤥ ᤋᤠᤀᤠᤸᤗᤧ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤋᤃᤡ ᤏ᤺ᤶᤏ᤺ᤶ ᤆᤥ᤺ᤰᤁᤠ ᤑᤠ᤹ᤀᤠᤱ ᤁᤡ᤺ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤋᤃᤡ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤂᤧᤴ ᤀᤠᤛᤢᤳᤌᤥᤗᤠᤶ. ᤆᤠᤖᤠᤶᤔᤠ ᤕᤠ᤺ᤶᤒᤰᤗᤠᤶ. ᤏᤢ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠᤗᤠᤶ ᤕᤖᤡᤰ ᤔᤧᤴᤜᤡᤶᤔᤏᤠᤒᤠ ᤔᤧᤴᤏᤢ᤺ᤱᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤀᤡᤱᤃᤠ᤹ ᤔᤣᤖᤡᤱ ᤌᤰᤔᤠ ᤐᤥ᤺ᤱᤒᤡᤗᤠᤖᤥ᥄