47
Babulon opodho
1 In Nyar Babulon Mangili bed piny e buru;
bed piny e lowo kionge loch in nyar jo-Babulon.
Ok nochak oluongi ni nyako ma dende yom kendo ma jaber.
2 Kawuru nyiponge mondo ureg-go mogo;
goluru leso ma uumogo wengeu.
Ngʼwanuru lepu mondo ungʼadgo aore.
3 Dugu biro neno kendo
wichkuot maru nonenre e lela.
Abiro chulo kuor;
kendo onge ngʼama notony.
4 Jareswa, Jehova Nyasaye Maratego e nyinge,
en e Jal Maler mar Israel.
5 Bed mokuyo kendo ilingʼ thi, in nyar Babulon;
nimar ok nochak oluong ni ruoth madhako mar pinje.
6 Kane iya owangʼ gi joga to ne ajwangʼogi mi
aweyogi ka gima ok gin ogandana awuon;
ne achiwogi e lweti, kendo ne ok ikechogi.
To bende ne iketo tingʼ mapek nyaka ne joma oti.
7 Ne iwacho niya,
Abiro dhi nyime kaka ruoth madhako nyaka chiengʼ!
To ne ok iparo gigi maber bende ne ok igo
machiemo kuom gik manyalo timore.
8 “Koro lingʼ thi, in ngʼat moowre marach makawore
ni nigi ngima mamalo, kendo iwacho e chunyi iwuon ni,
‘An ema antie kendo onge moro ma dirom koda,
ok nachal gi dhako ma chwore otho kata nyithinda ok notho.’
9 Gik moko ariyogi nochopni,
e sa machwok kende e odiechiengʼ achiel:
nyithindi notho kendo inibed dhako ma chwore otho.
Masichegi duto nochopni,
kendo timbe ajuoke gi ris miritorigo ok nokonyi.
10 Isegeno kuom timbeni mamono
kendo isewacho e chunyi ni, ‘Onge ngʼama nena.’
Ngʼeyoni gi riekoni osewuondi
kiwacho e chunyi ni,
‘An kenda ema antie, onge machielo.’
11 Masira biro maki,
mi ok ningʼe kaka digole kuomi.
Adier kwongʼ nogore kuomi
ma ok initieki gi misango,
ee chandruok maduongʼ
ma ok inyal neno sani biro choponi.
12 “Med dhiyo nyime gi timbegi mag jwok
kod timbegi mangʼeny mag ajuoke,
misebedo kitimo nyaka ia e nyathi;
mondo waneane ka digikonyi kata dibwog ji.
13 Rieko duto mosengʼadni osemana tieki!
Koro we jokorgigo obi,
jogo makoro wach dwe ka dwe karango sulwe,
weyane giresi e gik mabiro timoreni.
14 Adiera gichalo mana tiangʼ,
mach biro wangʼogi duto.
Ok ginyal resore kata gin giwegi e teko mar mach.
Kaonge makaa kata mach minyalo hoyo.
15 Mago duto e gik magi nyalo timoni kuom
gik ma isechandorine ka itiyo matek nyaka aa tin-ni.
Moro ka moro nokwangʼ,
kochiko yore owuon kendo onge ngʼama noresi.”