48
Jo-Israel matheko
“Winjuru ma, yaye un joka Jakobo,
miluongo ni jo-Israel kendo ma koth Juda,
un ma ukwongʼoru gi nying Jehova Nyasaye
kendo un muluongo nying Nyasach Israel,
to ok e yo madiera kata makare;
un muluongoru ni weg dala maduongʼ
maler kendo moketo genogi kuom Nyasach Israel,
Jehova Nyasaye Maratego, e nyinge:
Ne akoro chon gik makoro osetimoregi,
dhoga nohulogi mi namiyo gingʼere;
bangʼe ne akelogi piyo magitimore.
Nimar nangʼeyo wich tekou;
ka leche mag ngʼutu ochungʼ,
kendo pat wengeu tek ka nyinyo.
Kuom mano, ne anyisou magi duto chon,
kapok negitimore, to ne asewachonugi,
mondo omi kik uwach niya,
‘Nyisechena manono ema otimo magi;
kido mopa mara kod nyasacha mar mula ema oselerona ma?’
Isewinjo wechegi, rang-gi ane duto.
Donge ibiro yie kodgi?
 
“Kochakore sani abiro nyisi gik manyien,
gik mopondo mapok ingʼeyo.
Gin gik mochwe sani, kendo mapok obudho;
bende gin gik mapok iwinjo nyaka chil kawuono.
Omiyo ok inyal wacho ni, ‘Ee, ne angʼeyogi.’
Chutho ok osewinjo kata mana ngʼeyo,
nimar nyaka aa chon itu ne pok oyaw.
To bende angʼeyo ni un gi mwandu
kendo un oganda ma jopiem nyaka aa nywolu.
Agengʼo mirimba nikech nyinga awuon;
kendo ahora mondo arit pakna,
mondo omi kik atieku.
10 Asepwodhou, to ok kaka ipwodho fedha,
kendo asetemou gi masira mager ka mach.
11 Asetimo kamano kuom rito nyinga,
mana kuom rito nyinga awuon, emomiyo asetimo ma.
Ere kaka dayie mondo nyinga oyany?
Ok ayie mondo duongʼ ma imiya, omi ngʼato machielo.”
Ogony Israel
12 “Winjauru, yaye joka Jakobo in Israel ma aseluongo:
An e en; an ema okwongo kendo an ema ogik.
13 Lweta owuon ema ne oketo mise mar piny
kendo lweta ma korachwich ema ne oyaro polo,
ka aluongogi to giwuok kadiemo wangʼ.
 
14 “Chokreuru un duto mondo uwinji:
Ere kata achiel kuom nyiseche manono mosehulo gima biro timore?
Oganda ma osiep Jehova Nyasaye
ema nokel kum mare kuom Babulon;
mirimbe nobed kuom jo-Babulon.
15 An, kendo en An adier, ema asewacho kamano;
ee, an ema aseluonge.
Abiro kele,
kendo enobed gi loch kuom gik mochano timo.
16 “Sud machiegni koda mondo iwinj wachni:
“Pok apandonu gimoro nyaka ne achak wuoyo kodu;
kendo e kinde mane magi timore, ne antie.”
 
To koro Jehova Nyasaye Manyalo Gik Moko Duto oseora,
gi Roho mare.
 
17 Ma e gima Jehova Nyasaye, ma Jaresni,
Ngʼat Maler mar Israel wacho:
“An e Jehova Nyasaye, ma Nyasachi,
mapuonji gima owinjore kodi kendo manyisi yo monego iluw.
18 Ka dine bed ni irito chikena,
kwe mari domol mana ka aora,
kendo timni makare digingre mana ka apaka mar nam.
19 Nyikwayi dine obedo mana ka kwoyo,
to nyithindi dobedo mangʼeny mokalo akwana;
nying-gi ok nongʼad oko kendo ok noruch e wangʼa.”
 
20 Wuoguru Babulon,
ringuru ua ir jo-Babulon!
Landuru wachni kendo unyis
ji duto ka ugoyo koko gimor.
Landuru wachni e tungʼ piny niya,
“Jehova Nyasaye osereso jotichne ma joka Jakobo.”
21 Kane otelonegi e thim, to riyo ne ok oloyogi;
ee, nomiyo pi owuoknegi e lwanda ka bubni kane obaro lwanda.
 
22 Jehova Nyasaye owacho niya, “Jaricho to onge gi kwe.”