20
Jeremia kod Pashur
1 Ka jadolo Pashur wuod Imer, jatelo maduongʼ manie hekalu mar Jehova Nyasaye, nowinjo Jeremia kakoro gigie,
2 nomiyo Jeremia janabi ogo mi otweye e lodi mar Dhorangach Mamalo mar Benjamin mantiere e hekalu mar Jehova Nyasaye.
3 Kinyne, ka Pashur nogonye e lodi, Jeremia nowachone niya, “Jehova Nyasaye ok luongi ni Pashur, to oluongi ni Magor-Misabib.
4 Nimar ma e gima Jehova Nyasaye wacho: ‘Anami ibed masira ni in iwuon kaachiel gi osiepeni duto; gi wengeni iwuon ininegi ka inegogi gi ligangla mar wasikgi. Anachiw jo-Juda duto ni ruodh Babulon, manotergi e piny Babulon kata negogi gi ligangla.
5 Anami wasikgi mwandu duto mar dala maduongʼni gige duto moloso, gige duto ma nengogi tek kod mwandu duto mokan mag ruodhi Juda. Ginikawgi kaka gima opee mi notingʼ-gi ka iterogi Babulon.
6 To in, Pashur, kod jogo duto modak e odi noteru e twech Babulon. Kanyo unuthoe kendo noyiku, in kod osiepeni duto mane isekoronegi miriambo.’ ”
Ywagruok Jeremia
7 Yaye Jehova Nyasaye, ne iwuonda kendo nowuonda;
ne ihewa kendo iloya giteko.
Itugo koda odiechiengʼ mangima;
kendo ji duto nyiera.
8 Sa moro amora ma awuoyo,
aywak ka goyo milome mar lweny kod kethruok.
Omiyo wach Jehova Nyasaye osekelona ayany
kod wichkuot odiechiengʼ mangima.
9 To ka awacho.
“Ok analuonge kata wuoyo kendo e nyinge,”
wachne chalo mach e chunya,
mana ka mach marewo chokega.
Aol gi tingʼe e chunya; adier, ok anyal.
10 Awinjo ji mangʼeny kakwodho wach,
“Bwok nitie koni gi koni!
Wadonjneuru! Wadonjneuru!”
Osiepena duto rito mondo dhoga okier,
kagiwacho, “Sa moro inyalo wuonde;
eka bangʼe wanapodh kuome kendo wanachul kuor kuome.”
11 To Jehova Nyasaye ni koda kaka jalweny maratego;
omiyo jogo masanda nochwanyre kendo ok giniloya.
Ok ginilo kendo ginibedi gi wichkuot malich;
wichkuot margi wich ok nowil godo.
12 Yaye Jehova Nyasaye Maratego,
in ngʼatno manono joma ratiro,
kendo manyo matut mar chuny kod paro,
mad iol gero mari kuomgi,
nimar ne in asetieko kora.
13 Werne Jehova Nyasaye! Pak Jehova Nyasaye!
Oreso ngima joma nigidwaro,
e lwet joma timbegi mono.
14 Okwongʼ chiengʼ mane onywola!
Mad odiechiengʼ mane minwa onywola kik gwedhi!
15 Okwongʼ ngʼatno mane okelone wuonwa wach,
manomiye obedo gi mor, kowacho,
“Nyathi monywolni en wuowi!”
16 Mad ngʼatno chal gi mier mane
Jehova Nyasaye owito oko maonge ngʼwono.
Mad owinj dengo gokinyi
kod ywak mar kedo e dier odiechiengʼ tir.
17 Nimar ne ok onega e ich,
ka ii minwa bedo kaka bur miika,
noyawre nyaka chiengʼ.
18 Angʼo momiyo ne awuok e ich
mondo ane thagruok kod lit,
kendo atiek odiechiengega e wichkuot?