21
Nyasaye otamore winjo kwayo mar Zedekia
1 Wach nobiro ne Jeremia koa ir Jehova Nyasaye kane Ruoth Zedekia noorone Pashur wuod Malkija kod jadolo Zefania wuod Maseya. Negiwacho:
2 “Koro lamnwa Jehova Nyasaye nikech Nebukadneza ruodh Babulon monjowa. Sa moro Jehova Nyasaye nyalo timonwa honni mana kaka osetimonwa e kinde mosekalo mondo omi oa kuomwa.”
3 To Jeremia nodwokogi niya, “Nyisuru Zedekia,
4 ‘Ma e gima Jehova Nyasaye, Nyasach Israel, wacho: Achiegni loko gige lweny manie lwetugo mondo ogou, magin mago mutiyogo mondo ukedgo gi ruodh Babulon kod jo-Babulon mantiere oko mar ohinga. Kendo anachokgi duto ei dala maduongʼni.
5 An awuon abiro kedo kodi ka iya owangʼ kendo ka an gi mirima mager.
6 Ananeg jogo modak e dala maduongʼni, chwo kaachiel gi le kendo masira malich noneg-gi.
7 Bangʼ mano, Jehova Nyasaye wacho, anachiw Zedekia ruodh Juda, jotende kod joma ni e dala maduongʼni ma notony e masira, ligangla kod kech, ne Nebukadneza ruodh Babulon to gi wasikgi madwaro ngimagi. Enoneg-gi gi ligangla; ok enowenegi kata kechogi kata ngʼwononegi.’
8 “To bende, med nyiso ji ni, ‘Ma e gima Jehova Nyasaye wacho: Ne, aketo e nyimi yor ngima kod yor tho.
9 Ngʼato angʼata modak e dala maduongʼni noneg gi ligangla, kech kod masira. To ngʼatno mowuok kendo otingʼo bade ne jo-Babulon molworou; notony gi ngimane.
10 Aramo mar timo ne dala maduongʼni marach ma ok maber, Jehova Nyasaye owacho. Enochiwe e lwet ruodh Babulon, kendo enotieke gi mach.’
11 “Kuom mano, wachne od joka ruoth mar od Juda ni, ‘Winj wach Jehova Nyasaye;
12 Yaye od Daudi, ma e gima Jehova Nyasaye wacho:
“ ‘Ngʼad bura makare okinyi ka okinyi;
kony ngʼatno ma imayo e lwet joma thire,
ka ok kamano to mirimba noolre oko,
kendo liel ka mach nikech
timbe mamono misetimo nowangʼ,
maonge ngʼama nyalo kweye.
13 Ok adwari, in Jerusalem,
un jogo modak ewi holoni,
e got mar mesa motimo lwanda,
Jehova Nyasaye owacho;
un ma uwacho niya, “En ngʼa manyalo kwedowa?
En ngʼa manyalo donjo kar pondowa?”
14 Anakumu moromo gi timbeu,
Jehova Nyasaye owacho.
Anamok mach e bunge magu manowangʼ
gimoro amora machiegni kodu.’ ”