7
Is Teǥeinep ni Daniel Mehitenged te Heepat he Langgam
1 Duen te nehuna he tuig te kedhadì ni Belshazar ziyà te Babilonia, duen nelewasan ni Daniel ziyà te teǥeinep din. Iyan heini teǥeinep din he insurat din:
2 Sengekezukileman, nelewasan ku is meluag he zaǥat he egkeremaǥen te mevandes he keramag he nekedseselekawà is ebpuunan din.
3 Ne midlepew zutun te wahig is heepat he menge langgam he nekedseselekawà is dagwey zan.
4 Is nehuna he langgam, ne henduen be te erimaung, piru zuen din pakpak he pakpak te kulaǥu. Ne zutun te kedtengteng ku, midtamped is pakpak din. Ne impehitindeg sikandin iring te etew ne mibeǥayan te isip he iring te isip te etew.
5 Is ikezuwa he langgam ne henduen be te bir. Midhitindeg heini pinaaǥi te huziyanan he menge paa zin, ne ebangà heini te tetelu he ǥusuk he nekepetug-elang diyà te menge ngipen din, ne zuen lalag he edhenduen te, “Hala! Purung ka pekahantey te usa.”
6 Ne neehè ku is iketelu he langgam he henduen be te liyupardu. Duen heepat he pakpak din diyà te peka zin he iring te pakpak te tagbis wey heepat is ulu zin. Ne mibeǥayan sikandin te keǥehem te kedumala.
7 Dutun daan he kezukileman, nelewasan ku is ikeepat he langgam. Mekahandekhandek heini he ed-ahaan wey utew mezesen. Duen dezekelà is menge ngipen din he putew. Egkeǥaten din wey egkeenen din is egkekeizan din, ne emun duen din samà edrunteken din heini. Nekeviza sikandin duen te tetelu he menge langgam, wey zuen sepulù he sungey zin.
8 Ne zutun te kedtengtengi ku zuen te menge sungey, neehè ku he zuen neketik-ew meketuvù he zeisek he sungey ne nerupù din sikan is tetelu he menge sungey. Heini he sungey, duen din mata he henduen be te mata te etew wey zuen din bèbà he ebpegalbu.
9 Ne neehè ku he zuen impemelastar he menge pinuuwà te edhadì, ne is Megbevayà he uuyag puun pa te nehuna, mibpinuu ziyà te kandin he pinuuwà te kedhadì. Ebpengenamag is bisti zin wey vulvul zin te keputi. Edriyubriyub is pinuuwè din he zuen din menge ligid.
10 Puun diyà te etuvangan din duen hapuy he edtudà. Edliblibuwen is kahabet te menge velinsuǥuen he ebpenilbi kandin. Andam en sikandin he edhukum, umbe, mibekar en is menge libru he ebpesikazan din te kedhukum din.
11 Edsigudu ad edtengteng hein ebpehambug sikan is sungey taman te neehè ku he midhimetayan sikan is ikeepat he langgam. Ne intimbag haazà diyà te hapuy ne netutung is lawa zin.
12 Ne sikan is nesamà he tetelu he langgam midhawì diyà te kandan is keǥehem dan piru intuǥut kandan is kegkeuyag-uyag seled te mevavà he timpu.
13 Ne zutun neehè ku zaan is henduen be te etew he neliǥuyan te ǥapun. Mid-uvey sikandin diyà te Megbevayà he uuyag puun pa te nehuna.
14 Mibeǥayan sikandin te zengeg wey keǥehem te kedhadì, ne ebpenilbi kandin is langun he menge etew ziyà te nekedseselekawà he menge nasyun, menge kepuun, wey menge kineǥiyan. Ne ebpedayun is kedhadì din te wazà pidtemanan ne wazà ebpekezezaat kayi.
Is Kehuluǥan te menge Teǥeinep
15 Ne nesemukan a he ed-isip-isip dutun te neehè ku.
16 Umbe, mid-uvey a ziyà te sevaha te ebpemenhitindeg dutun ne mid-insaan ku ke hengkey is kehuluǥan duen te neehè ku.
17 Ne ke sikandin te, “Sikan is heepat he langgam iyan kehuluǥan dan is heepat he hadì he edhadì kayi te kelibutan.
18 Piru iyan ebeǥayan te utew Lavew he Megbevayà te keǥehem te kedhadì he ebpedayun te wazà pidtemanan, is menge etew he midhimu zin he waǥas.”
19 Ne mid-insaan ku pa sikandin ke hengkey is kehuluǥan duen te ikeepat he langgam he nekeviza zuen te tetelu he langgam. Mekahandekhandek haazà he ed-ahaan, wey putew is menge ngipen din ne brunsi is menge sulu zin. Ne egkeǥaten din wey egkeenen din is egkekeizan din, ne emun duen din pa egkesamà ne edrunteken din.
20 Ne mid-insaan ku zaan sikandin ke hengkey is kehuluǥan duen te sepulù he sungey zuen te ikeepat he langgam wey sikan is sevaha he sungey he midlepew he nekerupù duen te tetelu he sungey. Heini he sungey, zuen din menge mata wey vèbà ne ebpegalbu. Ne emun ed-ahaan ta, ne edhuna haazà he mekeǥeǥehem duen te zuma he menge sungey.
21 Neehè ku heini he sungey he mibpekidtebek te menge ǥaked te Megbevayà, ne nekezaag sikandin.
22 Ne nekeuma sikan is uuyag puun pa te puunà, he iyan kes Utew Lavew he Megbevayà, ne midhukum sikandin pebur te menge etew he ǥaked din. Ne neuma is timpu te kedhadì te menge ǥaked te Megbevayà.
23 Ne iyan heini inseysey zin kayi te kedì: Is ikeepat he langgam, iyan is ikeepat he ginhedian kayi te kelibutan he nekeviza te zuma he menge ginhedian. Edsurungen din wey edèdeetan din is menge etew kayi te tivuuk he kelibutan.
24 Is sepulù he sungey, iyan is sepulù he hadì he edhadì dutun te ikeepet he ginhedian. Ne ebpekeilis kandan is sevaha he hadì he nekeviza kandan, ne egkezaag din sikan is tetelu he hadì.
25 Ebpengaǥi sikandin te menge lalag he idsupak din te Utew Lavew he Megbevayà, ne ebpurungan din edlisliseza is menge etew he ǥaked te Megbevayà. Ebpeninguhà sikandin he mahalin is menge pista zan wey Kesuǥuan dan. Ne idtuǥut kandin he mesakup din is menge etew he ǥaked te Megbevayà seled te tetelu he tuig wey tengà.
26 Piru emun egketapus en haazà, edhukuman sikandin, ne id-awa diyà te kandin is gehem din, ne wazè en kurang te kedèdeeti kandin.
27 Ne zutun ibeǥey ziyà te menge etew he ǥaked te Utew Lavew he Megbevayà is kedumala wey keǥehem diyà te menge ginhedian kayi te tivuuk he kelibutan. Ne edhadì sikandan te wazà pidtemanan, is langun he menge ginhedian ebpenilbi wey ebpezumazuma kandin.
28 “Iyan heeyan teǥeinep ku. Ingkeherati ku heini ne mibmemeluntak a te kegkulbai ku. Iyan, wazà ku heini tudtula ziyà te minsan hentei.”