14
Petizaan te menge Pengulu te Israel he Ed-azap te zuma he menge Ed-ezapen
1 Duen timpu he midhengkayi te kediey is menge pengulu te Israel, ne mibpinuu zan diyà te etuvangan ku su ebpeseysey zan te menge lalag he ebpuun te Nengazen.
2 Migkaǥi is Nengazen kayi te kedì te,
3 “Sikew is etew, heini he menge etew, utew zan mibmahal is menge ed-ezapen dan he kenà tutuu he megbevayà he iyan edsinumag kandan wey zan mekesalà, umbe kena a ebpeinsà kandan.
4 Guntaan, keǥiyi nu sikandan he siak, is Nengazen he MEGBEVAYÀ, migkaǥi a he is minsan hentei he Israilihanen he utew zin mibmahal is menge ed-ezapen din he iyan midsinumag kandin wey mekesalà, emun ebpenginginsà sikandin diyà te ebpeneuven ku mehitenged te menge lalag ku, ne siak is Nengazen, iyan a mismu edtavak kandin pinaaǥi te silut sumalà te kahabet te menge ed-ezapen din.
5 Ebeelan ku heini su wey medlikù kayi te kediey is langun he menge Israilihanen he nekepekeziyù kayi te kediey tenged te menge ed-ezapen dan.
6 “Umbe ǥuntaan, keǥiyi nu is menge Israilihanen he siak, is Nengazen he MEGBEVAYÀ, migkaǥi a te: Helina niw is isip niw ne iselikwey niw is menge ed-ezapen niw wey engkezi niw is langun he utew mezaat he menge vaal.
7 Is minsan hentei he Israilihanen etawa kenà Israilihanen he meǥinged te Israel, he ed-awà kayi te kedì su iyan din utew ebmahala is menge ed-ezapen din he iyan midsinumag kandin wey mekeselà, emun ebpenginginsà sikandin diyà te ebpeneuven ku mehitenged te menge lalag ku, ne siak, is Nengazen, iyan a mismu edtavak kandin pinaaǥi te silut.
8 Kenè ku ibeǥey is tuyù din ne edhimuwen ku sikandin he petizaan te menge etew, ne egkehimu sikandin he hilisgutan. Edsegseǥen ku sikandin puun te menge etew ku. Ne zutun egketuenan niw he iyan a Nengazen.
9 “Emun egkelimbungan is sevaha he ebpeneuven dutun te kedtagnè din, ne tenged heeyan te iyan a is Nengazen midlimbung kandin. Edsilutan ku sikandin ne edsegseǥen ku puun te menge etew ku he Israilihanen.
10 Pudu ku edsiluti is ebpeneuven wey is ebpenginginsà diyà te kandin mehitenged te menge lalag.
11 Ebeelan ku heini su wey kenà med-awà kayi te kedì is menge Israilihanen, ne kenè dan en edremerikan is keugelingen dan pinaaǥi te kebaal te salà. Egkehimu sikandan he menge etew ku, ne egkehimu a he Megbevayè dan. Iyan a, is Nengazen he MEGBEVAYÀ, is migkaǥi kayi.”
12 Migkaǥi is Nengazen kayi te kedì te,
13 “Sikew is etew, emun ebpekesalà kayi te kediey is menge etew ziyà te sevaha he nasyun pinaaǥi te kedluivi zan kediey, edsilutan ku sikandan, ne id-awè ku is ebpuunan te keenen dan. Ebpeeǥiyan ku sikandan te vitil su wey zan mebpematey duma te menge uyaǥen dan.
14 Minsan pa ke ziyà te kandan si Noe, si Daniel, wey si Job, ne iyan dà heini is tetelu egkelibri tenged te ketazeng dan. Iyan a, is Nengazen he MEGBEVAYÀ, is migkaǥi kayi.
15 “Ne emun edsuǥuen ku is dumezaas he menge langgam keniyan he nasyun su wey zan penhimetayi is menge meǥinged duen, ne egkehimu he mekevulungbulung heeyan he lugar ne wazè en ebayà duen tenged te kegkahandek dan te zumezaas he menge langgam.
16 Minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri. Ne haazà is nasyun egkehimu he mekevulungbulung.
17 “Ne emun daan tebek is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,
18 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri.
19 “Ne emun daru is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,
20 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà egkelibri zan is kandan he keugelingen tenged te ketazeng dan.
21 “Benar iyan, siak, is Nengazen he MEGBEVAYÀ migkaǥi he mekehizuhizu is menge tig-Jerusalem emun ebpeeǥiyan ku sikandan te heepat he meveǥat he menge silut he iyan is: tebek, bitil, dumezaas he menge langgam, wey menge zaru he edhimatey te menge meǥinged kayi wey te menge uyaǥen dan.
22 Piru zuen kandan egkesamà he uuyag, ne edumahan sikandan kayi te Babilonia ne idtampu keniyu su menge vihag daan sikandan. Egkeehè niw ke sengemenu kezaat is betasan dan wey menge ulaula zan ne egkaawà is kegkeseeng niw tenged te kedsilut ku ziyà te Jerusalem.
23 Uya, egkaawà is kegkeseeng niw emun egkeehè niw is betasan dan wey menge ulaula zan, ne egkesavut niw he zuen hinungdan te kedsilut ku ziyà te Jerusalem. Iyan a, is Nengazen he MEGBEVAYÀ, is migkaǥi kayi.”