15
Is Jerusalem Neiring te menge Subpang te Paras he Wazà Pulus
1 Migkaǥi is Nengazen kayi te kedì te,
2 “Sikew is etew, hengkey he paaǥi is igkehimu te subpang te paras he lavew te minsan hengkey he subpang te kayu?
3 Egkehimu ve he ebeelan is subpang kayi he minsan hengkey he ǥelemiten? Egkehimu ve heini he ebeelan he selenggatà?
4 Kenà heini egkehimu! Egkehimu zà heini he idtavun, piru minsan pa ke igketavun heini meǥaan dà heini ed-ugmas.
5 Ne emun wazà kayi pulus dutun te wazè pa heini metutung ne lavew en he wazè din pulus emun egketutung en!
6 “Guntaan, siak, is Nengazen he MEGBEVAYÀ, egkaǥi a he is menge meǥinged diyà te Jerusalem, neiring te paras he midtuvù duma te menge kayu ziyà te ketelunan. Ne geina te pudu zan wazà pulus ne pudu ku ebinsuli.
7 Uya, edsilutan ku sikandan, minsan egkepeleǥuyan dan is hapuy, egkeepur ǥihapun sikandan te ikezuwa he hapuy. Ne zutun egketuenan dan he iyan a Nengazen.
8 Edhimuwen ku he mekevulungbulung he lugar is nasyun dan su midluivan e zan. Iyan a, is Nengazen he MEGBEVAYÀ, is migkaǥi kayi.”