16
Is Jerusalem Neiring te Bahi he Mengungumpadi
1 Migkaǥi is Nengazen kayi te kedì te,
2 “Sikew is etew, petueni nu te Jerusalem is utew mezaat he menge vaal zin.
3 Keǥiyi nu sikandin he siak, is Nengazen he MEGBEVAYÀ, migkaǥi a ziyà te kandin te, ‘Sevaha ka he Canaanhen! Amorihanen is amey nu, ne Hitihanen is iney nu.
4 Ne hein in-anak ka wazà mid-elima kenikew. Wazà midtamped te pused nu, wazà midiǥù kenikew, etawa midhaplas kenikew te timus, wazà midek-en kenikew.
5 Wazà mibpesarig he ebaal kayi he menge vaal ziyà te kenikew; wazà nehizu kenikew. Intimbag ke zà hinuun diyà te vevesukà, ne ingkesilag ka puun pa te ked-enaka kenikew.
6 “ ‘Ne zutun te kedsaǥad ku, neehè ku sikew is midtunà te keugelingen nu he lengesa, ne migkeǥiyan ku sikew te egkeuyag ka.
7 Impezekelè ku sikew iring te pinemula ziyà te vevesukà. Midekelè ka he nehimu he mekempet he raǥa. Nepurma is menge susu nu wey mibmelayat is bulvul nu, piru lelevas ka ǥihapun.
8 “ ‘Ne hein mid-uman a medsaǥad, neehè ku he egkehimu ke en he ed-esewaan. Ne midtembunan ku sikew is lelevas te samput ku ne nenangdù a he ebmahalen ku sikew. Midhimu ku is kebpekid-uyun kenikew, ne naangken ku sikew. Iyan a, is Nengazen he MEGBEVAYÀ, migkaǥi kayi.
9 “ ‘Ne midlùluan ku is menge lengesa ziyà te lawa nu, wey midlenahan ku sikew.
10 Ne mibistiyan ku sikew te mahalen he visti he linu wey sida he binurdahan, ne impesesendalyas ku sikew te panit.
11 Mideyzeyanan ku sikew te menge elahas: menge rintì wey menge velieg.
12 Mideyzeyanan ku zaan te sising is izung nu, ne mid-eritisan ku sikew wey migkurunahan.
13 Impemekempet ku sikew pinaaǥi te pelata wey vulawan. Is bisti nu linu wey sida he binurdahan, ne meupiya he kelasi te herina is ebeelan he keenen nu, teneb, wey lana he ulibu. Utew ka mezagwey, ne henduen ka te rayna.
14 Nevantug ka ziyà te menge nasyun tenged te utew nu kekempet he imbeǥey ku kenikew. Iyan a, is Nengazen he MEGBEVAYÀ, is migkaǥi kayi.
15 “ ‘Piru midsarig ka te kempet nu, ne migamit nu he puhunan is bentuǥan nu zutun ke kebpelelevag nu. Imbeǥey nu is keugelingen nu ziyà te minsan hentei he maama he edsaǥad, ne mibpurungan ke zan pemulpulusi.
16 Migamit nu is duma he menge visti nu te kebpekekempeta te menge simbahan diyà te metikang he menge lugar, he zutun ka mebpelelevag. Kenà pezem heeyan ereg he egkehitavù.
17 Migamit nu zaan is menge pelata wey menge vulawan he menge elahas he imbeǥey ku kenikew te kebaal te menge ed-ezapen he maama ne mid-azap nu heini. Iring heini te nengumpadi ka!
18 Mibistiyan nu heini he menge ed-ezapen te menge visti nu he binurdahan, ne impemuhat nu ziyà te kandan is lana ku wey veyewà.
19 Mibpemuhat nu zaan sikandan te keenen he imbeǥey ku kenikew he ebpuun te meupiya he kelasi te herina, teneb, wey lana te ulibu. Impemuhat nu heini he pemuhat he mehemut. Uya, iyan heeyan nehitavù. Iyan a, is Nengazen he MEGBEVAYÀ, is migkaǥi kayi.
20 “ ‘Migkuwa nu zaan is menge anak nu he menge maama wey menge vahi he menge anak ta, ne impemuhat nu su wey mekaan te zuma he menge ed-ezapen. Kenè pe be ereg is kebpelelevag nu?
21 Mibpenhimetayan nu pa is menge anak ku ne impemuhat nu ziyà te menge ed-ezapen.
22 Dutun te kebaal nu te utew mezaat he menge vaal wey kebpelelevag nu wazè nu en tentenuzi ke mibmenumenu ku sikew te ed-elima hein betan-en ke pa, hein lelevas ka wey midtunè ka te keugelingen nu he lengesa.
23 “ ‘Iyan a, is Nengazen he MEGBEVAYÀ, migkaǥi te mekehizuhizu ka utew! Gawas te langun he mezaat he vaal nu,
24 mibpehitindeg ke pa te menge simbahan para te menge ed-ezapen nu ziyà te menge pelasa
25 wey ziyà te kada suyuk te menge zalan. Ne zutun midremerikan nu is kekempet nu, ne imbeǥey nu is keugelingen nu ziyà te minsan hentei he maama he edsaǥad. Kada andew ed-iseg is kebpelelevag nu.
26 Mibpelelevag ke pa ziyà te menge Ehiptohanen he siringan nu he utew zaan lebag. Utew ku ingkepauk is kenè nu ked-engked te kebpelelevag.
27 Umbe, midsilutan ku sikew wey impemeliǥet ku is tanè nu. Mibpeveyveyaan ku sikew te menge kuntada nu he menge Filistihanen, ne minsan sikandan, henduen be te neinuinu kenikew te mahawag he vetasan nu.
28 “ ‘Mibpelelevag ke zaan diyà te menge tig-Asiria su wazè ke pa meperahi. Ne hein nepasad haazà wazè ke pa iyan meperahi.
29 Mid-umanan nu pa is kebpelelevag nu su nekidrerepungen ka ziyà te Babilonia he lugar te menge nigusyanti, piru wazè ka ǥihapun meperahi.
30 “ ‘Siak, is Nengazen he MEGBEVAYÀ, migkaǥi a te utew ka meluya umbe nehimu nu heini he menge vaal. Iring ka te vahi he wazè din keelezan he ebelegyà te zengeg din.
31 Mibpehitindeg ka te menge simbahan diyà te menge suyuk te menge zalan wey menge pelasa he para te menge ed-ezapen nu. Tuwas pa he mezaat is baal nu te vaal te vahi he ebelegyà te zengeg dan su wazè ka mulà mebpevayad te nekidhilavet kenikew.
32 Mengungumpadi ka he vahi! Egkesuat ke pa he ebpekidhilavet te sengememaama kenà te esawa nu.
33 Is menge vahi he ebelegyà te zengeg dan ebpevayad mulà. Piru sikew, iyan ka hinuun mibeǥey te menge gasa ziyà te menge maama he kumpadi nu su wey sikandan mehinggat te ked-uvey ziyan te kenikew te kebpekidhilavet.
34 Nekeviza ka te zuma he menge vahi he ebelegyà te zengeg dan. Wazà edhinggat kenikew te kebpekidhilavet; iyan ka mismu ebpenginggat. Kenè ka edawat te vayad, su iyan ka hinuun ebayad.
35 “ ‘Umbe sikew is lebag, pemineǥa nu is menge lalag ku.
36 Siak, is Nengazen he MEGBEVAYÀ, migkaǥi a te: Impeehè nu is kegkelevasi nu ne mibpeveyveyaan nu is lawa nu te menge kumpadi nu su ǥeina te lebag ka. Mid-azap nu is utew mezaat he menge ed-ezapen nu, ne mibpenhimetayan nu is menge anak nu su impemuhat nu ziyà te kandan.
37 Tenged kayi te mibeelan nu, edtiǥumen ku is langun he menge kumpadi nu he igkelilingey nu, is mibmahal nu wey ragkes en is egkeepesan nu. Edtiǥumen ku sikandan su wey ke zan kuntedaha, ne edlevasan ku sikew ziyà te etuvangan dan su wey ke zan maahà is lelevas.
38 Edsilutan ku sikew tenged te kebpenapew nu wey kebpenhimatey nu. Ne tenged te utew ku kegkepauk edhimetayan ku sikew.
39 Ibeǥey ku sikew ziyà te menge kumpadi nu, ne edrundusen dan is menge simbahan he para te menge ed-ezapen nu. Edlevasan ke zan ne egkuwaan dan is mekempet he menge elahas nu, ne ed-ewaan ke zan he lelevas.
40 Ibpesurung ke zan te grupu te menge etew he iyan ebpenuleng kenikew te vatu wey edtadtad kenikew te ispada.
41 Ebinsulan dan is menge valey nu ne edsilutan ke zan diyà te etuvangan te mezakel he menge vahi. Ebpeengkezan ku kenikew is kebpelelevag nu wey is kebayad nu ziyà te menge kumpadi nu.
42 Ne egkevehew en is utew ku kegkepeuki kenikew, ne kenà ad egkepauk kenikew.
43 “ ‘Midlipatan nu ke mibmenumenu ku sikew te ed-atur hein betan-en ke pa, ne midhimu nu hinuun he mepauk a tenged te menge mibeelan nu, umbe iyan a, is Nengazen he MEGBEVAYÀ egkaǥi he edsilutan ku sikew te sungkad te menge vaal nu. Kenè be mibaal ka te utew mezaat he menge vaal he in-uman nu te mahawag ha menge vaal nu?
44 “ ‘Duen menge etew he egkaǥi kayi he erubasa ziyà te kenikew: “Ke hengkey is iney iyan daan kes anak.”
45 Iring ka iyan te iney nu he edsudì te esawa zin wey menge anak din. Wey iring ke zaan te menge suled nu he vahi he edsudì te menge esawa zan wey menge anak dan. Hitihanen is iney nu ne Amorihanen is amey nu.
46 Is kakey nu he vahi iyan is Samaria he ziyà ed-ubpà te zizaya duma te menge anak din he vahi. Is hazi nu he vahi iyan is Sodom, he ziyà ed-ubpà te zivavà duma te menge anak din he vahi.
47 Mid-iringan nu is menge vetasan dan wey is utew mezaat he menge vaal zan. Ne seled te mevavè dà he timpu midlavew is kenikew he kezaat te kandan he kezaat.
48 Siak, is uuyag he Nengazen he MEGBEVAYÀ, migkaǥi a te tutuu he is suled nu he Sodom wey is menge anak din he vahi, wazà mekevaal te iring te mibeelan nu wey te menge anak nu he vahi.
49 Is salà te suled nu he Sodom iyan is kebpelavew. Dekelà is keenen din wey is menge anak din he vahi wey meupiya is ked-ubpè din, piru wazè din tevangi is menge pubri.
50 Mepelevawen sikandan wey mibaal zan te utew mezaat he menge vaal kayi te etuvangan ku, umbe midezeetan ku sikandan hein neehè ku is mibeelan dan.
51 “ ‘Is Samaria wazà mekevaal te minsan ketengè dà te kenikew he neveelan he menge salà. Edhuna he mahabet is kenikew he mezaat he menge vaal, kenè te kandan, umbe zuen pa kandan he iketazeng kenè ka, tenged te langun he utew mezaat he menge mibeelan nu.
52 Ereg ka he egkeeled tenged te impeehè nu pinaaǥi te menge salè nu he edhuna ka he mezaat kenà te menge suled nu he vahi. Dewata nu is keelezan su iyan ke en mibpaahà he metazeng pa sikandan kenikew.
53 Piru egkeuma is timpu he ibpeuman ku ibpeuswag is Sodom wey is Samaria, ragkes is menge anak dan he menge vahi. Ne ibpeuman ku zaan sikew ibpeuswag,
54 ne ereg he igkeeled nu is langun he menge vaal nu su tenged te ked-uswag kayi te menge suled nu ebpekelepew he henduen be te edhuna pa heini is menge suled nu he meupiya kenè sikew
55 he iyan is Sodom wey Samaria. Heini sikandan ed-uman ed-uswag wey is menge anak dan he vahi ne iyan daan heini egkehitavù kenikew wey te menge anak nu he vahi.
56 Midsudì nu zengan is Sodom dutun te timpu te kegkemepelevawen nu
57 wey hein wazè pa mezayag is kezaat nu. Piru ǥuntaan iring ke en kandin su midsudì ka zaan te menge meǥinged diyà te Edom wey ziyà te nekeelingkus kayi he menge lugar, wey te menge meǥinged diyà te Filistia wey ziyà te menge lugar he nekeelingkus kenikew.
58 Egkaantus nu is silut tenged te mahawag wey utew mezaat he menge vaal nu. Iyan a, is Nengazen, is migkaǥi kayi.’ ”
59 Migkaǥi pa is Nengazen he MEGBEVAYÀ te, “Edsilutan ku sikew te ereg kenikew, su mibpekahagkap nu is pesarig ku pinaaǥi te kedsupaka nu te paaǥi ku te kebpekid-uyun.
60 Piru edtumanen ku is kebpekid-uyun ku kenikew hein betan-en ke pa, ne edhimu a te kebpekid-uyun ku kenikew he ebpedayun te wazà pidtemanan.
61 Ne egketenuzan nu ke hengkey is betasan nu zengan ne egkeeled ka, lavew en ke edhimuwen ku he menge anak nu is menge suled nu he vahi, he iyan is Samaria wey Sodom, minsan kenà heini ragkes te paaǥi ku te kebpekid-uyun kenikew.
62 Edlig-enan ku is kebpekid-uyun ku kenikew, ne egketuenan nu he iyan a Nengazen.
63 Egketenuzan nu is menge salè nu ne egkeeled ka, ne kenè ke en ebpekekaǥi tenged te utew nu kegkeeled emun ebpeseyluwen ku en sikew tenged te langun he mibeelan nu. Iyan a, is Nengazen he MEGBEVAYÀ, is migkaǥi kayi.”