3
1 Ne migkaǥi haazà is laǥeng kayi te kediey te, “Sikew is etew, keena nu heini is linulun he velesahan, ne ǥenat ka, ne keǥiyi nu is menge etew te Israel.”
2 Umbe, miginganga a, ne impekaan din kedì haazà is linulun he velesahan.
3 Migkeǥiyan e zin te, “Sigi, keena nu heeyan taman te egkahantey ka.” Ne hein migkaan ku haazà, ne iring heini keemis te teneb.
4 Ne migkeǥiyan e zin te, “Sikew is etew, genat kad pehendiyà te menge etew te Israel ne keǥiya nu is menge lalag ku ziyà te kandan.
5 Wazè ku sikew suǥua ziyà te menge etew he selakew is kineǥiyan dan wey mereǥen he edsevuten, kekenà, diyà te menge etew te Israel.
6 Su emun diyè ku sikew edsuǥua te menge etew he selakew is kandan he kineǥiyan he kenè nu egkesavut, ne kenà duwazuwa he ebpemineǥen ke zan.
7 Piru is menge etew te Israel, kenè dan ebpemineg kenikew, su kenè dan egkesuat he ebpemineg kedì. Pudu sikandan midtaman he mesinupaken wey kenà ebpezumazuma.
8 Piru edhimuwen ku he mezesen is kenikew he ǥehinawa iring kandan,
9 iring kezesen te lintikan he vatu. Umbe kenè nu sikandan ikahandek su netuenan nu man he menge mesinupaken sikandan.”
10 Mid-uman pa sikandin megkaǥi kayi te kedì te, “Sikew is etew, purung ka pemineg wey hemeni nu ziyà te ǥehinawa nu is langun he egkeǥiyen ku ziyan te kenikew.
11 Guntaan, hendiyè ka te menge emurè nu te inged he zuma nu te menge mibihag, ne keǥiya nu is lalag he ebpuun kayi te kedì, kes Nengazen he MEGBEVAYÀ. Beeli nu heini mebpemineg man sikandan etawa kenà.”
12 Ne imbayew a te Mulin-ulin, ne nezineg ku is edraǥeb he laǥeng he ebpuun diyà te egkeiniyuǥan ku he edhenduen te, “Ereg he edeliǥen is gehem te Nengazen he ziyà te langit!”
13 Ne nezineg ku zaan is daǥing te ebpekebevag-id he menge pakpak duen te uuyag he menge linimbag, wey nezineg ku zaan is edselenuhug he keǥurub duen te menge ligid diyà te avey zan.
14 Imbayew a te Mulin-ulin ne mid-uwit e zin pehendiyà te meziyù. Neǥezam ku kayi te ǥehinawa ku is kegkesekiti wey kegkeepes, piru mibeyveyaan a te Nengazen.
15 Nekeuma a ziyà te Tel Abib, he ziyà te kilid te Wahig he Kebar he zutun ed-ubpà is menge vihag. Ne ziyà a te kandan seled te pitu he andew ne utew mibmezaat is gehinawa ku tenged te nengeehè ku.
Midhimu te Megbevayà si Ezekiel he iyan Ebantey te Israel
(Ezekiel 33:1-9)
16 Kedlavey te pitu he andew, migkaǥi is Nengazen kayi te kedì te,
17 “Sikew is etew, midhimu ku sikew he perevantey te menge etew te Israel. Umbe emun duen egkezineg nu he petizaan he ebpuun kayi te kedì ne segugunè nu keǥiya ziyà te kandan.
18 Emun egkaǥi a ziyà te sevaha he etew he lalung he ebpatey sikandin, piru wazè nu sikandin petizeeni he engkezi zin is mezaat he vaal zin su wey kenè mebpatey, ne ebpatey haazà is lalung he etew tenged te salè din, ne edsukutan ku sikew tenged te kemetayen din.
19 Iyan, emun mibpetizeenan nu sikandin piru wazà gihapun med-engked te mezaat he vaal zin, ebpatey sikandin tenged te salè din, piru wazè nu televaken kayi te kediey.
20 Emun ed-engked he edtinazeng is metazeng he etew su ebaal te salà, ne emun ebey-anan ku en sikandin, ebpatey sikandin. Emun wazè nu sikandin petizeeni, ebpatey sikandin tenged te salè din, ne kenè ku en edtentenuzan is meupiya he menge vaal zin. Piru edsukutan ku sikew tenged te kemetayen din.
21 Iyan, emun mibpetizeenan nu sikandin he kenà mebaal te salà, ne mibpezumazuma kenikew, ne kenà sikandin ebpatey ne wazè nu televaken kayi te kedì.”
22 Kayi te kediey is gehem te Nengazen ne migkeǥiyan e zin te, “Genat ka, hendiyè ka te suǥud su zutun duen egkeǥiyen ku kenikew.”
23 Umbe, midhendiyà a te suǥud, ne neehè ku is kebpenganlag te Nengazen iring te neehè ku ziyà te veyvey te Wahig he Kebar, ne midluhud a.
24 Ne midumala a te Mulin-ulin ne impehitindeg e zin ne migkaǥi te, “Ulì ka ne lelekeb ka ziyà te valey nu!
25 Ne zutun ebekusen ka te pisì su para kenè ka mekepekiduma te menge zuma nu he meǥinged.
26 Ed-emawen ku sikew su wey nu kenà mepetizeeni heini is mesinupaken he menge etew.
27 Piru zutun te timpu he ebpekidlalag a kenikew, ne ebpekekaǥi ke en. Ne keǥiya nu kandan is menge lalag he migkaǥi te Nengazen he MEGBEVAYÀ. Ne ebpemineg is duma kandan ne is duma, kenà, su mesinupaken sikandan he menge etew.”