4
Impaahà ni Ezekiel Ke Nemenumenu is Kedsurunga te Jerusalem
1 Migkeǥiyan a te Nengazen te, “Guntaan, sikew is etew, kuwa ka te brik, ne isavuk nu ziyà te etuvangan nu, ne druwinga nu zuen is inged he Jerusalem.
2 Ne himuwa nu heini he henduen be te edliǥuyan te menge kuntada. Ne sevuki nu heini te para te kedsurung: menge turi-turi, pemenehikà dutun te verengbeng, idtambù he menge tanà su para mepemenehiki is berengbeng, menge kayu he ibpenbengkag dutun te verengbeng. Ne pelinguti nu heini te menge kampu.
3 Ne kuwa ka te meluag he putew ne iyan heini iverengbeng nu ziyà te mid-elangan niw zuen te inged. Ne ed-etuvang ka zutun te inged is uvag edsurung kayi. Egkehimu heini he petizaan te menge etew te Israel he edsurungen sikandan te menge kuntada zan.
4 “Kegkepasad nu kayi, hizeǥè ka he edtengkilid dapit te givang nu. Simbulu heini he edtiangen nu is salà te menge etew te Israel. Tianga nu is salè dan seled te kahabet te menge andew te kedhizeǥè nu.
5 Is senga andew ebpesavut te senge-tuig. Umbe seled te 390 he andew is kedtianga nu te menge salè dan.
6 Ne kegkepasad dutun, tengkilid ka zapit te kewanan nu ne tianga nu zaan is salà te menge etew te Juda seled te 40 he andew; is senga andew ebpesavut gihapun te senge-tuig.
7 Ne umani nu sineruwi is Jerusalem ne tegnaa nu is mezaat he egkehitavù te Israel he wazà tambun te bekelawan nu.
8 Ebekusen ku sikew para kenè ka mekevelvelikid taman te egkepasad nu te ebpaahà is kedsurunga zuen te inged.
9 “Guntaan kuwa ka te trigu, barli, lisu he menge utanen, belatung, tikap, wey ispilta, ne ipedsesahug nu heini is langun diyà te sevaha he teleǥuey ne veeli nu he supas. Ne iyan heini keena nu seled te 390 he andew he edhizeǥè ka he edtengkilid dapit te ǥivang nu.
10 240 zà he gramu he supas is keena nu kada andew te egketendek he menge uras.
11 Ne tengè dà te litru he wahig is inuma nu kada andew te egketendek he menge uras.
12 Lutua nu is supas kada andew zutun te edtengteng is menge etew. Lutua nu heini iring te kedhilutù te supas he barli. Iyan nu itavun is egkeǥangu he tai te etew, ne keena nu is supas.
13 Su iring daan kayi is egkehitavù diyà te menge etew te Israel, egkaan sikandan diyà te menge lugar te ebpekevihag kandan te menge keenen he mid-isip he meremerik.”
14 Ne migkaǥi a te, “He Nengazen he MEGBEVAYÀ, netuenan nu he wazè ku remeriki is keugelingen ku puun te vatè e pa taman en guntaan. Wazà a keenu mekekaan te uyaǥen he minatey etawa midhimetayan te sengelelanggam. Wazè e zaan keenu mekekaan te langgam he mid-isip he meremerik.”
15 Midtavak is Nengazen te, “Emun iyan heeyan tai zà te vaka is itavun nu he ilis te tai te etew.”
16-17 Migkaǥi pa is Nengazen te, “Sikew is etew, egkeǥiyen ku kenikew he edhimuwen ku he zeisey zà is egkekaan diyà te Jerusalem. Edtekesen dà te menge meǥinged diyà te Jerusalem is keenen dan wey wahig he egkeinum dan tenged te egkaamuy-amuy zà heini. Egkaan sikandan wey ed-inum duma is kegkeliveg tenged te egkeamuy-amuy is egkekaan dan wey ed-inumen dan. Ebpetengtengtengè dan he egkengeheratan, ne egkenaneynaney sikandan ebpematey tenged te salè dan.”