5
Is Ebpekeuma he Kezeetan te Jerusalem
1 Migkeǥiyan a te Nengazen te, “Sikew is etew, kuwa ka te meǥarang he ispada ne ǥemita nu heini he kiskis te ulu nu wey sumpè nu. Ne timbanga nu is bulvul nu wey sumpè nu ne vehina nu te tetelu he vahin.
2 Isavuk nu is egkehuna he vahin diyà te brik he midruwingan te Jerusalem, ne vinsuli nu heini ziyà te teliwazà te inged, emun egkepasad nu en te ebpaahà is kedliǥuyi zuen te inged. Isavuk nu is senge vahin diyà te peliǥuy te inged, ne penempeza nu heini zuen te ispada nu. Is bahin he egkesamà ne isimburè nu, su ibpeyapat ku is menge etew ku pinaaǥi te ispada.
3 Ne samè ka te zeisey he vulvul ne tengesa nu te visti nu.
4 Terini nu heini te egkepipira he vuuk ne vinsuli nu. Ne ebpuun kayi edelandap is hapuy ne egkevinsulan is tivuuk he Israel.
5 “Iyan a, is Nengazen he MEGBEVAYÀ, migkaǥi te iyan heeyan egkeulaula ziyà te Jerusalem, kes inged he midhimu ku he utew impurtanti he lugar kayi te kelibutan.
6 Piru midrapas din is menge suǥù ku, ne midsubra pa is kandin he kelelalung te kelelalung te zuma he menge nasyun diyà te peliǥuy zin. Inselikwey zin is menge suǥù ku wey menge sulunuzen.
7 Umbe siak, is Nengazen he MEGBEVAYÀ, migkaǥi te: Sikiyu is menge tig-Jerusalem, edhuna pa is keniyu he kelelalung te kelelalung te menge etew ziyà te menge nasyun he nekeliǥuy keniyu. Wazè niw zaan tumana is menge suǥù ku wey menge sulunuzen.
8 Umbe siak, is Nengazen he MEGBEVAYÀ, iyan a ebpekigkuntada keniyu. Edsilutan ku sikiyu te silut he egkaahà te menge etew ziyà te menge nasyun.
9 Tenged te utew mezaat he menge vaal niw, ebeelan ku keniyu is wazè ku pa keenu meveeli ne kenè ku en ed-umanan te ebaal.
10 Egkeenen te menge ǥinikanan is menge anak dan, ne egkeenen te menge anak is menge ǥinikanan dan. Edsilutan ku iyan sikiyu, ne is egkesamà keniyu ibpeyapat ku kayi te tivuuk he kelibutan.
11 Iyan a, kes uuyag he Nengazen he MEGBEVAYÀ, ebpenangdù a he edezeetan ku sikiyu duma is kenà kegkehizu su midremerikan niw is baley ku pinaaǥi te ked-azap niw te zuma he menge ed-ezapen wey kebaal niw te utew mezaat he menge vaal.
12 Ebehinen ku sikiyu te tetelu he vahin. Is egkehuna he vahin ebpematey keniyan te inged pinaaǥi te vitil wey menge zaru. Is ikezuwa he vahin ebpematey pinaaǥi te ispada ziyà te ǥawas keniyan te inged. Ne is iketelu he vahin ibpeyapat ku kayi te tivuuk he kelibutan ne ibpelaus ku is kedlisliseza ku kandan.
13 “Pinaaǥi keniyan igkevuswang ku is pauk ku kandan, ne igkepeǥezaman ku is rerangit ku para mevehew is utew ku kegkepauk.
14 Ebengkaǥen ku is inged niw ne ebpeel-elezan ku sikiyu ziyà te menge nasyun he nekeelingkus keniyu wey te menge sumeseǥàzà kayi te inged niw.
15 Ed-un-undahan kew, edsudien kew, wey igkelimezangi kew te menge etew ziyà te menge nasyun he nekeelingkus keniyu. Egkehimu kew he petizaan para kandan dutun te timpu te kedsiluti ku keniyu tenged te utew ku kegkepauk. Iyan a, is Nengazen, is migkaǥi kayi.
16 Ebpeeǥiyan ku sikiyu te vitil he iring te panà he edezaat keniyu. Ed-iseg-iseg is kepait dutun he vitil taman te wazè niw en egkekaan.
17 Gawas te vitil edsuǥuen ku zaan diyà te keniyu is dumezaas he menge langgam ne ebpenhimetayan dan is menge anak niw. Ebpematey kew zaan pinaaǥi te menge zaru wey tebek. Iyan a, is Nengazen, is migkaǥi kayi.”