34
Is menge Perevantey te Israel
1 Migkaǥi is Nengazen kayi te kedì te,
2 “Sikew is etew, kaǥi ka te ebpekesuǥat te menge perevantey te Israel. Keǥiyi nu sikandan he iyan a, is Nengazen he MEGBEVAYÀ migkaǥi te: Mekehizuhizu kew is menge perevantey te Israel. Keugelingen niw zà is ed-eturen niw! Kenè be is menge perevantey kinahanglan he ed-eturen din is menge kerehidu?
3 Ed-inumen niw is gatas dan, ebeelan niw he visti is bulvul zan, ne edlapaan niw is utew melambù kandan, piru wazè niw sikandan etura.
4 Wazè niw elimahi para mebmezesen is menge meluya kandan. Wazè niw tembari is menge nezeruwan, wazè niw vukusi is palì dan. Wazè niw pen-ahaa is menge netazintazin wey netazin. Kekenà, mibpurung niw sikandan ruuǥa.
5 Ne ǥeina te wazà ebantey kandan, nekepeyapat sikandan ne mibpendawi te zumezaas he menge langgam.
6 Netazintazin is menge kerehidu ku ziyà te menge vuntud wey menge vuvungan. Nekepeyapat sikandan kayi te tivuuk he kelibutan, ne wazè en iyan nen-ahà kandan.
7 “Umbe, sikiyu is menge perevantey, pemineǥa niw is egkeǥiyen ku.
8 Iyan a, Nengazen he MEGBEVAYÀ he uuyag, ebpenangdù a he edsilutan ku sikiyu su wazè niw elimahi is menge kerehidu ku, umbe midsurung wey mibpendawi sikandan te zumezaas he menge langgam. Wazè niw sikandan pen-ahaa, kekenà, iyan niw zà ed-eturen is keugelingen niw.
9 Umbe, sikiyu is menge perevantey, pemineǥa niw is egkeǥiyen ku.
10 Iyan a, is Nengazen he MEGBEVAYÀ, migkaǥi he kuntada ku sikiyu, wey edsukutan ku sikiyu tenged te nehitavù te menge kerehidu ku. Kenè ku en sikiyu ibpaatur te menge kerehidu, su iyan niw zà ed-eturen is keniyu he keugelingen. Edlibriyen ku is menge kerehidu ku ziyà te keniyu, ne kenè niw en sikandan egkekaan.
11 “Iyan a, is Nengazen he MEGBEVAYÀ, migkaǥi he iyan a mismu ebpen-ahà te menge kerehidu ku wey ed-atur kandan.
12 Iring te ebpen-ahaan te pereelima is menge kerehidu zin he ebpekedsusuwey, ebpen-ahaan ku zaan is menge kerehidu ku. Edlibriyen ku sikandan puun te langun he menge lugar he zutun sikandan mekedsusuwey hein timpu te kesamuk.
13 Egkuwaan ku sikandan puun te nekedseselekawà he menge nasyun, ne ed-uwiten ku ziyà te keugelingen dan he tanà. Ibpepenabtab ku sikandan diyà te menge vuvungan te Israel, diyà te kilid te menge wahig, wey ziyà te langun he lugar he ed-ubpaan te menge etew.
14 Uya, ibpepenabtab ku sikandan te meilem he penebtavà diyà te menge vuvungan te Israel. Dutun edleku sikandan is ebpenabtab.
15 Iyan a mismu, is Nengazen he MEGBEVAYÀ ed-atur te menge kerehidu ku, ne ibpehimeley ku sikandan.
16 Ebpen-ahaan ku sikan is nengetazin wey nengetazintazin. Ebukusan ku is menge pelien wey edlig-enan ku is memeluya. Piru edèdeetan ku is memelambù wey memeupiya is kedlelawa. Ebeelan ku ziyà te kandan ke hengkey is hustu he kukuman.
17 “Sikiyu is menge etew te Israel he menge kerehidu ku, iyan a, is Nengazen he MEGBEVAYÀ, migkaǥi ziyà te keniyu he edhukuman ku sikiyu. Ibpedtepizè ku is meupiya wey mezaat, is menge kerehidu wey menge kambing.
18 Is duma keniyu kenè pa kuntintu te kebpenabtab diyà te meupiya he penebtavà; edtekutakan niw pa is duma he menge penebtavà. Is duma kenè pa kuntintu te ked-inum diyà te metingew he wahig; edleveǥen dan pa is duma he wahig.
19 Ebpengamuy-amuy ve ebpenabtab is menge kerehidu ku ziyà te midtekutakatan he penebtavà? Ed-inum be sikandan te midleveg niw he wahig?
20 “Umbe siak, is Nengazen he MEGBEVAYÀ, migkaǥi a ziyà te keniyu he iyan a mismu ebpedsivey te melambù wey meǥasà he menge kerehidu.
21 Su sikiyu is menge melambù, eduǥehungen niw zà wey edsungayen is meluya he menge kerehidu taman te ebpekepekeziyù sikandan.
22 Edlibriyen ku is menge kerehidu ku ne kenè en sikandan egkeumanan egkeebusari. Ibpedsivey ku is menge meupiya wey menge mezaat.
23 Ebeǥayan ku sikandan te sevaha he tig-elima he kevuwazan te suluǥuen ku he si David. Iyan sikandin ed-atur wey egkehimu he ed-elima.
24 Ne siak, is Nengazen, egkehimu a he Megbevayè dan, ne sikan is kevuwazan te suluǥuen ku he si David egkehimu he pengulu zan. Iyan a, is Nengazen, is migkaǥi kayi.
25 “Ebaal a te kebpekid-uyun kandan he ebpekeveǥey te meupiya te ked-ubpè dan. Egsegseǥen ku is dumezaas he menge langgam puun te tanè dan su wey mekeubpà sikandan diyà te sibsivayan ne ebpekelipezeng dan diyà te ketelunan he wazà ebpekekaid kandan.
26 Edtuvazan ku sikandan wey is menge lugar peliǥuy te segradu he vuntud ku. Edtuvazan ku sikandan pinaaǥi te kebpeuzani ku kandan dutun te hustu he timpu.
27 Ebpemeǥas is menge kayu zan wey is duma pa he menge pinemula zan. Ne ebpengungubpaan sikandan he wazà ebpekekaid kandan. Egketuenan dan he iyan a Nengazen emun edlibriyen ku en sikandan puun te ǥehem te mid-uripen kandan.
28 Kenè en sikandan edsurungen wey ed-eǥawan te menge azen te menge etew ziyà te zuma he menge nasyun he iring te zumezaas he menge langgam. Ebpengungubpaan sikandan he wazà ebpekekaid kandan wey wazè dan igkahandek.
29 Ebeǥayan ku sikandan te tanà he egkevantug te kegkeselebpeten din su wey zan kenè en bitila wey sudia te menge etew ziyà te zuma he menge nasyun.
30 Ne egketuenan dan he iyan a, is Nengazen he Megbevayè dan mibpekiduma kandan, ne sikandan is menge etew te Israel, menge etew ku. Iyan a, is Nengazen he MEGBEVAYÀ, is migkaǥi kayi.
31 “Iyan kew menge kerehidu ku ziyà te pepenebtavè ku. Iyan kew menge etew ku, ne iyan a Megbevayè niw. Iyan a, is Nengazen he MEGBEVAYÀ, is migkaǥi kayi.”