35
Is Lalag he Ebpekesuǥat te Edom
1 Migkaǥi is Nengazen kayi te kedì te,
2 “Sikew is etew, sinaru ka ziyà te Buntud he Seir, ne kaǥi ka te ebpekesuǥat te menge meǥinged keniyan.
3 Keǥiyi nu sikandan, he iyan a, is Nengazen he MEGBEVAYÀ migkaǥi te kuntada ku sikiyu is menge meǥinged diyà te Buntud he Seir. Edsilutan ku sikiyu ne egkehimu he mekevulungbulung is lugar niw.
4 Ebengkaǥen ku is menge inged niw ne egkehimu heini he mekevulungbulung. Ne zutun egketuenan niw he iyan a Nengazen.
5 Neuǥet en is kedumuti niw te menge tig-Israel, ne midsurung niw sikandan dutun te timpu te kelised dan, su timpu haazà te kedsiluti kandan tenged te menge salè dan.
6 Umbe siak, is Nengazen he MEGBEVAYÀ he uuyag, ebpenangdù a he ibpepenhimetayan ku sikiyu minsan hendei kew ebpevayà. Uya, edel-asen kew te ebpenhimatey, su wazè niw isipa he mezaat is kedhimatey.
7 Edhimuwen ku he mekevulungbulung is Buntud he Seir, ne ebpenhimetayan ku is langun he sumeseǥazà dutun.
8-9 Is ebpematey keniyu te tebek ebpekepeyapat diyà te menge vuntud, diyà te menge vuvungan, diyà te menge suǥud, wey ziyà te kilid te menge wahig. Edhimuwen ku is lugar niw he mekevulungbulung taman te taman. Wazè en ed-ubpà diyà te menge inged niw. Ne zutun egketuenan niw he iyan a Nengazen.
10 “Migkaǥi kew he egkaangken niw is Juda wey Israel, ne ed-engkenen niw heini minsan siak, is Nengazen, ebpekiduma kandan.
11 Umbe siak, is Nengazen he MEGBEVAYÀ he uuyag, nenangdù a he ebelesan ku sikiyu tenged te pauk niw, kesina niw, wey rerangit niw he impeehè niw te menge etew ku. Ne egketuenan dan he iyan a Nengazen dutun te kedsiluti ku en keniyu.
12 Ne pinaaǥi zaan keniyan ekgetuenan niw he iyan a Nengazen, ne nezineg ku is langun he kedsudia niw te menge vuvungan te Israel. Su ke sikiyu te, ‘Nezeetan heini ne neveǥayan kiw te meupiya he timpu te ked-aǥew kayi.’
13 Mibpahambug kew zaan wey minsan hengkey zà is ebpengeǥiyen niw he ebpekesuǥat kediey, ne nezineg ku heini.
14 “Umbe siak, is Nengazen he MEGBEVAYÀ, migkaǥi a he emun edhimuwen ku en he mekevulungbulung is lugar niw egkelipey is menge etew kayi te tivuuk he kelibutan,
15 su geina te ingkelipey niw hein nehimu he mekevulungbulung is tanà he mibpepengevilin te menge Israilihanen. Umbe iyan daan heeyan egkehitavù keniyu; egkehimu he mekevulungbulung is Buntud he Seir wey is tivuuk he Edom. Ne zutun egketuenan niw he iyan a Nengazen.”