37
Is Suǥud he zuen duen Mahabet he menge Tulan
1 Ne midumala a te Nengazen ne mid-uwit a te Mulin-ulin din diyà te teliwazà te suǥud he zuen duen mahabet he menge tulan te etew.
2 Inriǥuriǥu a te Nengazen dutun, ne neehè ku is utew mahabet he menge tulan he nekepeyapat dutun te suǥud ne nepurung en heini meǥangu.
3 Mid-insà is Nengazen kayi te kedì te, “Sikew is etew, egkeuyag pe be heini is menge tulan?” Midtavak a te, “He Nengazen he MEGBEVAYÀ, iyan ke zà netau keniyan.”
4 Mid-uman sikandin megkaǥi kayi te kedì te, “Keǥiyi nu heeyan is memaza he menge tulan he mebpemineg dan te egkeǥiyen ku.
5 Su siak, is Nengazen he MEGBEVAYÀ, egkeǥiyan ku sikandan te, ‘Ebeǥayan ku sikiyu te ǥehinawa ne egkeuyag kew.
6 Ebeǥayan ku sikiyu te menge uǥat wey menge sapù, ne edtengesen ku sikiyu te lundis. Ebeǥayan ku sikiyu te ǥehinawa ne egkeuyag kew. Ne egketuenan niw he iyan a Nengazen.’ ”
7 Umbe, midtuman ku haazà is inmandù kedì. Ne hein migkaǥi ad, nekezineg a te leletekà, ne nekedsusuur sikan is menge tulan.
8 Ne zutun te kedtengteng ku zuen en kayi menge uǥat wey menge sapù, ne netenges en heini te lundis, piru wazè pa sikandan megeǥehinawa.
9 Migkaǥi is Nengazen kayi te kedì te, “Sikew is etew, keǥiyi nu is keramag he siak, is Nengazen he MEGBEVAYÀ, migkaǥi a te, ‘He keramag, pengeramag kew puun diyà te heepat he ebpuunan, ne hiyupi niw heeyan is menge minatey su wey meuyag sikandan.’ ”
10 Ne midtuman ku haazà is inmandù din kedì, ne nengeuyag haazà is menge minatey. Ne nemenhitindeg sikandan he iring kahabet te sengebetalyun he menge sundaru.
11 Migkaǥi en maan is Nengazen kayi te kedì te, “Sikew is etew, heeyan is menge tulan iyan ibpaalung din is tivuuk he menge etew te Israel. Migkaǥi sikandan te, ‘Neǥangu en is menge tulan dey, ne kenè key en ebpekeperateng, henduen be te minatey key en.’
12 Umbe keǥiyi nu sikandan he siak, is Nengazen he MEGBEVAYÀ, migkaǥi a te, ‘He menge etew ku, ed-ebriyan ku is menge leveng niw ne ebenhawen ku sikiyu, ne idlikù ku ziyà te tanà he Israel.
13 Ne egketuenan niw te menge etew ku, he iyan a Nengazen emun ed-ebriyan ku en is menge leveng niw wey ebenhawen ku sikiyu.
14 Ibeǥey ku keniyu is Mulin-ulin ku ne egkeuyag kew, ne ibpeubpè ku sikiyu ziyà te keugelingen niw he tanà. Ne egketuenan niw he iyan a is Nengazen midtuman te migkaǥi ku. Iyan a, is Nengazen, is migkaǥi kayi.’ ”
Is Kedsevahaa te Juda wey Israel
15 Migkaǥi is Nengazen kayi te kedì te,
16 “Sikew is etew, kuwa ka te tinevì ne surati nu heini te, ‘Is ginhedian te Juda.’ Ne uman ke pa kuwa te sevaha pa he tinevì ne surati nu heini te, ‘Ginhedian te Israel.’
17 Ne ipedsumpul nu haazà is dezuwa he tinevì wey mehimu he sevaha zà diyà te velad nu.
18 Emun ed-insaan ka te zuma nu he menge meǥinged ke hengkey is ibpesavut dutun.
19 Ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Ibpedsumpul ku is tinevì he ebpaalung te Israel wey is tinevì he ebpaalung te Juda, ne egkehimu heini he sevaha zà diyà te velad ku.’
20 “Ne ǥewezi nu haazà is tinevì he midsuratan nu su wey maahà te menge etew,
21 ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Egkuwaan ku is menge Israilihanen puun te langun he menge nasyun he zutun sikandan mekepeyapat, ne ed-umanan ku sikandan ed-uwita ziyà te keugelingen dan he tanà.
22 Ne edhimuwen ku zà sikandan he sevaha he nasyun diyà te tanà he Israel. Sevaha zà he hadì is edhadì kandan, ne kenè dan en egkeuman egkevahin diyà te zezuwa he nasyun etawa dezuwa he ginhedian.
23 Kenè dan en ed-umanan edremeriki is keugelingen dan pinaaǥi te ked-azap te mezaat he menge ed-ezapen dan, wey kebaal te minsan hengkey he salà, su edlibriyen ku sikandan te langun he menge salè dan, ne edlumpiyuwan ku sikandan. Egkehimu sikandan he menge etew ku ne egkehimu a he Megbevayè dan.
24 Edhedian sikandan te kevuwazan te suluǥuen ku he si David, ne sevaha zà is ed-elima kandan. Ebpurungan dan edsunuza is menge suǥù ku wey menge sulunuzen.
25 Ed-ubpè dan diyà te tanà he imbeǥey ku te suluǥuen ku he si Jacob, he iyan kes tanà he mid-ubpaan te menge kepuun dan. Dutun dan wey is menge kevuwazan dan ebpekeubpà taman te taman, ne edhedian sikandan te kevuwazan te suluǥuen ku he si David te wazà pidtemanan.
26 Ne ebpekid-uyun a kandan he ebpekeubpà sikandan he meupiya is kebpekesavuk, ne heini he uyun ebpedayun te taman te taman. Ibpeubpè ku sikandan diyà te tanè dan, ne ibpemahabet ku sikandan, ne ebengunen ku ziyà te kandan is baley ku te wazà pidtemanan.
27 Ed-ubpà a he zuma zan. Egkehimu a he Megbevayè dan, ne egkehimu sikandan he menge etew ku.
28 Ne emun kenè en egkaawà haazà is baley ku te wazà pidtemanan, egketuenan te menge etew ziyà te menge nasyun he iyan a, is Nengazen, mibpilì te menge Israilihanen su wey mehimu he kediey.’ ”