38
Is Lalag he Ebpekesuǥat ki Gog
1 Migkaǥi is Nengazen kayi te kedì te,
2 “Sikew is etew, kaǥi ka te ebpekesuǥat diyà te ki Gog he tig-Magog he pengulu te Meshec wey Tubal.
3 Keǥiyi nu sikandin he siak, is Nengazen he MEGBEVAYÀ, migkaǥi a te: He Gog, he pengulu te Meshec wey Tubal, egkuntedahan ku sikew.
4 Egkew-itan ku te vunuwit is bakè nu, ne eguyuzen ku sikew zuma te langun he menge sundaru nu. Ed-endamen ku para te tebek is menge kudè nu, wey egkeǥumeenan he pereuntud te kudà, wey is mahabet he menge sundaru he zuen dan dezekelà wey dezeisey he menge kelasag wey is langun he egkeǥumeenan te ispada.
5 Eduma ziyà te kandan is menge sundaru ziyà te Persia, Cush, wey Put, he zuen dan menge kelasag wey menge hilmit,
6 ragkes is diyà te Gomer wey Bet Togarma he ziyà te zizaya wey is langun he menge sundaru zan. Ebpemuun diyà te mahabet he menge nasyun is eduma kenikew.
7 “Layun nu endama is keugelingen nu wey is langun he menge sundaru nu ne penguluwi nu sikandan.
8 Dutun te ebpekeuma he menge andew ebmenduan ku sikiyu te kedsurung te Israel, he nekeenew en puun te kegkezeeti zuen he midtiǥum is menge meǥinged duen diyà te menge vuvungan te Israel he nehimu he mekevulungbulung seled te neuǥet he timpu. Nekelikù en is menge meǥinged kayi puun te menge nasyun ne melinawen en is ked-ubpè dan.
9 Sikew wey is menge sundaru nu, wey is menge zuma nu he ebpuun diyà te menge nasyun, edsurung kew ziyà te Israel he henduen be te vagyu, ne edliǥuyan niw heini he iring kew te ǥapun he edtambun kayi.”
10 Mibpedayun megkaǥi is Nengazen he MEGBEVAYÀ te, “Dutun he timpu ebpelanu ka te mezaat.
11 Egkaǥi ka te: Edsurung a ziyà te Israel he is menge inged duen wazà berengbenga, wazè dan pultahan, wey wazè dan trangka, he is menge meǥinged duen ed-ubpà he melinawen wey wazà igkahandek he kezeetan.
12 Ed-eǥawen ku is menge azen kayi te menge inged he nehimu zengan he mekevulungbulung, piru ǥuntaan neeneb en te menge etew he nemenlikù puun te zuma he menge nasyun. Mahabet is menge uyaǥen dan wey menge azen, ne migkilala zan is nasyun dan he iyan utew impurtanti he nasyun kayi te kelibutan.
13 “Egkaǥi ziyà te kenikew is menge etew ziyà te Sheba wey Dedan, wey is menge nigusyanti ziyà te menge inged diyà te Tarshish te, ‘Midtiǥum nu en be is menge sundaru nu su para ed-eǥawen en is menge pelata, menge vulawan, menge uyaǥen wey menge azen te menge Israilihanen?’ ”
14 “Umbe, sikew is etew, keǥiyi nu si Gog he siak, is Nengazen he MEGBEVAYÀ, migkaǥi a te, ‘Emun ebpengungubpaan en he melinawen is menge etew ku he Israilihanen, ne egketuenan nu heini.
15 Ne puun diyà te meziyù he lugar nu ziyà te zizaya, edsurungen nu sikandan, duma te mahabet wey mekeǥeǥehem he menge sundaru nu he ebpemen-untud te kudà.
16 Edsurungen nu is menge etew ku he Israilihanen he henduen kew te ǥapun he ebpeketambun te tanà. Uya, ibpesurung ku kenikew Gog, is nasyun ku te huziyan he timpu. Ne pinaaǥi te ebpeveelan ku kenikew, igkepeehè ku ziyà te menge nasyun is kegkewaǥas ku. Ne egketuenan dan he iyan a Nengazen.’ ”
17 Mibpedayun megkaǥi is Nengazen he MEGBEVAYÀ te, “Te nehuna he timpu impahayag ku pinaaǥi te ebpemeneuven diyà te Israel he menge suluǥuen ku, he ziyà te huziyan he menge andew duen edsurung diyà te Israel. Ne iyan ka ibpesavut ku he edsurung.
18 Piru zutun te timpu te kedsurung nu, Gog, is Israel, egkeregreg is pauk ku.
19 Tenged te utew ku kegkepauk, ibpenangdù ku he zutun he timpu edlinug te mezesen diyà te tanà he Israel.
20 Ne zutun is langun he menge etew wey is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig ebpengerkeren te kegkahandek diyà te etuvangan ku. Egkengetempag is menge vuvungan wey menge kelendiǥan, wey egkengevengkag is menge verengbeng.
21 Ibpehimetayan ku sikew, Gog, diyà te menge vuntud ku, ne ebpehimhimetayà is menge sundaru nu. Iyan a, is Nengazen he MEGBEVAYÀ, is migkaǥi kayi.
22 Edsilutan ku sikew wey is menge sundaru nu, wey is menge zuma nu he ebpemuun diyà te zuma he menge nasyun. Edsilutan ku sikiyu pinaaǥi te zaru wey ebpeun-unayè kew ebpehimhimetayà. Ibpetanè ku is mereǥes he uzan, wey ibpeuzan ku te ǥiyew he henduen be te menge vatu, wey egkeregreg he esupri.
23 Pinaaǥi kayi is kebpaahaa ku ziyà te langun he menge nasyun te kegkemekeǥeǥehem ku wey kegkewaǥas. Ne egketuenan dan he iyan a Nengazen.”