39
Is Kegkezeeti ni Gog wey te menge Sundaru Zin
1 Migkaǥi is Nengazen kayi te kedì te, “Sikew is etew, kaǥi ka te ebpekesuǥat diyà te ki Gog. Keǥiyi nu sikandin he siak, is Nengazen he MEGBEVAYÀ, migkaǥi a te, ‘Kuntada ku sikew, Gog, is pengulu te Meshec wey Tubal.
2 Eguyuzen ku sikew puun te meziyù diyà te zizaya pehendiyà te menge vuvungan te Israel.
3 Ne ed-eǥawan ku sikew te ǥumaan,
4 ne egkezeetan ka ziyà te menge vuvungan te Israel ragkes is langun he menge sundaru nu wey is ebpemuun te menge nasyun he nekidsevaha kenikew. Ibpekaan ku sikiyu is ebpematey te nekedseselekawà he kelasi te zumezaas he menge tagbis, wey te mesipala he menge langgam.
5 Egkezeetan kew ziyà te menge vevesukà su iyan a, is Nengazen he MEGBEVAYÀ migkaǥi kayi.
6 Ebinsulan ku is Magog wey is duma zin he menge nasyun he uvey te zaǥat he is menge meǥinged duen nengungubpaan he melinawen. Ne egketuenan dan he iyan a Nengazen.
7 Ibpetuenan ku te menge etew ku he Israilihanen he waǥas is ngazan ku, ne kenè ku en idtuǥut he pendezeisaya pa heini. Ne egketuenan diyà te menge nasyun he iyan a Nengazen, is waǥas he Megbevayà te Israel.
8 Egkeuma heeyan he timpu ne egkehitavù is migkaǥi ku. Iyan a, is Nengazen he MEGBEVAYÀ, is migkaǥi kayi.
9 “ ‘Dutun he timpu, edtiǥumen te menge etew te Israel he ebpemen-ubpà diyà te zekelà he menge inged is menge himan niw te kebpekidtebek, is dezekelà wey zezeisey he menge kelasag, is menge panà, is menge lagkut he para te tebek, wey is menge vangkew, ne egemiten dan heini he tavun seled te pitu he tuig.
10 Kenè en kinahanglan he ebpengayu pa sikandan diyà te vevesukà wey ketelunan, su egkeǥamit dan en man he tavun is menge ǥumaan te kebpekidtebek. Umbe ed-eǥawan dan daan is menge nengaǥew kandan. Iyan a, is Nengazen he MEGBEVAYÀ, is migkaǥi kayi.
11 “ ‘Dutun he timpu idleveng ku ziyà te Israel si Gog wey is mahabet he menge etew zin; idleveng ku ziyà te Suǥud te Ebiyahi, diyà te edsilaan he uvey te Daǥat he Minatey. Ne kenè en haazà igkevayà su ebpekaalang haazà is dekelà he penlevengà te ebiyahi. Ne egngezanan en heini te Hamon Gog, he ke và dà egkegiya kes, “Suǥud-suǥud te Mahabet he menge Etew ni Gog.”
12 “ ‘Pitu he vulan is kedlevenga kandan te menge Israilihanen te kedlumpiyu zutun te tanà.
13 Is langun he menge meǥinged ed-uǥup te kedleveng. Ne heini he timpu kenà egkelipatan te menge Israilihanen, su pinaaǥi keniyan egkeveǥayan a te zengeg. Iyan a, is Nengazen he MEGBEVAYÀ, is migkaǥi kayi.
14 Emun egketapus en is pitu he vulan, duen menge etew he edsuǥuen te kedriǥuriǥu zutun te nasyun su wey zan mesusi ke zuen pe be minatey he wazà ikeleveng. Ne ibpeleveng dan heini su wey melumpiyuwi haazà is tanà.
15 Emun duen egkaahà te menge etew he tulan te etew, edsevukan dan heini te tuus su wey metueni zuen te menge etew he midsuǥù, ne igkeleveng dan heini ziyà te “Suǥud-suǥud te Mahabet he menge Etew ni Gog.”
16 (Duen daan dutun inged he egkengezanan keuzemà te “Mahabet he menge Etew.”) Pinaaǥi keniyan egkelumpiyuwan dan haazà is tanà.’ ”
17-18 Mibpedayun megkaǥi is Nengazen he MEGBEVAYÀ kayi te kediey te, “Sikew is etew, keǥiyi nu is langun he kelasi te menge tagbis wey zumezaas he menge langgam diyà te peliǥuy he medtiǥum dan diyà te menge vuvungan te Israel, su wey zan mekekaan te zekelà he ǥastu te pemuhat he in-andam ku kandan. Dutun egkaan sikandan te sapù wey ed-inum te lengesa te menge sundaru wey menge pengulu, he henduen dà te menge kerehidu, menge vaka, wey menge kambing he impelambù he ebpuun diyà te Bashan.
19-20 Kayi he ǥastu te ed-endamen ku para kandan, egkepezaharan sikandan te keenen wey inumen taman te egkengehantey wey egkengelangut sikandan. Ebpetakè dan egkaan te menge kudà, menge pereuntud te kudà, wey menge sundaru. Iyan a, is Nengazen he MEGBEVAYÀ, is migkaǥi kayi.
21 “Emun edsilutan ku en is menge etew ziyà te menge nasyun, ne egkeehè dan ke sengemenu is kegkemekeǥeǥehem ku.
22 Puun dutun he timpu, egketuenan te menge etew te Israel he iyan a is Nengazen Megbevayè dan,
23 egketuenan daan diyà te zuma he menge nasyun he mibihag is menge etew te Israel tenged te menge salè dan, su wazè dan mebpezumazuma kedì. Mibpesegdan ku sikandan he surunga wey penhimetayi te menge kuntada zan.
24 Mibeelan ku zà diyà te kandan is ereg he vales te mibeelan dan he meremerik wey mezaat.”
25 Mibpedayun pa megkaǥi is Nengazen he MEGBEVAYÀ te, “Piru ekgehizuwan ku en is menge Israilihanen, he menge kevuwazan ni Jacob, ne ibpeuman ku sikandan ibpeuswag, su wey meveǥayi te zengeg is waǥas he ngazan ku.
26 Egkelipatan dan en is keelezan dan wey kedluivi zan kedì, emun ebpengungubpaan en sikandan he melinawen wey wazà egkehendekan.
27 Ibpeehè ku ziyà te menge nasyun is kegkewaǥas ku pinaaǥi te kedhewia ku kandan puun diyà te menge nasyun te menge kuntada zan.
28 Ne egketuenan dan he iyan a Nengazen he Megbevayè dan. Su minsan impevihag ku sikandan pehendiyà te menge nasyun, piru ed-umanan ku sikandan edtiǥuma ziyà te keugelingen dan he tanà ne wazà minsan sevaha he egkesamà.
29 Kenè ku en sikandan ebpesegdanen su edsuǥuen ku ziyà te kandan is Mulin-ulin ku. Iyan a, is Nengazen he MEGBEVAYÀ, is migkaǥi kayi.”