8
Is Ked-ezapa te zuma he menge Ed-ezapen diyà te Jerusalem
1 Hein ikelima he andew te ikeenem he vulan, dutun te ikeenem he tuig te kegkevihag dey, midumala a te Nengazen he MEGBEVAYÀ. Dutun ebpimpinuu a ziyà te valey ku he ebpekidlalag kedì is menge edumala te Juda.
2 Duen neehè ku he henduen be te etew. Puun te hawak din pehendiyà te zizalem ne henduen sikandin te hapuy, ne puun te hawak din pehendiyà te zivavew ne iring sikandin te ed-ilak-ilak he mital.
3 Ingkawè din is henduen be te velad din ne migewezan e zin diyà te vulvul. Mibitbit a te Mulin-ulin diyà te hewhewanan ne mid-uwit e zin diyà te Jerusalem, diyà te zizaya he pultahan dutun te seled te lama duen te valey te Nengazen he zutun is ledawan te sevaha he ed-ezapen he utew ingkepauk te Megbevayà.
4 Ne neehè ku zutun is mekeǥeǥehem he kebpenganlag te Megbevayà te Israel, he iring te neehè ku ziyà te suǥud.
5 Ne migkaǥi is Megbevayà kayi te kedì te, “Sikew is etew, tengteng ka ziyà te zapit te zizaya.” Umbe midtengteng a, ne neehè ku ziyà te avey te idselang pehendiyà te pemuhatà is ledawan te ed-ezapen he utew ingkepauk te Megbevayà.
6 Ne migkaǥi is Megbevayà kayi te kediey te, “Sikew is etew, neehè nu ve is mibeelan te menge etew te Israel? Neehè nu ve is utew mezaat he mibeelan dan para te kedsegseg kedì puun te valey ku? Piru zuen nu pa egkaahà he menge vaal he edhuna pa he utew mezaat keniyan.”
7 Ne mid-uwit e zin diyà te idselang te lama zuen te valey te Nengazen, ne kedtengteng ku, neehè ku is budsi te verengbeng.
8 Migkeǥiyan e zin te, “Sikew is etew, pekeluaǥa nu heeyan is budsi te verengbeng.” Ne mibeelan ku haazà, ne neehè ku is sevaha he idselang.
9 Ne migkaǥi en maan sikandin te, “Seled ka ne ahaa nu is utew mezaat he vaal he mibeelan dan.”
10 Umbe, midseled a ne neehè ku he sikan is berengbeng ne nezengkuuran te nekedseselekawà he menge ledawan te menge langgam he edula wey zuma pa he menge langgam he mid-isip he meremerik. Neehè ku zaan is langun he ed-ezapen te menge etew te Israel.
11 Ne ziyà te egkesineruwan kayi edhithitindeg is 70 he menge edumala te Israel, ne is sevaha kandan iyan si Jaazania he anak ni Shafan. Is kada sevaha kandan egawed te teleǥuey te veyewà, ne edlipuwak is mekepal he evel te veyewà.
12 Ne migkaǥi is Megbevayà kayi te kedì te, “Sikew is etew, neehè nu en be ke hengkey is ebeelan he meeles te menge edumala te Israel? Diyà is kada sevaha kandan te ruǥu te ed-ezapen din, su ke sikandan te, ‘Kenè kiw egkaahà te Nengazen; inselikwey zin en is Israel.’ ”
13 Migkaǥi en maan is Megbevayà te, “Ebpekeehè ke pa te edhuna pa keniyan he utew mezaat.”
14 Ne midume e zin diyà te zizaya he ǥemawan te valey te Nengazen, ne zutun neehè ku is menge vahi he ebpemimpinuu ne edsineǥawan dan is ed-ezapen dan he si Tamuz.
15 Migkaǥi is Megbevayà kayi te kedì te, “Sikew is etew, neehè nu ve heeyan? Ebpekeehè ke pa te lavew pa utew he mezaat keniyan he menge vaal.”
16 Ne mid-uwit e zin diyà te seled he lama duen te valey te Nengazen. Ne ziyà te ǥemawan te valey te Nengazen he ziyà te pid-elangan te varkun wey pemuhatà, duen 25 he menge etew. Ed-iniyug sikandan duen te valey te Nengazen he edsinaru ziyà te edsilaan su ed-ezapen dan is edsilà he andew.
17 Ne migkaǥi is Megbevayà kayi te kedì te, “Sikew is etew, neehè nu ve heeyan? Kunaan bes te menge etew te Juda ke kenà mezaat is kebaal keniyan te utew mezaat he menge vaal? Ne mibeǥayan dan pa te kesamuk is nasyun. Pinaaǥi kayi midhimu zan he utew a mepauk. Ahaa nu is kebpesipelahi zan kediey!
18 Umbe, ibpeǥezaman ku kandan is pauk ku. Kenè ku sikandan egkehizuwan. Minsan ikulahì dan pa te mezaǥing is kebuyù dan te tavang kayi te kediey, ne kenè ku sikandan ebpemineǥen.”