9
Mibpenhimetayan is Ed-azap te zuma he menge Ed-ezapen
1 Ne nezineg ku is Megbevayà he nemensag te, “Egpas kew zini te Jerusalem, sikiyu is menge etew he edsilut te menge meǥinged kayi te inged, ne uwita niw is menge ǥumaan niw.”
2 Ne zutun duen heenem he etew he midseled diyà te zizaya he ǥemawan te valey te Nengazen ne is kada sevaha kandan duen din uwiten he ǥumaan. Duen etew he zuma zan he mibivisti te linu he midseluniket te teleǥuey te idsurat. Midhitindeg dan diyà te kilid te pemuhatà he brunsi.
3 Puun pa zengan sikan is gapun etawa regreg he tuus te mekeǥeǥehem he kebpekiduma te Megbevayà te menge Israilihanen ne egkaahà diyà te zivavew zuen te ledawan te menge kirubin he ziyà te seled duen te simbahan, piru kayi he timpu mid-awà heini zutun ne midhalin diyà te ǥemawan te valey te Nengazen. Ne mid-umew te Nengazen sikan is etew he mibivisti te linu he seseluniket te teleǥuey te idsurat,
4 ne migkeǥiyan din te, “Liǥuya is Jerusalem ne merkahi nu is buked duen te ingkeseeng dan is utew mezaat he menge vaal he mibeelan diyà te seled te inged.”
5 Ne nezineg ku is Megbevayà he migkeǥiyan din sikan is heenem he menge etew te, “Tunduǥa niw sikandin pehendiyà te inged ne penhimetayi niw is menge etew he wazà marka ziyà te vuked dan. Kenè niw sikandan kehizuwi.
6 Penhimetayi niw is menge meǥurang, menge vetan-en he menge maama wey menge vahi, menge iney, menge vatà, piru kenè niw kevuta is duen dan menge marka. Diyè kew puun te valey ku.” Umbe midhuna zan penhimetayi is menge pengulu he ziyà te egkesineruwan duen te valey te Nengazen.
7 Ne migkaǥi is Megbevayà diyà te kandan te, “Genat kew en. Remeriki niw heeyan is baley ku pinaaǥi te kedsavuk niw te menge minatey ziyà te lama.” Ne migenat dan ne mibpenhimetayan dan is menge etew zuen te tivuuk he inged.
8 Ne zutun te kebpenhimatey zan, netaǥak a is sebsevaha. Midlangkeb a is nengumew te Megbevayà, “He Nengazen he MEGBEVAYÀ, ed-eminen nu ve ebpenhimetayi is nengesamà kayi te Israel tenged te kegkepeuki nu te menge tig-Jerusalem?”
9 Midtavak sikandin kediey te, “Utew en subra is salà te menge etew te Israel wey Juda. Subre en is kebpehimhimetayà ne wazè en hustu he kukuman diyà te inged. Egkaǥi pa sikandan te kenà edtengteng is Nengazen kenitew, su inselikwey zin en is Israel!
10 Umbe kenè ku sikandan egkehizuwan; ebeelan ku ziyà te kandan is mibeelan dan diyà te zuma.”
11 Ne sikan is etew he mibivisti te linu wey midseseluniket te teleǥuey te idsurat, midlikù ne migkeǥiyan din is Nengazen te, “Netuman ku en is insuǥù nu kediey.”