14
1 Ne migkaǥi is Nengazen diyà te ki Moises te,
2 “Keǥiyi nu is menge Israilihanen he medlikù dan, ne ziyè dan megkampu te uvey te Pi Hahirot, diyà te mid-elangan te Migdol wey Zaǥat he Meriǥà. Uvey heini te zaǥat ne egkaatbang din is Baal Zefon.
3 Umbe edhimuwen niw heini su para meisip te hadì he egkengetazintazin kew ne kenè kew en ebpekeǥawas kayi te sibsivayan.
4 Ne edhimuwen ku he mebmezesen is gehinawa te hadì su wey kew zin mezal-as. Piru edèdeetan ku sikandin wey is menge sundaru zin. Ne pinaaǥi kayi egkeveǥayan a te zengeg, ne egketuenan te menge Ehiptohanen he iyan a kes Nengazen.” Umbe, mid-ulaula heini te menge Israilihanen.
5 Ne hein netudtulan sikan is hadì he mibpelaǥuy is menge Israilihanen, nahalin is isip din wey is isip te menge upisyal zin mehitenged te kegenat te menge Israilihanen. Ke sikandan te, “Nesayep kiw su midtuǥutan tew is menge Israilihanen te kegenat ne ǥuntaan kenè en sikandan ebpekepenilbi kenitew.”
6 Umbe, impaandam dutun te hadì is menge kerwahi zin, ne miduma zin is menge sundaru zin.
7 Ne 600 he utew memeupiya he kerwahi is migamit dan, ne ǥawas dutun duen pa zuma he menge kerwahi ziyà te Ehipto he migamit dan ne zuen netendek he menge egalen dutun te menge sundaru ziyà te kada kerwahi.
8 Mibpengelinteuwan te Nengazen he ibpemezesen din is gehinawa te hadì te Ehipto, umbe, midal-as din is menge Israilihanen he migenat he mezeeǥen.
9 Is menge Ehiptohanen he miduma te kedal-as iyan is menge sundaru te hadì duma is menge pereuntud din te kudà wey menge kerwahi. Ne ziyè dan meseuti is menge Israilihanen te kampu zan he kilid te Zaǥat he Meriǥà wey uvey te Pi Hahirot, he atbang te Baal Zefon.
10 Ne hein ebpekeuvey en haazà is hadì wey is menge sundaru zin, midsirap is menge Israilihanen ne neehè dan is menge Ehiptohanen he edal-as kandan. Ne nahandek sikandan ne nekevuyù sikandan te tavang diyà te Nengazen.
11 Ne migkeǥiyan dan si Moises te, “Maan is kayi key pa kenikew zumaha te sibsivayan para mebpatey? Wazè en be penlevengà diyà te Ehipto? Maan is impaawè key pa kenikew ziyà te Ehipto?
12 Minsan pa te migkeǥiyan dey en sikew hein diyè kiw pa te Ehipto te, bey-ani key en kenikew is ebpenilbi te menge Ehiptohanen su meupiya pa is kebpenilbi kandan kenà is kebpatey ziyà te sibsivayan!”
13 Ne midtavak si Moises te, “Kenè kew mahandek. Pekelig-en kew ne egkeehè niw is paaǥi te Nengazen te kedlibriya zin keniyu ǥuntaan he andew. Su heini is menge Ehiptohanen he egkeehè niw ǥuntaan, ne kenè niw en sikandan egkeuman egkaahà.
14 Su iyan is Nengazen ebpekidtebek para keniyu. Ne kenè en kinahanglan he iyan kew ebpekidtebek.”
15 Ne nengemuyù si Moises diyà te Nengazen ne migkeǥiyan sikandin te Nengazen te, “Hustu ke en he edhangyù. Keǥiyi nu is menge Israilihanen he medhipanew zan en.
16 Ivayew nu is tuked nu ziyà te zivavew keniyan te zaǥat su wey meluwisi is egkezalandalan he tanà diyà te zizalem keniyan te zaǥat su para zutun ebayà is menge Israilihanen.
17 Ibpemezesen ku is gehinawa te menge Ehiptohanen su para del-asa kew zan. Piru edèdeetan ku is hadì wey is menge sundaru zin, wey is menge pereuntud din te kudà wey menge kerwahi. Ne pinaaǥi kayi egkevantug a.
18 Ne emun egkezèdeetan ku en sikandan, ne egketuenan te menge Ehiptohanen he iyan a Nengazen.”
19 Ne zutun is belinsuǥuen te Megbevayà he ziyà edhipanew te egkesineruwan te menge Israilihanen, mid-awà, ne ziyà medliling te egkeiniyuǥan dan. Ne sikan is mekepal he ǥapun he iring te tukud, mid-awà daan su midliling daan diyà te egkeiniyuǥan dan,
20 ne mibpetug-elang te menge Ehiptohanen wey te menge Israilihanen. Ne seled te tivuuk he kezukileman nekeveǥey te kerusirem diyà te menge Ehiptohanen haazà is gapun he iring te tukud, iyan, nekeveǥey mulà te kerayag diyà te menge Israilihanen. Ne tenged dutun, tekew en midlavey is kezukileman ne wazà mekeuvey is menge Ehiptohanen diyà te menge Israilihanen.
21 Ne migketeng ni Moises is belad din diyà te zivavew zutun te zaǥat, ne zutun te tivuuk he kezukileman impehiyup te Nengazen haazà is daǥat te mevandes he keramag he ebpuun diyà te edsilaan ne zutun nevahin is daǥat ne neluwisan is nezalandalan he tanà diyà te zizalem dutun te zaǥat.
22 Ne zutun mebayà is menge Israilihanen, te memaza he ibayà, ne ziyà te egkekewanan dan wey egkeǥivang dan is wahig he neiring te elavet.
23 Ne midal-as sikandan te menge Ehiptohanen. Midal-as kandan is langun he menge kudà te hadì he eguyud te kerwahi, wey is duma he menge sundaru zin he ebpemen-untud te kudà.
24 Ne hein meǥaan en egkepawà dutun he kezukileman nememantew is Nengazen puun duen te mekepal he ǥapun wey regreg he iring te tukud, mibpantew zin is menge sundaru he Ehiptohanen ne mibpengelintuwan din he mengeliveg sikandan.
25 Mibpengelinteuwan din he kenà metileng is menge ligid te menge kerwahi zan su para medlised sikandan he ebpepelelaǥuy zutun. Ke sikandan te, “Ebpeleǥuyan tew is menge Israilihanen su iyan is Nengazen ebpekidtebek kenitew para kandan.”
26 Hein nekelayun en is menge Israilihanen, migkaǥi is Nengazen diyà te ki Moises te, “Ketenga nu is belad nu ziyà te zivavew keniyan te zaǥat su wey mekedlikuey heeyan is daǥat su wey mengelened is menge Ehiptohanen, wey mengelened heeyan is menge kerwahi zan wey heeyan is menge pereuntud te kudà.”
27 Umbe, migketeng ni Moises is belad din diyà te zivavew zutun te zaǥat, ne zutun te meselem nekedlikuey haazà is daǥat. Ne ebpemelaǥuy pezem is menge Ehiptohanen piru midlened sikandan te Nengazen dutun te zaǥat.
28 Nengelened is langun he menge sundaru te hadì te Ehipto he edal-as te menge Israilihanen ragkes en is menge pereuntud te kudà wey menge kerwahi. Wazà minsan sevaha he nesamà kandan.
29 Piru is menge Israilihanen nekevayà mulà sikandan dutun te zaǥat su zuen dan med-ikul te neluwisan he nezalandalan he tanà, ne ziyà te egkekewanan dan wey egkeǥivang dan is wahig he iring te elavat.
30 Dutun he andew midlibri te Nengazen is menge Israilihanen te mezaat he ebeelan pezem kandan te menge Ehiptohanen, ne naahà te menge Israilihanen diyà te veyvey is nemekehidhizeǥà he nemematey.
31 Ne hein naahà te menge Israilihanen is dekelà he ǥehem te Nengazen he impeehè din pinaaǥi te mid-ulaula zin, ne neteǥuan sikandan te kedtahud te Nengazen wey te kedsarig diyà te kandin wey ziyà te ki Moises he suluǥuen din.