15
Is Kanta ni Moises wey ni Miriam
1 Migkanta ni Moises wey is duma he menge Israilihanen diyà te Nengazen heini he kentahan:
“Egkentahan ku is Nengazen, su mezeeǥen sikandin.
Insinumag din diyà te zaǥat is menge kudà wey is ebpemen-untud duen.
2 Is Nengazen iyan ebeǥey kedì te zesen,
wey iyan sikandin egkekanta ku.
Iyan sikandin menluluwas ku.
Iyan sikandin Megbevayè ku, ne edeliǥen ku sikandin.
Megbevayà sikandin te menge kepuun ku, ne ebentuǥen ku sikandin.
3 Beǥani is Nengazen; Nengazen is ngazan din.
4 Midlened din diyà te zaǥat is menge kerwahi wey is menge sundaru te hadì te Ehipto.
Nengelened diyà te Zaǥat he Meriǥà sikan is egkengeseriǥan he menge upisyal te hadì.
5 Nengelened sikandan te mezalem he wahig; iring sikandan te vatu he inteledted diyà te mezalem.
6 Utew lavew is gehem nu Nengazen;
pinaaǥi kayi midruntek nu is menge kuntada.
7 Tenged te kegkemekeǥeǥehem nu, midèdeetan nu is edsukul kenikew.
Neregreg is ebpeketutung he pauk nu; iring sikandan te reǥami he nehimu he igmuk.
8 Pinaaǥi zà te kedhiyup nu neked-untud is wahig diyà te zaǥat ne neluwisan is tanà,
ne haazà is wahig melig-en is kebpekehitindeg din he neiring te zezuwa he elavat;
ne mibadtik haazà.
9 Mibpegalbu is kuntada tew, ke sikandin te,
‘Edel-asen ku sikandan ne edekepen ku;
ebehinen ku is ketiǥeyunan dan ne ebpurungan ku heini ebpemulpulusi.
Edhulevuten ku is ispada ku ne edèdeetan ku sikandan.’
10 Piru senge pedhiyup nu zà ne nengelened sikandan te zaǥat.
Neiring sikandan te timeǥà he inteledted diyà te mezalem.
11 Wazà ed-ezapen te menge etew he ebpekerepeng kenikew, Nengazen.
Wazà ebpekerepeng kenikew te kegkewaǥas nu wey kegkemekeǥeǥehem.
Iyan ke zà Megbevayà he mibaal te egkein-inuwan he menge vaal!
12 Pinaaǥi te ǥehem nu mid-eveleng te tanà is menge kuntada zey.
13 Tenged te hizu nu he ebpedayun, mibpenguluwan nu is menge etew he midlibri nu.
Pinaaǥi te zesen nu, egiyahan nu sikandan pehendiyà te segradu he ubpeey nu.
14 Egkezineg heini te zuma he menge nasyun ne egkerkeren sikandan te kegkahandek.
Utew egkeherati is menge Filistihanen.
15 Is menge pengulu te Edom wey Moab, egkeheratan utew te kegkahandek,
ne is pengulu ziyà te Canaan, ne edliyasen te kegkahandek.
16 “Uya, utew sikandan egkulbai.
Pinaaǥi te ǥehem nu ebpeketireneb sikandan iring te vatu,
taman te nekesaǥad en is menge etew he midlibri nu.
17 Ed-uwiten nu is menge etew nu ziyà te tanè nu,
wey ibpeubpè nu sikandan diyà te vuntud he migaked nu–
kes lugar he mibeelan nu he ed-ubpaan nu, Nengazen,
kes baley nu he iyan ka mismu mibaal.
18 Edhadì ka, Nengazen te wazà pidtemanan.”
19 Midlened te Nengazen is menge kudà te hadì te Ehipto wey is menge kerwahi wey is menge pereuntud te kudà dutun te kebpekerapes te menge Israilihanen duen te memaza he tanà duen te teliwazà te zaǥat.
20 Si Miriam is etevey ni Aaron he ebpeneuven te Megbevayà, migkuwa sikandin te tamburin, ne iyan sikandin midhuna te menge vahi te kedtukar te tamburin ne nemenayew sikandan.
21 Ne migkentahan ni Miriam sikandan te heini he kanta:
“Kentahi niw is Nengazen, su utew sikandin mezeeǥen.
Insinumag din diyà te zaǥat is menge kudà wey is nemen-untud kayi.”
Is Mepait he Wahig
22 Ne puun dutun te Zaǥat he Meriǥà, miduma ni Moises is menge Israilihanen pehendiyà te sibsivayan he Shur. Ne seled te tetelu he andew is kedhipanew zan dutun te sibsivayan ne wazà wahig he neturedu zan.
23 Hein nekeuma sikandan diyà te Mara, duen dutun wahig, piru wazà sikandan mekeinum su mepait haazà is wahig. (Ne iyan haazà hinungdan te kegngezani zutun te Mara su iyan ibpesavut te Mara is mepait.)
24 Ne mibegulbul is menge Israilihanen diyà te ki Moises he ke sikandan te, “Hengkey is egkeinum tew?”
25 Ne nengemuyù si Moises diyà te Nengazen, ne zuen riag he impaahà kandin te Nengazen. Intimbag ni Moises haazà dutun te wahig ne mibmeemis haazà is wahig.
Ne zutun te Mara migezaman sikandan te Nengazen ne zutun din daan iveǥey is sulunuzen wey suǥù din kandan.
26 Ke sikandin te, “Emun ebpurungan niw ebpemineǥa is lalag ku te Nengazen he Megbevayè niw, wey emun iyan niw ebeelan is mid-isip ku he hustu, wey emun daan kenè niw ebey-anan is menge sulunuzen wey menge suǥù ku, kekenà, ebpezumdumahan niw, ne kenè ku sikiyu ebpeeǥiyan te minsan hengkey he zaru he impaaǥi ku ziyà te Ehipto, su iyan a is Nengazen ebawì keniyu.”
27 Ne hein mid-uman dan medhipanew nekeuma zan diyà te Elim, ne zuen mulà dutun 12 he menge serebseb wey 70 he kayu he palma, ne migkampu sikandan dutun te uvey te wahig.