16
Is Keenen he ‘Manna’ wey is menge Piyuǥù
Puun te Elim, ne midhipanew is tivuuk he keet-etawan te Israel taman te nekeuma zan diyà te sibsivayan te Sin, he nekepetug-elang te Elim wey Sinai. Nekeuma zan diyà hein ike-15 he andew zuen te ikezuwa he vulan te tuig puun te ked-awè dan diyà te Ehipto. Diyà te sibsivayan midriklamu ziyà te ki Moises wey ki Aaron haazà is langun he menge Israilihanen. Ke sikandan te, “Deyzey pa ke ziyè key zà himetayi te Nengazen hein diyè key pa te Ehipto. Diyà, ne ebayèbayè key te minsan hengkey he egkekaan dey. Piru ǥuntaan, mid-uwit key kayi keniyu te sibsivayan wey key mengeumes.”
Ne migkaǥi is Nengazen diyà te ki Moises te, “Pemineg ka! Ibpeuzan ku te egkekaan he ebpuun diyà te langit para keniyu. Kada andew ne mebpengamì is menge Israilihanen te egkekaan dan he para zà te haazè dà he andew. Pinaaǥi kayi egezaman ku sikandan ke ebeelan dan be is ibpemeveelan ku kandan wey ke kenà. Keǥiyi nu sikandan he dubliya zan is edtiǥumen dan he egkekaan te ikeenem he andew te kada simana.”
Umbe, migkeǥiyan ni Moises wey ni Aaron is langun he menge Israilihanen te, “Kengkuwan te mezukilem, egktuenan niw he iyan is Nengazen mibpeǥawas keniyu puun diyà te Ehipto, ne zutun te meselem egkeehè niw is mekeǥeǥehem he kebpekiduma te Nengazen. Su nezineg din en is menge riklamu niw. Hentei key is edriklemuwan niw? Is tutuu, is Nengazen, iyan edriklemuwan niw.”
Ne migkaǥi pa si Moises te, “Ebeǥayan kew te Nengazen te usa he egkekaan niw emun mezukilem wey emun meselem egkeveyangan kew te supas su nezineg din is kebegulbul niw ziyà te kandin. Ne egkesavut niw human he kenè key iyan mibegulbulan niw, kekenà, iyan is Nengazen. Hentei key ves is ebegulbulan niw?”
Ne migkeǥiyan ni Moises si Aaron te, “Keǥiyi nu is tivuuk he keet-etawan te Israel he medhitindeg dan diyà te etuvangan te Nengazen su nezineg din is menge riklamu zan.”
10 Ne zutun te kedlelaǥi ni Aaron te tivuuk he keet-etawan, midtengteng sikandan diyà te sibsivayan ne netik-ew zan maahà dutun is mekeǥeǥehem he kebpekiduma te Nengazen diyà te ǥapun. 11 Migkaǥi is Nengazen diyà te ki Moises te, 12 “Nezineg ku is menge riklamu te menge Israilihanen. Keǥiyi nu sikandan te kada mezukilem ne ebpekekaan dan te usa ne kada meselem ne egkeveyangan sikandan te supas. Ne zutun egketuenan niw he iyan a is Nengazen Megbevayè niw.”
13 Ne hein merusrusirem en, nenlepew is utew mahabet he menge piyuǥù diyà te migkempuwan dan ne samè dà kenà meketambun dutun te kampu zan. Ne hein meselem en, nengahames te zehemug is tanà dutun te migkempuwan dan. 14 Ne hein nemezahan en haazà is dehemug, duen neehè dan diyà te sibsivayan he memenipis he utew meputì. 15 Ne wazè dan metueni ke hengkey haazà, umbe mibpein-inseey sikandan, ke “Hengkey heini?” Ne migkeǥiyan sikandan ni Moises te, “Iyan heini supas he imbeǥey te Nengazen diyà te kenyu he para egkekaan niw. 16 Migkaǥi is Nengazen he is kada sevaha keniyu ne medtiǥum sumalà te egkinehenglanen din: senge-ǥantang kada andew is para te sevaha he etew.”
17 Umbe nenguwa is menge Israilihanen dutun he keenen; is duma, mezakel is netiǥum dan ne is duma, ne zeisey zà. 18 Ne hein migantang dan heini, is kada sevaha ne neketiǥum te tig senge-ǥantang. Is neketiǥum te zekelà ne wazà medsubra, ne is neketiǥum te zeisey ne wazà megkurang. Netengkaan dà is nekuwa te uman sevaha. 19 Ne migkeǥiyan sikandan ni Moises te, “Kinahanglan he wazà medteǥana kayi para te sunud he andew.” 20 Iyan, is duma kandan ne wazà mebpezumazuma ki Moises, su midteǥenahan dan is sunud he andew. Piru midtagkey heini ne nerangug. Umbe nepeukan dan ni Moises.
21 Kada meselem ne ebpenguwa is uman sevaha kandan sumalà te egkinehenglanen din. Ne emun ebmeinit en is andew, egkengereney sikan is egkesamè dan. 22 Hein ikeenem he andew, midtakep dan is migkuwa zan–menge zezuwa he ǥantang is para te sevaha he etew. Umbe midhendiyà is menge pengulu te ki Moises ne nenginginsè dan ke maan is midtakep. 23 Ne migkaǥi si Moises diyà te kandan te, “Midsuǥù is Nengazen he kinahanglan he medhimeley kew keeselem su iyan Andew te Kedhimeley, sevaha he segradu he andew para te Nengazen. Umbe hilutua niw is egkesuatan niw te edhilutù; sevawi niw is egkesuatan niw te edsavew. Ne is egkesamà, ne iteǥana niw para keeselem.” 24 Umbe inteǥana zan is nesamè dan para te sunud he andew su iyan man ibpeulaula kandan ni Moises, ne haazà wazà mulà merangug wey wazà daan tegkayi.
25 Dutun migkaǥi si Moises diyà te kandan te, “Keena niw heeyan guntaan he andew. Wazà guntaan egkengeulug he keenen su iyan heini Andew te Kedhimeley he insuǥù te Nengazen. 26 Penguwa kew kayi he keenen seled te heenem he andew, piru te ikepitu he andew ne himeley kew. Heeyan he andew ne wazà ebpekepenguwa te egkekaan.”
27 Piru zuen ded gihapun migawas dutun te ikepitu he andew su ebpenguwa zutun he keenen, piru wazà neehè dan. 28 Ne migkaǥi is Nengazen diyà te ki Moises te, “Sengemenu keluǥayad is kedsupaka kayi te menge etew te menge suǥù ku wey menge penurù ku? 29 Tentenuzi niw he mibeǥayan ku sikiyu te Andew te Kedhimeley, umbe kada ikeenem he andew ne edubliyen ku is menge egkekaan niw para te zezuwa he andew. Kinahanglan he is kada sevaha, ne med-ubpà diyà te seled te valey zin emun ikepitu he andew. Wazà medliǥawang te kebpenguwa te egkeenen.” 30 Umbe, midhimeley haazà is menge etew zutun te ikepitu he andew.
31 Migngezanan haazà te menge Israilihanen he ‘manna’. Iring heini te zeisey he lisu ne meputì, ne meemis iring te menipis he menge supas he midsevukan te teneb. 32 Migkaǥi si Moises te, “Iyan heini suǥù te Nengazen: Taǥù kew te senge-ǥantang he ‘manna’, para te peleebuten he egkelapislapis he menge kevuwazan, para meehè dan is keenen he imbeǥey ku keniyu ziyà te sibsivayan hein impeǥawas ku sikiyu puun diyà te Ehipto.”
33 Ne migkeǥiyan ni Moises si Aaron te, “Kuwa ka te umuy ne teǥui nu te senge-ǥantang he ‘manna.’ Ne isavuk nu heini ziyà te etuvangan te Nengazen para te peleebuten he menge lapis te kevuwazan.” 34 Ne midtuman ni Aaron haazà is insuǥù te Nengazen ki Moises. Midtaǥù si Aaron te ‘manna’ ziyà te Kavan te Kebpekid-uyun su para egketipiǥan heini. 35 Migkaan is menge Israilihanen te ‘manna’ seled te 40 he tuig, taman te nekeuma zan diyà te tanà he ed-ubpaan dan he iyan is Canaan. 36 (Kada andew ebpumpun is kada sevaha kandan te senge-ǥantang he ‘manna’.)