1 “Egkeepesan ku is untung ku, umbe ebpetakà ad he edriklamu. Egkeǥiyen ku is ikezaat te ǥehinawa ku. 2 Ne iyan heini egkeǥiyen ku ziyà te Megbevayà: ‘Kenà a kenikew hukumi he mezaat a, kekenà, ipetueni nu kedì ke hengkey is insumbunga nu kedì. 3 Ingkelipey nu ve is kebpeentusa nu kedì? Maan is idselikwey a kenikew is keugelingen nu he vineelan, ne ebpeburan nu mulà is pelanu te kebpendezaat te menge mezaat he etew? 4 Iring be is ked-ehè nu te ked-ahà te etew? 5 Iring dè be kevavà is untung nu te untung te etew? 6 Maan is kenè en ereg ne edseyepen ad kenikew? 7 Netuenan nu he wazè ku salà, piru wazà ebpekelavan kedì emun iyan ka kuntada.

8 “ ‘Iyan ka mibpurma wey mibaal kedì, ne ǥuntaan edezeetan e zà kenikew. 9 Tentenuzi nu he mibpurma a kenikew he ebpuun te tanà, ne ǥuntaan, idlikù e en be kenikew ziyà te tanà? 10 Iyan ka mibpurma kedì diyà te ǥetek te iney ku ne neiring a te ǥatas he mibeelan he kisu. 11 Mibpurma a kenikew he zuen din menge tulan wey menge uǥat ne midtenges a kenikew te sapù wey lundis. 12 Mibeǥayan a kenikew te untung wey impeehè nu kedì is keupiya nu, wey midtipiǥan nu is untung ku. 13 Piru ǥuntaan netuenan ku is tutuu he pelanu nu mehitenged kedì 14 he iyan is ebentayan a kenikew ke ebpekesalà a, ne zutun kenà a kenikew ebpeseyluwen. 15 Nekesalè e man etawa wazà, ne neked-iring dà he mekehizuhizu a. Su neeled-eled a wey utew subra is kebpekaantus ku. 16 Ebpenigudu a he mekeenew a, piru iring ka te erimaung is ebpeniid kedì su wey a kenikew mezezeeti. Ibpeehè nu is gehem nu te kedezaat kedì. 17 Kenè en egkeengked is kedsumbunga nu kedì, ne layun egkeumani is pauk nu kedì. Ne kenà a kenikew ed-engkezan te edsurung.

18 “ ‘Maan is intuǥut nu pa he meetew a? Deyzey pezem ke minatey ad hein wazè pa nekaahà kediey. 19 Deyzey pezem ke wazà ad melimbag. Deyzey ke minatey e en diyà te ǥetek te iney ku ne indiritsu ad ileveng dutun te kedlusaza kedì. 20 Deisey zà he timpu is nesamà para kedì, umbe engkezi ad te edrasey su para melipey a minsan te mevavè dà he timpu 21 zutun te kenè e pa edhendiyà te lugar he mekeseseeng wey merusirem, he zutun kenà ad ebpekelikù dini. 22 Utew merusirem haazà; wazà bulug kerayag, wey wazà kehusey.’ ”