1 Ne migkaǥi si Job, 2 “Uya, tutuu heeyan is lalag nu. Piru hengkey is paaǥi para igkepaahà te etew he wazè din salà diyà te etuvangan te Megbevayà? 3 Minsan ebpekidlalis pa sikandin te Megbevayà diyà te hukmanan, ne wazè din egkehimu, su is nengkelibu he insà kandin te Megbevayà ne wazà minsan sevaha zutun he egketavak din. 4 Metau wey utew mekeǥeǥehem is Megbevayà. Hentei man is nekezaag he nekigkuntada kandin?

5 “Kenè en sikandin ebpetizaan, ne edhuyungen din is menge vuntud ne egkengetempag heini tenged te pauk din. 6 Ibpelinug din kayi te tanà puun diyà te nesevukan kayi. 7 Pinaaǥi zà te kebmandù din ne egkehimu he kenà edsilà is andew wey kenà edsiǥa is menge vituen. 8 Iyan dà sikandin midempas te langit, wey iyan dà sikandin ebpekepeengked te menge vaǥel. 9 Iyan sikandin mibaal te grupu te menge vituen he egngezanan te Oso, Belatic, Penikapan, wey menge vituen diyà te zivavà he vahin te kelimbaǥan. 10 Mibaal sikandin te egkein-inuwan he menge vaal he kenà egketegkad wey kenà egkevilang. 11 Emun edseǥazan e zin ne kenè ku sikandin egkaahà wey kenè ku egkeǥezam. 12 Emun duen din egkesuatan te egkuwa, ne wazà ebpekeeǥen kandin. Wazà etew he zuen din gehem te kedriklamu ke hengkey is ebeelan te Megbevayà. 13 Wazà eǥena te Megbevayà is pauk din. Minsan si Rahab is umuuǥup te dragun, ne ebpekeseludu te Megbevayà tenged te egkehandek kandin. 14 Umbe, wazà egkehimu ku he pengalang para kenà a mezezeeti te Megbevayà. 15 Minsan wazè ku salà kenè ku egkepengelangan is keugelingen ku emun edezeetan e zin. Iyan dà egkehimu ku is kebpehizuhizu te Megbevayà he Meghuhukum ku. 16 Minsan edhengyuan ku sikandin he ebpeetuvangè key ne ebpezumazuma, ne kenè e zin gihapun ebpemineǥen. 17 Su ibpaantus e zin he henduen be te edel-asen a te vagyu, ne ibpeiseg din is kegkesekiti ku te wazà hinungdan. 18 Henduen be te kenè e zin en ibpeǥeǥehinawa te menge mesakit he ibpaantus din kedì. 19 Emun desen is ed-ahaan, ne utew mezesen sikandin! Ne emun sinumbungà, ne wazà ebpekesumbung kandin. 20 Minsan wazè ku salà, edhukuman e zin gihapun te silut tenged te ebpengeǥiyen ku he idlavan ku te keugelingen ku. 21 Minsan wazà igkesawey kedì ne wazà keniyan bali kayi te kediey. Egkeepesan ku is untung ku. 22 Su ebpeked-iring dà is midtinazeng wey wazà; su edezeetan te Megbevayà is metazeng wey is lalung. 23 Ed-engit dà sikandin emun segugunà ebpatey is metazeng tenged te vangkit. 24 Mibpeveyveyaan din te menge lalung is kelibutan. Edsebpengen din is mata te menge meghuhukum. Emun kenà iyan sikandin mibaal kayi ne hentei ves?

25 “Utew meǥaan he ebpenlavey is menge andew te untung ku; henduen be te edhuna pa he meǥaan te ebpekidlumbà. Nenlavey heini zuma te kegkeseeng. 26 Uya, utew meǥaan he edlavey is untung ku; iring keǥaan te meǥaan he untuzà etawa vanug he edawi. 27 Minsan kenà ad edriklamu wey kenà ad edseengseeng, ne egemen ad, 28 egkahandek a ǥihapun te menge elentusen he ebpekeuma kayi te kedì. Su netuenan ku he kenè din ed-isipen he wazè ku salà. 29 Su ǥuntaan ed-isipen e zin he mekesesalà, umbe wazà pulus te tinguhè ku he idlavan ku te keugelingen ku. 30 Minsan pa ke edsebunan ku is tivuuk he lawa ku su para lumpiyu a, 31 id-ahuk e zin gihapun diyà te vesaken he vudsi, su para minsan is bisti ku egkeremerik kedì. 32 Kenà etew is Megbevayà iring kedì, umbe kenè ku sikandin egkevarew wey kenè ku igkesumbung diyà te hukmanan. 33 Angin pezem ke zuen ebpekepeteliwazà kenami he edhusey kenami te zezuwa. 34 Ne igkepeengked din is Megbevayà te kedlagkut kediey, su para kenà ad mahandek. 35 Ne zutun, kenà ad egkahandek is egkaǥi ziyà te kandin, piru ǥuntaan kenè ku pa heini egkehimu.”